ពលរដ្ឋ​ដាំដើមត្នោតនិងដើមឈើរាប់រយដើម ​​នៅតំបន់ការពារទេសភាពអន្លង់ព្រីង​ជាប់ព្រំដែន​វៀតណាម

អាជ្ញាធរស្រុកកំពង់ត្រាច និងមន្ត្រីជំនាញបានជំរុញឱ្យប្រជាពលរដ្ឋសហគមន៍ សិស្សានុសិស្ស និង កងកម្លាំង ព្រះសង្ឃង អង្គការ និងក្រុមហ៊ុនឯកជនឲ្យចូលរួមដាំដើមត្នោត និងដើមឈើនៅតំបន់ការពារទេសភាពអន្លង់ព្រីងឲ្យបានច្រើន ដើម្បីស្តារបរិស្ថានបៃតងផងនិងទាក់ទាញទាំងភ្ញៀវទេសចរ និងហ្វូងសត្វស្លាបឲ្យមកកាន់តែច្រើនផង។

ដោយមានការចង្អុលបង្ហាញពីលោក ម៉ៅ ធនិន អភិបាលខេត្តកំពត នាថ្ងៃទី២៥ ខែសីហានេះ អភិបាលរងស្រុកកំពង់ត្រាច លោក ឃឹម សាមី បានប្ដឹកនាំប្រជាពលរដ្ឋ សហគមន៍ សិស្សានុសិស្ស កងកម្លាំងនិង ព្រះសង្ឃង អង្គការ និងក្រុមហ៊ុនឯកជន រួមគ្នាដាំកូនត្នោត ១០០ ដើម កូនឈើឆ្នង់ បេង ក្រញូង ចំនួន ៦០០ដើម និងគ្រាប់ត្នោត ៤ ពាន់គ្រាប់នៅតំបន់ការពារទេសភាពអន្លងព្រីង ដែល​ជាតំបន់ជាប់ខ្សែបន្ទាត់ព្រំដែនកម្ពុជាវៀតណាម ស្ថិត​ក្នុងភូមិកោះចំការ ឃុំបឹងសាលាខាងត្បូង ស្រុកកំពង់ត្រាច ខេត្តកំពត។

លោកអភិបាលរងស្រុកបានបញ្ជាក់ថា ការដាំដើមត្នោតនិងដើមឈើមានប្រយោជន៍ច្រើនណាស់សម្រាប់មនុស្ស សត្វ និងភពផែនដីទាំងមូល។

លោក អេង ប៉ូឡូ ប្រធានមន្ទីរបរិស្ថានខេត្តកំពតបានប្រាប់ឲ្យដឹងដែរថា ការនាំគ្នាចូលរួមដាំកូនត្នោត និងកូនឈើនៅតំបន់ការពារទេសភាពអន្លង់ព្រីងដែលជា​តំបន់ដីសើម និងជាទីកន្លែងជម្រកនិងទីរកចំណីរបស់ពពួកសត្វស្លាបជិត​១០០​ប្រភេទ ពិសេសសត្វក្រៀលដែលជាសត្វកម្រកំពុងប្រឈមនឹងការផុតពូជន៍ ពិតមានសារៈប្រជយោជន៍ខ្លាំងណាស់ ព្រោះ​អាចទាក់ទាញសត្វស្លាបឲ្យមកកាន់តែចម្រើនផង និងទាញទេសចរផង៕

អត្ថបទ៖ សឹង រ៉ាត់