ក្រុមសហជីព មិនទាន់កំណត់យកតួលេខណាមួយ ដើម្បីប្រជុំចរចាកំណត់ប្រាក់ឈ្នួលកម្មករឆ្នាំ ២០២៤ នៅឡើយទេ  

ក្រុមសហជីព នៅមិនទាន់កំណត់យកតួលេខណាមួយ ដើម្បីប្រជុំចរចាកំណត់ប្រាក់ឈ្នួលអប្បបរមា សម្រាប់កម្មករ-និយោជិត នៅក្នុងផ្នែកវាយនភណ្ឌកាត់ដេរនៅក្នុងឆ្នាំ ២០២៤ នៅឡើយទេ។ នេះបើតាមលោក ហ្វា សាលី ប្រធានសម្ព័ន្ធសហជីពជាតិ ដែលនឹងចូលរួមកិច្ចប្រជុំពិភាក្សាប្រាក់ឈ្នួលកម្មករ-និយោជិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃទី ១៦ ខែសីហា ឆ្នាំ ២០២៣ ក្រុមប្រឹក្សាជាតិប្រាក់ឈ្នួលអប្បបរមា នឹងបើកកិច្ចប្រជុំអាណត្តិទី ៣ លើកទី ១ ស្ដីពី ការកំណត់ប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតស្បែកជើង ​និងផលិតផលិតផលធ្វើដំណើរ និងកាបូប សម្រាប់ឆ្នាំ ២០២៤។ កិច្ចប្រជុំនេះ នឹងត្រូវធ្វើឡើងក្រោមអធិបតីភាពលោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ និងជាប្រធានក្រុមប្រឹក្សាជាតិប្រាក់ឈ្នួលអប្បបរមា។

លោក ហ្វា សាលី ប្រធានសម្ព័ន្ធសហជីពជាតិ ប្រាប់កម្ពុជាថ្មីនៅថ្ងៃទី ១៥ ខែសីហានេះថា ក្រុមសហជីព នៅមិនទាន់ ជួបប្រជុំគ្នាសម្រេចយកតួលេខណាមួយ នៅឡើយទេ។ ប៉ុន្តែកន្លងមក ក្រុមសហជីព បានជួបជុំគ្នាម្ដងរួចមកហើយ ដើម្បីបោះឆ្នោតជ្រើសរើសអនុប្រធានតំណាងកម្មករ-និយោជិត។ ក្រោយ​ពីការបោះឆ្នោត គឺអនុប្រធានតំណាងកម្មករ-និយោជិត បានទៅលើលោក គឹម ចាន់ សំណាង ដដែល។

លោក ហ្វា សាលី ឲ្យដឹងបែបនេះថា «ទាក់ទងនឹងការពិភាក្សាគ្នាអំពីការរើសតួលេខណាមួយ ដើម្បីដាក់ចរចានោះ គឺយើងនៅពុំទាន់បានជជែកនៅឡើយទេ ហើយការជជែកនោះវាជារៀងរាល់ឆ្នាំ ពុំសូវស្របគ្នានោះទេ ភាគីមួយៗតែងតែប្រកាន់យកជំហរផ្សេងៗគ្នា»។

ប្រធានសម្ព័ន្ធសហជីពជាតិ បង្ហាញក្ដីសង្ឃឹមថា ក្រុមសហជីពដែលមានភាពចាស់ទុំនោះ នឹងរកតួលេខ​ណាមួយរួមគ្នា ដើម្បីដាក់ជូនទៅក្រុមប្រឹក្សាជាតិប្រាក់ឈ្នួល សម្រាប់ការចរចា។ លោកបន្ថែមថា ​«ប៉ុន្តែវាក៏អត់ទាន់ហួសពេល ដោយ សារតែជាទូទៅយើងមានការប្រជុំច្រើនលើកច្រើនសារ ៦, ៧ដងឯណោះ ឬក៏អាចលើសហ្នឹង»។

តាមលោក ហ្វា សាលី បច្ចុប្បន្ននេះសេដ្ឋកិច្ចពិភពលោក កំពុងជួបបញ្ហាលំបាកទៅៗ ហើយវិស័យឧស្សាហកម្មកាត់ដេរសំលៀកបំពាក់ និងផលិតស្បែកជើង កាបូប និងសម្ភារធ្វើដំណើរ ក៏កំពុងមានការផុយស្រួយផងដែរ។ ម្យ៉ាងទៀត បច្ចុប្បន្ននេះវិស័យនេះ ក៏កំពុងមិនសូវមានការងារធ្វើ ហើយអ្នកបញ្ជាទិញក៏បានកាត់បន្ថយការបញ្ជាទិញដែរ ដោយសារតែវិបត្តិសង្រ្គាមរុស្ស៊ី-អ៊ុយក្រែន។

លោកថា «យើងក៏ពុំដឹងថា តើការដំឡើងប្រាក់ឈ្នួលជូនបងប្អូនកម្មករហ្នឹង យើងអាចទទួលបានកម្រិតណានោះដែរ ពីព្រោះយើងត្រូវពិនិត្យមើលទៅលើស្ថានភាពជាក់ស្ដែងបច្ចុប្បន្ននេះ ហើយយើងក៏សង្ឃឹមថា អាណត្តិថ្មីនេះ ដែលមានលោក ហ៊ុន ម៉ាណែត ដែលជានាយករដ្ឋមន្ត្រី ក៏សង្ឃឹមថា នឹងមានកាដូណាមួយ សម្រាប់ជូនបងប្អូនកម្មករ-និយោជិតយើង»។

សូមជម្រាបថា នៅឆ្នាំ ២០២៣នេះ ប្រាក់ឈ្នួលអប្បបរមាសម្រាប់កម្មករ-និយោជិត ផ្នែកវាយនភណ្ឌកាត់ដេរ ផលិតស្បែកជើង និងផលិតផលធ្វើដំណើរ និងកាបូប ទទួលបានចំនួន ២០០ដុល្លារអាមេរិក។ តួលេខនេះ នៅមិនទាន់បូកបញ្ចូលនូវប្រាក់ និងអត្ថប្រយោជន៍ផ្សេងៗទៀត នៅឡើយទេ៕