ព័ត៌មានជាតិ
តើប្រមុខការទូតថ្មីកម្ពុជា លោក សុខ ចិន្តាសោភា ជានរណា?
រាប់ចាប់ពីឆ្នាំ១៩៧៩ លោក សុខ ចិន្តាសោភា ជាប្រមុខការទូតទី៧ របស់កម្ពុជា ក្រោយពេលដែលលោកត្រូវបានជ្រើសតាំងឱ្យកាន់តំណែងជាឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ជំនួសលោក ប្រាក់ សុខុន សម្រាប់រាជរដ្ឋាភិបាល អាណត្តិទី៧នេះ។ ពីរដ្ឋមន្ត្រីប្រតិភូអមនាយករដ្ឋមន្ត្រី ក្លាយជារដ្ឋមន្ត្រីការបរទេសកម្ពុជា តើលោក សុខ ចិន្តាសោភា មានចក្ខុវិស័យ និងការប្ដេជ្ញាចិត្តយ៉ាងណាក្នុងតួនាទីដ៏សំខាន់នេះ?
កើតនៅរាជធានីភ្នំពេញ លោក សុខ ចិន្តាសោភា ជាអ្នកជំនាញផ្នែកសេដ្ឋកិច្ច និងការវិនិយោគ ដែលលោកបានទទួលការសិក្សាអប់រំមកពីប្រទេសបារាំងលើជំនាញវិទ្យាសាស្ត្រសេដ្ឋកិច្ច ខណៈលោក ក៏ធ្លាប់ធ្វើការឱ្យក្រុមហ៊ុនឯកជននៅប្រទេសបារាំងដែរ។ ក្រោយការបោះឆ្នោតសកលលើកដំបូង នៅកម្ពុជា នាឆ្នាំ១៩៩៣ ដែលជានីតិកាលទី១ នៃរដ្ឋសភា លោក សុខ ចិន្តាសោភា ត្រូវបានទទួលបានតែងតាំងជាអនុរដ្ឋលេខាធិការក្រសួងទេសចរណ៍ នៃរាជរដ្ឋាភិបាលចម្រុះកម្ពុជា។
រហូតដល់ឆ្នាំ១៩៩៧ ដែលជាវេលាមួយឈានចូលនីតិកាលទី២ នៃរដ្ឋសភា លោក សុខ ចិន្តាសោភា ក៏ត្រូវបានមកកាន់តំណែងជាអគ្គលេខាធិការនៃក្រុមប្រឹក្សាអភិវឌ្ឍន៍កម្ពុជា ឬហៅថា CDC។ លុះដល់នីតិកាលទី៤ គឺនៅឆ្នាំ២០០៨ លោក សុខ ចិន្តាសោភា ត្រូវបានតែងតាំងឱ្យកាន់មុខតំណែងជារដ្ឋមន្ត្រីប្រតិភូអមនាយករដ្ឋមន្ត្រី និងបន្តកាន់ជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា រហូតដល់នីតិកាលទី៧នេះ ទើបលោក ត្រូវបានផ្ដល់សេចក្ដីទុកចិត្តជ្រើសរើសឱ្យកាន់តំណែងជាឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិនៃកម្ពុជា។
រយៈពេលជាង ២៥ឆ្នាំ ក្នុងតួនាទីជារដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការនៃក្រុមប្រឹក្សាអភិវឌ្ឍន៍កម្ពុជា លោក សុខ ចិន្តាសោភា តែងតែអមដំណើរសម្ដេចតេជោ ហ៊ុន សែន ទៅក្រៅប្រទេស ទាំងដំណើរទស្សនកិច្ចការងារ ទាំងទស្សនកិច្ចផ្លូវការ និងការទៅចូលរួមកិច្ចប្រជុំអន្តរជាតិនានានៅតាមបណ្ដាប្រទេសលើពិភពលោក។ ជារឿយៗអំឡុងពេលអមដំណើរសម្ដេចតេជោ ហ៊ុន សែន អតីតប្រមុខរាជរដ្ឋាភិបាល គឺលោក សុខ ចិន្តាសោភា តែងតែឆ្លៀតពេលជួបប្រាស្រ័យទាក់ទងជាមួយវិនិយោគិនបរទេស ដើម្បីធ្វើបទបង្ហាញអំពីបរិយាកាសវិនិយោគនៅកម្ពុជា សំដៅទាក់ទាញអ្នកវិនិយោគបរទេស មកបណ្ដាក់ទុនរកស៊ីនៅក្នុងប្រទេសកម្ពុជា។
