ទូតអាមេរិក និងអង្គទូតជាច្រើនទៀតបានចូលរួមក្នុងកិច្ចប្រជុំដំបូងរដ្ឋសភា នីតិកាលទី៧

នៅព្រឹកថ្ងៃទី២១ ខែសីហា ឆ្នាំ២០២៣នេះ រដ្ឋសភា នីតិកាលទី៧ បានបើកសម័យប្រជុំដំបូងរបស់ខ្លួន ក្រោមព្រះរាជអធិបតីភាពរបស់ព្រះករុណា ព្រះមហាក្សត្រនៃកម្ពុជា។ សម័យប្រជុំដំបូងនេះ ក៏មានវត្តមានឯកអគ្គរដ្ឋទូតអាមេរិក និងបណ្ដាអង្គទូតជាច្រើនទៀតប្រចាំនៅកម្ពុជា ចូលរួមជាភ្ញៀវកិត្តិយស។

ក្នុងពិធីដ៏មហោឡារឹក និងជាប្រវត្តិសាស្រ្ដ នៅព្រឹកមិញនេះ សង្កេតឃើញថា អង្គទូតនៃប្រទេសមហាអំណាចធំៗ ដែលបានចូលរួមជាភ្ញៀវកិត្តិយសក្នុងសម័យប្រជុំដំបូងរដ្ឋសភានេះ រួមមាន ឯកអគ្គរដ្ឋទូតសហរដ្ឋអាមេរិក លោក Patrick Murphy លោក Dominic Williams ឯកអគ្គរាជទូតចក្រភពអង់គ្លេស លោក Stefan Messerer ឯកអគ្គរដ្ឋ ទូតអាល្លឺម៉ង់ លោក Anatoly Borovik ឯកអគ្គរដ្ឋទូតសហព័ន្ធរុស្ស៊ី និងឯកអគ្គរដ្ឋទូតចិន លោក វ៉ាង វិនធាង។

ជាមួយគ្នានេះ អង្គទូតបរទេសប្រចាំនៅកម្ពុជាជាច្រើនទៀត ក៏បានចូលរួមនៅក្នុងសម័យប្រជុំដំបូងរដ្ឋសភាផងដែរ ដូចជា លោក UENO Atsushi ឯកអគ្គរាជទូតជប៉ុន លោកស្រី Devyani Khobragade ឯកអគ្គរដ្ឋទូតឥណ្ឌា លោកស្រី Ulku Kocaefe ឯកអគ្គរដ្ឋទូតតួកគី លោក Park Jung Wook ឯកអគ្គរដ្ឋទូត​កូរ៉េខាងត្បូង ព្រមទាំងបណ្ដាឯកអគ្គរដ្ឋទូត/រាជទូតនៃប្រទេសអាស៊ាន និងប្រទេសជាមិត្តមួយចំនួនទៀត។

សម្រាប់សម័យប្រជុំលើកដំបូងនៃរដ្ឋសភានៅព្រឹកនេះ ក្រោយព្រះមហាក្សត្រនៃកម្ពុជា ថ្លែងព្រះរាជសុន្ទរកថាបើកនីតិកាលថ្មីរបស់រដ្ឋសភារួចមក សម្ដេច ហេង សំរិន ក្នុងនាមជាព្រឹទ្ធសមាជិករដ្ឋសភា បន្តដឹកនាំសម័យប្រជុំលើកទី១ នីតិកាលទី៧ ដើម្បីសម្រេចអំពីសុពលភាពនៃអាណត្តិរបស់សមាជិកនីមួយៗ និងអនុម័តបទបញ្ជាផ្ទៃក្នុងនៃរដ្ឋសភា នីតិកាលទី៧។

ដោយឡែក នៅព្រឹកថ្ងៃទី ២២ ខែសីហា រដ្ឋសភា នឹងបន្តសម័យប្រជុំរបស់ខ្លួន ដើម្បីបោះឆ្នោតជ្រើសរើសក្បាលម៉ាសុីនរដ្ឋសភា និងបោះឆ្នោតផ្ដល់សេចក្ដីទុកចិត្តដល់សមាសភាពរាជរដ្ឋាភិបាលថ្មី៕