រយៈពេល៦ខែ សត្វពាហនៈជាង២ម៉ឺនក្បាលក្នុងខេត្តកំពង់ចាម បានចាក់វ៉ាក់សាំងបង្ការជំងឺ

ក្នុងឆមាសទី១ ឆ្នាំ២០២៣នេះ មន្ត្រីពេទ្យសត្វខេត្តកំពង់ចាម បានចុះចាក់វ៉ាក់សាំងបង្ការជំងឺផ្សេងៗដល់សត្វពាហនៈ របស់ប្រជាកសិករប្រមាណជាង ២ម៉ឺន៦ពាន់ក្បាលហើយ។

លោក នង ម៉េងហ៊ាង ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ចាម បានឲ្យដឹងថា ការចុះចាក់វ៉ាក់សាំងការពារជំងឺសារទឹក និងការពារជំងឺអុតក្តាមដល់សត្វពាហនៈរបស់ប្រជាកសិករបានប្រមាណជិត ៣ម៉ឺនក្បាលហើយ បើគិតត្រឹមរយៈពេល៦ខែ ឆ្នាំនេះ ដែលក្នុងនោះ មានសត្វគោ ក្របី ពពែ ជាដើម។

នៅថ្ងៃទី២៩ ខែសីហា ឆ្នាំ២០២៣នេះ លោក អ៊ុន ចាន់ដា អភិបាលខេត្តកំពង់ចាម និងលោក គឹម សាវឿន អគ្គនាយករងសុខភាពសត្វ និងផលិតកម្មសត្វ នៃក្រសួងកសិកម្ម រុក្ខាប្រម៉ាញ់ និងនេសាទ បានអញ្ជើញបើកយុទ្ធនាការចាក់វ៉ាក់សាំងការពារជំងឺឆ្លងសត្វពាហនៈរបស់ប្រជាពលរដ្ឋ ស្ថិតនៅភូមិកំពង់ត្រុំក្រោម ឃុំកោះមិត្ត ស្រុកកំពង់សៀម។

ឆ្លៀតឱកាសនោះ លោកអភិបាលខេត្ត បានបញ្ជាក់ថា ការជួបជុំគ្នាថ្ងៃនេះ ពិតជាមានសារៈសំខាន់ណាស់ បន្ទាប់ពីបាន បើកយុទ្ធនាការចាក់វ៉ាក់សាំងសត្វពាហនៈរបស់ប្រជាពលរដ្ឋនៅទីនេះហើយ ប្រជាពលរដ្ឋក៏អាចផ្សព្វផ្សាយដំណឹងនេះបន្ត ដើម្បីឲ្យប្រជាពលរដ្ឋដទៃទៀត បានយល់ដឹង និងចេះថែទាំសុខភាពសត្វចិញ្ចឹមរបស់ខ្លួន។ លោក ថា ការថែទាំសុខភាពសត្វចិញ្ចឹមបានល្អ នឹងនាំឱ្យទទួលបានផលចំណេញច្រើនពីការចិញ្ចឹមនេះត្រឡប់មកវិញ ហើយថែមទាំងបានចូលរួមចំណែកលើកកម្ពស់កម្រិតជីវភាពកាន់តែប្រសើរឡើងថែមទៀត៕

អត្ថបទ៖ ឡេក ចាន់ពេជ្រ