កូនឈើចម្រុះ ១២០០ដើម និងស្មៅ៤០០ម៉ែត្រការ៉េ ត្រូវបានដាំនៅមុខប្រាសាទអង្គរវត្ត

កូនឈើចម្រុះ ១២០០ដើម និងស្មៅ ៤០០ម៉ែត្រការ៉េ ត្រូវបានដាំនៅលើផ្ទៃដីកន្លះហិកតា នៅបរិវេណមុខប្រាសាទអង្គរវត្ត ក្បែរស្រះត្រពាំងសេស ក្រោមការចូលរួមអ្នកដាំជិត៥០០នាក់។

ការដាំនេះធ្វើឡើងនៅថ្ងៃទី១៦ ខែសីហា ឆ្នាំ២០២៣ ដឹកនាំដោយបណ្ឌិត ហង់ ពៅ អគ្គនាយក និងមន្រ្តីនៃអាជ្ញាធរជាតិអប្សរា ជិត៥០០នាក់។ នេះបើតាមការបង្ហោះរបស់ក្រសួងវប្បធម៌ និងវិចិត្រសិល្បៈថ្ងៃទី១៨ ខែសីហា ឆ្នាំ២០២៣នេះ។  

បណ្ឌិត ហង់ ពៅ អគ្គនាយកអាជ្ញាធរជាតិអប្សរា បានលើកឡើងថា បន្ទាប់ពីបង្កើតឱ្យមាននាយកដ្ឋានគ្រប់គ្រងទឹក និងព្រៃ ឆ្នាំ២០០៤មក នាយកដ្ឋានបានរៀបចំផែនការ ធ្វើយ៉ាងណាឱ្យមានការដាំដើមឈើកាន់តែច្រើននៅតំបន់អង្គរ។ រហូតមកដល់ពេលនេះ មានដើមឈើប្រមាណ២លានដើម ត្រូវបានដាំនៅតំបន់អង្គរ ដែលមិនពីកូនឈើដែលចែកចាយទៅស្ថាប័នរដ្ឋ និងឯកជនឡើយ។ ដោយឡែក តាំងពីចុងឆ្នាំ២០២២មក ដល់ពេលនេះ កូនឈើចម្រុះជាង ៤៧,០០០ដើម ត្រូវបានដាំដុះនៅជុំវិញតំបន់អង្គរ។

លោកបណ្ឌិត បានបញ្ជាក់បន្ថែមថា ដើមឈើមានសារប្រយោជន៍ណាស់សម្រាប់ប្រាសាទបុរាណ ហើយវាមិនអាចចែកដាច់ពីគ្នាបានទេគឺ ទឹក ព្រៃឈើ និងប្រាសាទ។ ដើមឈើដែលដុះនៅជិតប្រាសាទ នឹងបញ្ចេញសំណើម ជួយកាត់បន្ថយកម្តៅរបស់ប្រាសាទ ធ្វើឱ្យថ្មមិនងាយប្រេះ ឬ រលំ និងជួយឱ្យប្រាសាទរឹងមាំ។ មិនតែប៉ុណ្ណោះ ដើមឈើក៏ជួយទប់ល្បឿនខ្យល់ ដែលធ្វើឱ្យប៉ះពាល់ដល់ប្រាសាទផងដែរ។

អាជ្ញាធរជាតិអប្សរា សង្ឃឹមថា ពីមួយថ្ងៃទៅមួយថ្ងៃ តំបន់អង្គរនឹងកាន់តែមានភាពស្រស់ស្អាត សម្បូរព្រៃឈើដែលលម្អដល់ប្រាសាទ និងនាំឱ្យកាន់តែមានភាពទាក់ទាញដល់ភ្ញៀវទេសចរមកកាន់ប្រាសាទអង្គរវត្តថែមទៀតផង៕