ត្រីភាគីបន្តបើកកិច្ចប្រជុំលើកទី២ កំណត់ប្រាក់ឈ្នួលកម្មករសម្រាប់ឆ្នាំ២០២៤នៅព្រឹកនេះ

ក្រុមប្រឹក្សាជាតិប្រាក់ឈ្នួលអប្បបរមាអាណត្តិទី៣ រួមមានភាគីរដ្ឋាភិបាល ភាគីនិយោជក និងភាគីសហជីព នឹងបន្តបើកកិច្ចប្រជុំលើកទី២ដើម្បីកំណត់ប្រាក់ឈ្នួលកម្មករឆ្នាំ២០២៤នៅព្រឹកថ្ងៃទី២៨ ខែសីហា ឆ្នាំ២០២៣ នៅទីស្តីការក្រសួងការងារ ក្រោមអធិបតីភាពលោក ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាលើកទី២ហើយ ខណៈលើកទី១ត្រីភាគីបានរៀបចំប្រជុំកាលពីថ្ងៃទី១៦ ខែសីហា ឆ្នាំ២០២៣។ ប៉ុន្តែភាគីទាំងបីនៅមិនទាន់មានការដាក់តួលេខណាមួយនៅឡើយទេ។ គេរំពឹងថា កិច្ចប្រជុំលើកទី២នេះ ភាគីទាំងបីនឹងដាក់តួលេខរៀងៗខ្លួនដើម្បីធ្វើការចចារកំណត់តួលេខមួយច្បាសលាស់សម្រាប់ប្រាក់ឈ្នួលឆ្នាំ២០២៤។

បើតាមលោក អាត់ ធន់ ប្រធានសហភាពការងារកម្ពុជាបានឱ្យដឹងថា ខាងភាគីសហជីពបានរកឃើញតួលេខចំនួន​ពីរសម្រាប់ដាក់នៅក្នុងកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមាដែលនឹងប្រព្រឹត្តិទៅនៅថ្ងៃទី២៨ ខែសីហាឆ្នាំ២០២៣​នេះ គឺទី១តួលេខ២១២ដុល្លារ និងទី២ តួលេខ២២០,២ដុល្លារ ខណៈប្រាក់ឈ្នួលអប្បបរមារបស់កម្មករនិយោជិតឆ្នាំ២០២៣មានចំនួន២០០ដុល្លារ ។

ចំណែកលោក កាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជាបានឱ្យដឹងថា ភាគីខាងនិយោជក នឹងបង្ហាញជំហរ និងទឡ្ហីករណ៍នៅក្នុងកិច្ចប្រជុំព្រឹកនេះ។ ប៉ុន្តែមិនបានបញ្ជាក់ថា នឹងដាក់តួលេខចំនួនប៉ុន្មាននោះទេ។ រីឯខាងភាគរាជរដ្ឋាភិបាលតំណាងដោយក្រសួងការងារនិងបណ្តុះបណ្តាលវិជ្ជាជីវៈ រហូតមកដល់ពេលនេះក៏នៅមិនទាន់បានបង្ហាញតួលេខណាមួយជាផ្លូវការនៅឡើយដែរ។

គួរបញ្ជាក់ថា កិច្ចក្រុមប្រឹក្សាជាតិប្រាក់ឈ្នួលអប្បបរមាអាណត្តិទី៣បានសម្រេចរៀបចំកិច្ចប្រជុំកំណត់ប្រាក់ឈ្នួលចំនួន៧​លើកគឺនៅថ្ងៃទី១៦សីហា ថ្ងៃទី២៨ ខែសីហា, ថ្ងៃទី៤, ថ្ងៃទី១១,ថ្ងៃទី១៨, ថ្ងៃទី២៥ ខែកញ្ញា និងថ្ងៃទី២ខែតុលា ឆ្នាំ២០២៣៕

អត្ថបទ៖ សំអឿន