ជាមួយនឹងការលះបង់យ៉ាងធំធេងកម្លាំងកាយ កម្លាំងចិត្ត បញ្ញាស្មារតី និងពេលវេលាក្នុងការដឹកនាំ គ្រប់គ្រង និងអភិវឌ្ឍក្រុមប្រឹក្សាអភិវឌ្ឍន៍កម្ពុជា នៅពេលកន្លងមកនេះ សម្រាប់បេសកកម្មជំរុញ និងទាក់ទាញវិនិយោគមកកម្ពុជា លោក សុខ ចិន្តាសោភា ក៏បានចង្អុលបង្ហាញ និងដឹកនាំរៀបចំច្បាប់ស្តីពីវិនិយោគនៃកម្ពុជា និងអនុក្រឹត្យស្តីពីការអនុវត្តច្បាប់វិនិយោគនេះផងដែរ។
ក្នុងនាមជាអ្នកបន្តវេន ដែលកាន់មុខតំណែងជារដ្ឋមន្ត្រីក្រសួងការបរទេស និងសហប្រតិបត្តិអន្តរជាតិនៃកម្ពុជា លោក សុខ ចិន្តាសោភា បានប្ដេជ្ញចិត្តបន្តនិរន្តភាពនៃប្រសិទ្ធភាពស្ថាប័ន ក៏ដូចជាធានានូវជោគជ័យថ្មីៗ បន្តផ្ដោតលើការងារកំណែទម្រង់ស្ថាប័នក្នុងការប្រែក្លាយក្រសួងការបរទេសឱ្យទៅជាសេនាធិការដ៏រឹងមាំក្នុងវិស័យការទូត នៃរាជរដ្ឋាភិបាល អាណត្តិទី៧នេះ ដើម្បីផលប្រយោជន៍ជាតិ ប្រជាពលរដ្ឋខ្មែរ ទាំងក្នុង និងក្រៅប្រទេស។
ជាចក្ខុវិស័យ លោក សុខ ចិន្តាសោភា នឹងបន្តពង្រឹងដំណើរការ ដើម្បីបង្កើតសមិទ្ធិផលថ្មីៗរបស់វិទ្យាស្ថានជាតិការទូត និងទំនាក់ទំនងអន្តរជាតិ ជាពិសេសការយកចិត្តទុកដាក់ដល់ការបណ្តុះបណ្តាលធនធានមនុស្សខាងវិស័យការទូត ដើម្បីកសាងឱ្យបាននូវមន្ត្រីមានសមត្ថភាពខ្លាំង ស្អាតស្អំ វៃឆ្លាត ជំរុញការកែសម្រួលរចនាសម្ព័ន្ធស្ថាប័ន និងបន្តអភិវឌ្ឍហេដ្ឋារចនាសម្ព័ន្ធក្រសួងចាំបាច់នានា ទាំងផ្នែករឹង និងផ្នែកទន់ ដូចជា ជំរុញសំណើគម្រោងសាងសង់អាគារធ្វើការបន្ថែមតាមការចាំបាច់។ បន្ថែមពីនេះ លោករដ្ឋមន្ត្រី នឹងបន្តពង្រីកសមត្ថភាពស្ថាប័ន តាមរយៈការបង្កើនចំនួនមន្ត្រី ផ្តល់ការលើកទឹកចិត្តចំពោះបុគ្គលដែលមានសមត្ថភាព និងទេពកោសល្យ ព្រមទាំងបន្តជំរុញលើការពិនិត្យដំឡើងប្រាក់បៀវត្សមន្ត្រីការទូត និងបុគ្គលិកនានា ដែលបម្រើតាមស្ថានបេសកកម្មនៅក្រៅប្រទេស ជាដើម៕
ដោយ៖ ធឿន វ៉ាន់សុង
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៧ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៧ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង