គ្រឹះស្ថានអង្គរ លក់បណ្ណចូលទស្សនាកើនឡើងជាង ៤០០ភាគរយ រយៈពេល៨ខែ ឆ្នាំនេះ

កម្ពុជា រកចំណូលបានចំនួន ២៣,០៩១,៩៣១ដុល្លារអាមេរិក ពីការលក់បណ្ណចូលទស្សនារមណីយដ្ឋានអង្គរ រយៈ​ពេល៨ខែ ចាប់ពីខែមករា ដល់ខែសីហា ឆ្នាំ២០២៣ កើនឡើងជាង ៤០០ភាគរយ បើធៀបនឹងរយៈពេលដូចគ្នា កាលពីឆ្នាំ ២០២២។​ ដោយមានភ្ញៀវទេសចរបរទេសចំនួនសរុប ៤៩៨,៥១៣នាក់។

នៅខែសីហា ឆ្នាំ២០២៣នេះ គ្រឹះស្ថានអង្គរ រកចំណូលបានចំនួន ២,៧៧៤,៥៨៦ដុល្លារអាមេរិក កើនឡើង ១៥៨​ភាគរយ ដោយមានចូលទស្សនារមណីយដ្ឋានអង្គរ ចំនួន ៥៩,១៤៨នាក់។

ដោយឡែករាជរដ្ឋាភិបាល បានឧបត្ថម្ភមូលនិធិ នៃមន្ទីរពេទ្យគន្ធបុប្ផាកម្ពុជា បានចំនួនសរុប ៩៩៧,០២៦ដុល្លារអាមេរិក ពីចំណែកនៃការលក់បណ្ណ ជូនភ្ញៀវទេសចរបរទេស ចូលទស្សនារមណីយអង្គរ ដើម្បីជួយក្នុងមូលនិធិ សម្រាប់សង្គ្រោះ​ជីវិតកុមារកម្ពុជា។ នេះបើតាមសេចក្ដីប្រកាសព័ត៌មាន របស់គ្រឹះស្ថានអង្គរ នៅថ្ងៃទី ០៤ កញ្ញានេះ៕