កម្ពុជា នៅមានបញ្ហាប្រឈមលើផលិតកម្ម​ក្នុងស្រុក​សម្រាប់បម្រើការនាំចេញ

កម្ពុជា នៅតែបន្តមានបញ្ហាប្រឈមដោយឡែក សម្រាប់ការធ្វើពិពិធកម្មទំនិញ និងលើកកម្ពស់ផលិតភាពផលិតកម្ម​ក្នុងស្រុកបម្រើឱ្យការនាំចេញ។

យោងតាមរបាយការណ៍ផែនការយុទ្ធសាស្រ្ត កិច្ចព្រមព្រៀងពាណិជ្ជកម្មសេរី របស់ក្រសួងពាណិជ្ជកម្ម បានពន្យល់អំពី​បញ្ហាប្រឈម ដូចជា បរិយាកាសធុរកិច្ច និងកិច្ចសម្រួលពាណិជ្ជកម្មនៅមានកម្រិត ការអនុវត្តនីតិវិធីនាំចេញនាំចូល ពុំទាន់ស៊ីសង្វាក់ដោយរលូន ដែលអាចធានានូវភាពប្រកួតប្រជែងទាំងពេលវេលា និងថ្លៃដើម។

 បើតាមរបាយការណ៍ ផលិតកម្មកសិកម្មនៅតូចតាច និងរាយប៉ាយ ធ្វើឱ្យប៉ះពាល់ដល់និរន្តរភាពនៃការផ្គត់ផ្គង់ គុណភាព​ផលិតផល និងថ្លៃដើមផលិត, អនុលោមភាពវិធានអនាម័យ និងភូតគាមអនាម័យ បទដ្ឋានបច្ចេកទេស គុណភាពទំនិញនាំចេញនៅមានកម្រិត ពុំអាចឆ្លើយតបនឹងលក្ខខណ្ឌតម្រូវការទីផ្សារគោលដៅមួយចំនួននោះទេ។  

ដោយឡែក សមត្ថភាពផលិតសម្រាប់នាំចេញ ទាំងគុណភាព បរិមាណ និងនិរន្តរភាពនៃការផ្គត់ផ្គង់របស់​ឧស្សាហ​កម្មធុន​ស្រាល ឧស្សាហកម្មខ្នាតតូច និងមធ្យមនៅមានកម្រិតសម្រាប់ទីផ្សារនាំចេញ។ ការវិនិយោគ​លើវិស័យកសិកម្ម ជាពិសេសការកែច្នៃកសិផលពីសំណាក់វិស័យឯកជន នៅមានកម្រិត ជាហេតុធ្វើឱ្យបាត់បង់តម្លៃ​បន្ថែមក្នុងស្រុកលើ​ផលិតផល​កសិកម្ម។

ចំពោះកង្វះផ្លូវលំជនបទ តភ្ជាប់ពីទីតាំងផលិតកម្ម (បណ្ដុំចម្ការស្រែ) ដែលអាចបង្កលក្ខណៈងាយស្រួលដល់​ការដឹក​ជញ្ជូន​កសិផល ពីទីតាំងផលិតមកថ្នល់ជាតិ ឬទីតាំងប្រមូលទិញ។ កង្វះប្រឡាយជើងក្អែប ឬប្រព័ន្ធស្រោចស្រព​សម្រាប់តំបន់សក្តានុពលកសិកម្ម ដែលមានលទ្ធ ភាពបង្កើនផល សម្រាប់បម្រើការនាំចេញ។

ចំណែកថ្លៃអគ្គិសនីក្នុងតំបន់ផលិត និងកែច្នៃមួយចំនួនមានតម្លៃខ្ពស់ ធ្វើឱ្យប៉ះពាល់ដល់គុណភាព បរិមាណនៃការ​កែច្នៃផលិតផល និងរួមចំណែកឱ្យថ្លៃដើមផលិតខ្ពស់។ ផ្ទៃដីកសិកម្មនៅរាយប៉ាយ, លំនាំនៃកសិ-ឧស្សាហកម្មនៅ​មានកម្រិត, ដីកសិកម្មនៅទំនេរ មិន អាចធានាបាននិរន្តរភាពនៃការផលិត និងផ្គត់ផ្គង់ ព្រមទាំងពិបាកប្រមូលទិញ និងដឹកជញ្ជូន។

កសិផលមួយចំនួនត្រូវបានផលិតតាមគ្នា មិនស្របនឹងតម្រូវការទីផ្សារ ធ្វើឱ្យថ្លៃទីផ្សារធ្លាក់ចុះ, ការពឹងផ្អែកលើ​ប្រទេសជិតខាងសម្រាប់ការនាំចេញផលិតផលកសិកម្ម និងទំនិញឆ្លងកាត់ទៅកាន់ទីផ្សារគោលដៅ, ការកក​ស្ទះផលិតផលកសិកម្មនៅរដូវប្រមូលផល ការធ្លាក់ថ្លៃកសិផលអាស្រ័យដោយឈ្មួញទម្លាក់ថ្លៃ ជាដើម។

មួយវិញទៀត ​ការចាកចេញរបស់កម្ពុជាពីបរិបទជាប្រទេសអភិវឌ្ឍន៍តិចតួចក្នុងពេលឆាប់ៗខាងមុខ អាចនឹងនាំឱ្យមាន​ការកាត់បន្ថយហិរញ្ញប្បទានសហប្រតិបត្តិការអភិវឌ្ឍន៍ និងការផ្តល់ប្រព័ន្ធអនុគ្រោះពាណិជ្ជកម្ម ជាដើម៕

អត្ថបទ៖ ផល ធារិត