ព័ត៌មានជាតិ

លោក លី ធុជ ៖ គណៈប្រតិភូតំណាងអនុសញ្ញាអូតាវ៉ា គាំទ្រទស្សនវិស័យ ការប្ដេជ្ញារបស់ ឯកឧត្ដម ហ៊ុន ម៉ាណែត ក្នុងការដោះស្រាយបញ្ហាមីននៅកម្ពុជា

បានផុស

៣ years មុន

នៅ

ថ្ងៃចន្ទ ២៨ សីហា ២០២៣

ដោយ

នៅថ្ងៃទី ២៨ ខែសីហា ឆ្នាំ ២០២៣ នេះ នាទីស្នាក់ការអាជ្ញាធរមីន លោក Juan Carlos Ruan នាយកអង្គភាពគាំទ្រការអនុវត្តអនុសញ្ញាស្ដីពីការហាមប្រាម ការប្រើប្រាស់ ការរក្សាទុក ការផលិត និងការផ្ទេរគ្រាប់មីនប្រឆាំងមនុស្ស និងការបំផ្លាញគ្រាប់មីនចោល (អនុសញ្ញាអូតាវ៉ា-ISU-APMBC) និងជាតំណាងឲ្យរដ្ឋភាគី នៃអនុសញ្ញាអូតាវ៉ាទាំងអស់ ចំនួន ១៦៤ ប្រទេស បានសម្ដែងនូវអំណរសាទរជូនចំពោះ ឯកឧត្ដមកិត្តិទេសាភិបាលបណ្ឌិត ហ៊ុន ម៉ាណែត ដែលត្រូវបានជ្រើសតាំងជានាយករដ្ឋមន្ត្រី នៃព្រះរាជាណាចក្រកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Juan Carlos Ruan បានគាំទ្រចំពោះទស្សនវិស័យ និងការប្ដេជ្ញាចិត្តខ្ពស់របស់ ឯកឧត្ដមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការដោះស្រាយបញ្ហាមីននៅកម្ពុជា ព្រមទាំងបានប្ដេជ្ញាបន្តផ្ដល់នូវកិច្ចសហប្រតិបត្តិការ និងគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការងារបោសសម្អាតមីនផងដែរ។

បេសកកម្មមកកម្ពុជារបស់គណៈប្រតិភូ នៃអនុសញ្ញាអូតាវ៉ា-ISU-APMBC នាពេលនេះ គឺ ផ្ដោតសំខាន់លើដំណើរការធ្វើជាម្ចាស់ផ្ទះរៀបចំ និងធ្វើជាប្រធានដឹកនាំរបស់កម្ពុជា សម្រាប់កិច្ចប្រជុំត្រួតពិនិត្យឡើងវិញលើកទី ៥ អនុសញ្ញាអូតាវ៉ា ក្នុងខែធ្នូ ឆ្នាំ ២០២៤ ដែលមានតំណាងមកពីប្រទេសជារដ្ឋភាគីចំនួន ១៦៤ និងស្ថាប័នអន្តរជាតិជាច្រើនទៀតចូលរួម ក្នុងនោះ លោកទេសរដ្ឋមន្ត្រី ត្រូវបានសម្រេចជ្រើសតាំងជាប្រធានតែងតាំង (Designated President)។

ក្នុងនាម ឯកឧត្ដមកិត្តិទេសាភិបាលបណ្ឌិត នាយករដ្ឋមន្ត្រី និងជាប្រធានអាជ្ញាធរមីន លោកទេសរដ្ឋមន្ត្រី បានថ្លែងអំណរគុណ ISU-APMBC ដែលតែងតែផ្ដល់ការគាំទ្រដល់កម្ពុជាក្នុងការរៀបចំផែនការបោសសម្អាតមីន ឲ្យសម្រេចបាននូវកាតព្វកិច្ច នៃអនុសញ្ញាអូតាវ៉ា ក្នុងនាមកម្ពុជាជារដ្ឋភាគី។

លោកបន្តទៀតថា ដោយមានការគាំទ្រពី ISU-APMBC និងសហគមន៍អឺរ៉ុប កម្ពុជា បានត្រៀមខ្លួនរួចជាស្រេចស្វាគមន៍ និងទទួលបដិសណ្ឋារកិច្ចចំពោះគណៈប្រតិភូមកពី ៤០ ប្រទេស ក្នុងនាមកម្ពុជាធ្វើជាម្ចាស់ផ្ទះ នៃ«សន្និសីទសកលស្ដីពីជំនួយដល់ជនរងគ្រោះដោយសារមីនប្រឆាំងមនុស្ស និងសំណល់ជាតិផ្ទុះពីសង្គ្រាម និងសិទ្ធិជនពិការ» នាខែតុលា ឆ្នាំ ២០២៣ ខាងមុខនេះ។

ជាមួយគ្នានេះ ក្នុងនាមជាប្រធានតែងតាំង នៃកិច្ចប្រជុំត្រួតពិនិត្យឡើងវិញលើកទី ៥ នៃអនុសញ្ញាអូតាវ៉ា លោកទេសរដ្ឋមន្ត្រី បានពាំនាំនូវសាររបស់ ឯកឧត្ដមកិត្តិទេសាភិបាលបណ្ឌិត ជូនដល់រដ្ឋភាគីទាំងអស់ នៃអនុសញ្ញាអូតាវ៉ា និងបានអះអាងថា កម្ពុជាបានត្រៀមទទួលស្វាគមន៍យ៉ាងកក់ក្ដៅសម្រាប់គណៈប្រតិភូមកពី ១៦៤ ប្រទេស និងស្ថាប័នអន្តរជាតិដទៃទៀត ក្នុងនាមជាប្រធានដឹកនាំ និងការរៀបចំធ្វើជាម្ចាស់ផ្ទះ នៃកិច្ចប្រជុំត្រួតពិនិត្យឡើងវិញលើកទី ៥ អនុសញ្ញាអូតាវ៉ា នៅខេត្តសៀមរាប នាឆ្នាំក្រោយនេះ។

សូមបញ្ជាក់ថា កម្ពុជា បានក្លាយជារដ្ឋភាគីមួយ នៃអនុសញ្ញាអូតាវ៉ា ចាប់ពីឆ្នាំ ២០០០។ ក្នុងនាមជារដ្ឋភាគី កម្ពុជា បានយកចិត្តទុកដាក់យ៉ាងខ្លាំងលើវិស័យមីន ហើយក៏បាននិងកំពុងបំពេញកាតព្វកិច្ចរបស់ខ្លួនយ៉ាងសស្រាក់សស្រាំ ព្រមទាំងទទួលបាននូវការវាយតម្លៃខ្ពស់ពីគ្រប់រដ្ឋភាគី៕

Related Topics:លោក លី ធុជ