កម្លាំងចម្រុះបង្ក្រាបបទល្មើសនេសាទនៅស្រុកកំពង់ស្វាយ

កម្លាំងប្រចាំបញ្ជារទប់ស្កាត់ និងបង្ក្រាបបទល្មើសនេសាទបឹងទន្លេសាបឈរជើងនៅចំណុចឃុំផាត់សណ្តាយ ស្រុកកំពង់ស្វាយ ខេត្តកំពង់ធំ នៅថ្ងៃទី ១៩ ខែសីហា ឆ្នាំ២០២៣ បានចេញប្រតិបត្តិការត្រួតពិនិត្យ និងបង្រ្កាបបទល្មើសនេសាទ នៅចំណុចកន្លុកបាយក្អែក ប៉ាលហាល និងពកស្នោរ ក្នុងភូមិសាស្ត្រ ឃុំផាត់សណ្តាយ ស្រុកកំពង់ស្វាយ ខេត្តកំពង់ធំ។

ក្នុងបតិបត្តិការនេះដែរ លោកវរសេនីយ៍ឯក សោម សុភាវុធ បញ្ជាក់ថា កម្លាំងចុះបង្រ្កាបជាក់ស្តែង និងបានរុះរើបំផ្លាញ​ចោលវត្ថុតាងនៅនឹងកន្លែង រួមមានរបាំងសាច់អួន ក្រឡាញឹកប្រវែង ២,៤០០ ម៉ែត្រ ឡុកចំនួន១២គ្រឿង លប/លូចំនួន១៨មាត់ បង្គោលចំនួន១២០០ដើម ចាក់លែងត្រីស្រស់ចម្រុះចំនួន៣០គីឡូក្រាម។

ក្រៅពីការចុះបង្រ្កាបកម្លាំងចម្រុះបានធ្វើការផ្សព្វផ្សាយដល់ប្រជានេសាទ អំពីច្បាប់ក្នុងរដូវបិទនេសាទ ដែលត្រូវការជាចាំបាច់នូវការចូលរួមពីបងប្អូននៅមូលដ្ឋានជាពិសេសអ្នកនេសាទគ្រប់រូបដែលត្រូវចូលរួមអនុវត្តន៍ និងការពារពូជត្រីទាំងអស់គ្នា៕

អត្ថបទ៖ ឈាង មករា