តើរដ្ឋមន្រ្តីណាមានវ័យក្មេងជាងគេ និងវ័យចាស់ជាងគេនៅអាណត្តិនេះ?

កាលពីថ្ងៃទី២២ ខែសីហា ឆ្នាំ២០២៣ ព្រះមហាក្សត្រនៃកម្ពុជា ទ្រង់បានចេញព្រះរាជក្រឹត្យតែងតាំងរាជរដ្ឋា ភិបាលអាណត្តិទី៧ ដែលមានសមាសភាពចំនួន ៥៤រូប។ ឥស្សរជនទាំង៥៤រូបនោះ មានអាយុទាបបំផុតចំនួន៤០ឆ្នាំ និងច្រើនបំផុត ៧២ឆ្នាំ ។ បើសិនជានិយាយពីអាយុរបស់រដ្ឋមន្ត្រីទាំង៣០រូបវិញ គឺមានអាយុតិចជាងគេបំផុត ៤០ឆ្នាំ និងអាយុច្រើនជាងគេបំផុត គឺ៦៧ឆ្នាំ។

នៅថ្ងៃនេះ “កម្ពុជាថ្មី” សូមជម្រាបជូនប្រិយមិត្តអំពីរដ្ឋមន្ត្រីដែលមានវ័យក្មេងជាងគេ ៥រូប និងរដ្ឋមន្ត្រីមានវ័យចំណាស់ជាងគេ ៥រូប ដូចខាងក្រោម៖

១/លោក ហ៊ុន ម៉ានី រដ្ឋមន្ត្រីក្រសួងមុខងារសាធារណៈ។ លោក គឺ​ជារដ្ឋមន្ត្រីវ័យក្មេងជាងគេដែលមានអាយុត្រឹមតែ ៤០ឆ្នាំ ប៉ុណ្ណោះ។ កូនប្រុសរបស់សម្ដេចតេជោ ហ៊ុន សែន រូបនេះ កើតនៅថ្ងៃទី​ ២៧ខែវិច្ឆិកា ឆ្នាំ១៩៨២។

២/ លោក ប៉េង ពោធិ៍នា វ័យ៤០ឆ្នាំ​ រដ្ឋមន្ត្រីក្រសួងសាធារណការនិងដឹកជញ្ជូន។ ក្នុងនីតិកាលទី៦កន្លងទៅ កូនប្រុសរបស់សម្ដេចកិត្តិសង្គហបណ្ឌិត ម៉ែន​ សំអន រូបនេះ ជារដ្ឋលេខាធិការក្រសួងដដែល។ 

៣/ មានវ័យត្រឹម ៤០ឆ្នាំ លោក ​សុខ សូកេន​ ជារដ្ឋមន្ត្រីក្រសួងទេសចរណ៍។ លោក ជាកូនប្រុសរបស់សម្ដេចវិបុលបញ្ញា សុខ អាន ដែលកើតនៅថ្ងៃទី ១១ខែ មិថុនា ឆ្នាំ ១៩៨៣ ជាបងប្អូនភ្លោះជាមួយ លោក សុខ សូកាន។

៤/ លោក នេត្រ ភ័ក្រ្តា ជារដ្ឋមន្ត្រីវ័៍យក្មេងជាងគេលំដាប់ទី៤ ដែលមានវ័យ៤១ឆ្នាំ។ លោក គឺជាក្មេងកំព្រាដែលផ្ញើខ្លួននឹងវត្តអារាម ហើយតស៊ូរៀនសូត្រ រហូតទទួលបានឱកាសក្លាយជារដ្ឋមន្ត្រីក្រសួងព័ត៌មាន។

៥/ លោក​ ស សុខា ជារដ្ឋមន្ត្រីក្រសួងមហាផ្ទៃ មានវ័យ ៤២ឆ្នាំ។ កូនប្រុសរបស់សម្ដេចក្រឡាហោម ស ខេង រូបនេះ ​កើតនៅថ្ងៃទី​ ០៤ ខែមិថុនា ឆ្នាំ១៩៨១។

ចំណែក រដ្ឋមន្ត្រីដែលមានវ័យចំណាស់ជាងគេចំនួន៥រូបវិញ គឺ៖

១/ លោក ហង់ ជួន ណារ៉ុន ជារដ្ឋមន្ត្រីវ័យចំណាស់ជាងគេលំដាប់ទី៥ដែលមានអាយុ៦១ឆ្នាំ ។ ជាឧបនាយករដ្ឋមន្ត្រី​ រដ្ឋមន្ត្រីក្រសួងអប់រំ លោកកើតនៅ ថ្ងៃ​ទី ០២ ខែមករា ឆ្នាំ១៩៦២។

២/ លោកស្រី អ៉ឹង កន្ថាផាវី ជារដ្ឋមន្ត្រីមានវ័យចំណាស់ជាងគេលំដាប់ទី៤។ រដ្ឋមន្ត្រីក្រសួងកិច្ចការនារី២អាណត្តិរូបនេះមានអាយុ ៦៣ឆ្នាំ លោកស្រី កើតនៅថ្ងៃទី ១៦ ខែកក្កដា ឆ្នាំ១៩៦០។

៣/ លោកស្រី ភឿង សកុណា ជារដ្ឋមន្ត្រីវ័យចំណាស់ជាងគេលំដាប់ទី៣។ រដ្ឋមន្ត្រីក្រសួងវប្បធម៌ និងវិចិត្រសិល្បៈ រូបនេះមានអាយុ៦៣ឆ្នាំ កើតនៅថ្ងៃទី ០៨ ខែតុលា ឆ្នាំ១៩៥៩។

៤/ លោក ឡាំ ជា រដ្ឋមន្ត្រីទទួលបន្ទុករដ្ឋលេខាធិការកិច្ចការព្រំដែន។ លោក គឺជារដ្ឋមន្ត្រីដែលមានវ័យចំណាស់ជាងគេលំដាប់ទី២ គឺអាយុ ៦៦ឆ្នាំ។

៥/ ជារដ្ឋមន្ត្រីវ័យចំណាស់ជាងគេបង្អស់ក្នុងចំណោមរដ្ឋមន្ត្រីនៅអាណត្តិទី៧នេះ  លោក សុខ ចិន្តា សោភា មានអាយុ៦៧ឆ្នាំ។ រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិរូបនេះ កើតនៅថ្ងៃទី២៤ ខែមេសា ឆ្នាំ១៩៥៦៕

ដោយ៖ ង៉ិល ណារ៉ាត់​