ឆមាសទី១ ឆ្នាំ២០២៣ ស៊ីម៉ាក់ បោសសម្អាតមីន/គ្រាប់សរុបផ្ទៃដីជាង ១៥១គីឡូម៉ែត្រក្រឡា

ក្នុងរយ:ពេល៦ខែ (មករា-មិថុនា) ឆ្នាំ២០២៣នេះ អង្គភាពស៊ីម៉ាក់ បានបោសសម្អាតផ្ទៃដីចំការមីន/គ្រាប់បានសរុបចំនួនជាង ១៥១គីឡូម៉ែត្រក្រឡា ស្មើនឹង១១៣,២៨%។

បើទោះបីជាគម្រោងមួយចំនួនមានការពន្យារពេល និងយឺតយ៉ាវក្នុងការចាប់ផ្តើអនុវត្តន៍ក៏ដោយ ក៏កិច្ចប្រតិបត្តិការគ្រប់មុខព្រួញរបស់អង្គភាពស៊ីម៉ាក់បានប្រព្រឹត្តទៅដោយរលូន និងទទួលលទ្ធផលល្អប្រសើរតាមផែនការដែលបានដាក់ចេញ ដោយបានបោសសម្អាតផ្ទៃដីចម្ការមីន/គ្រាប់បានសរុបចំនួនជាង១៥១គីឡូម៉ែត្រក្រឡា ស្មើនឹង១១៣,២៨% ធៀបនឹងផែនការឆមាសទី១ឆ្នាំ២០២៣ ដែលមានផ្ទៃដីចំនួនជាង១៣៤គីឡូម៉ែត្រក្រឡា។ នេះបើតាមលោក ហេង រតនា អគ្គនាយមជ្ឍមណ្ឌលសកម្មភាពកម្ចាត់មីន(ស៊ីម៉ាក់) ក្នុងកិច្ចប្រជុំបូកសរុបលទ្ធផលការងារប្រតិបត្តិការប្រចាំឆមាសទី១ កាលពីថ្ងៃចន្ទ ដើមសប្តាហ៍នេះ នៅទីបញ្ជាការស៊ីម៉ាក់ភ្នំពេញ។

លោក ហេង រតនា បានបញ្ជាក់ថា ក្នុងកិច្ចប្រតិបត្តិការនេះ អាជ្ញាធរមីន បានរកឃើញ និងកម្ទេចចោលគ្រាប់មីន និងគ្រាប់យុទ្ធភណ្ឌមិនទាន់ផ្ទុះចំនួន ៣៦ ៣១៥គ្រាប់។ ទន្ទឹមនោះ ក្នុងឆមាសទី១ ឆ្នាំ២០២៣នេះផងដែរ អង្គភាពស៊ីម៉ាក់ ក៏បានផ្តល់ការអប់រំផ្សព្វផ្សាយយល់ដឹងពីគ្រោះថ្នាក់ដោយសារមីន និងសំណល់យុទ្ធភណ្ឌសង្គ្រាមដល់ក្រុមគោលដៅតាមបណ្តារខេត្តបានចំនួន ១១ ៦៤៨លើក ស្មើនឹង ៥៧១ ៨១០ខ្នងផ្ទះ ដែលមានប្រជាពលរដ្ឋចូលរួមសរុប ៨៩២ ១២៩នាក់ ស្មើនឹង៥៥,៧៧% នៃផែនការឆ្នាំ២០២៣។

គួរជម្រាបផងដែរថា កាលពីថ្ងៃទី១៣ ខែសីហា ឆ្នាំ២០២៣នេះ មន្រ្តីជំនាញរបស់អង្គភាពស៊ីម៉ាក់ចំនួន៧រូប បានធ្វើដំណើរទៅប្រទេសកូឡុំប៊ី ដើម្បីបន្តផ្តល់កិច្ចប្រតិបត្តិការហ្វឹកហ្វឺនសកម្មភាពកំចាត់មីន ដែលគាំទ្រដោយរដ្ឋាភិបាលជប៉ុនផ្តល់ជូនរាជដ្ឋាភិបាលកម្ពុជា និងរដ្ឋាភិបាលសាធារណរដ្ឋកូឡុំប៊ី ចាប់ពីថ្ងៃទី១៣ ដល់ថ្ងៃទី២៧ ខែសីហា ឆ្នាំ២០២៣ ក្រោមគម្រោងកិច្ចសហប្រតិបត្តិកាត្បូង-ត្បូង៕