លោក ស សុខា ប្រាប់ទូតជប៉ុនថា កិច្ចការសំខាន់របស់ក្រសួងមហាផ្ទៃ គឺប្រយុទ្ធប្រឆាំងគ្រឿងញៀន

លោក ស សុខា ប្រាប់ភាគីជប៉ុន ថា កិច្ចការសំខាន់របស់ក្រសួងមហាផ្ទៃ ក្នុងអាណត្តិថ្មីនេះ គឺការងារប្រយុទ្ធប្រឆាំងគ្រឿងញៀន ការពង្រឹងសុវត្ថិភាពចរាចរណ៍ ការទប់ស្កាត់អំពើចោរកម្ម និងអំពើល្មើសផ្សេងៗទៀត។ លោក ស សុខា លើកឡើងបែបនេះ ក្នុងជំនួបជាមួយលោកឯកអគ្គរាជទូតជប៉ុន កាលពីរសៀលថ្ងៃទី៤ ខែកញ្ញា ឆ្នាំ២០២៣។  

លោក ស សុខា រដ្ឋមន្ត្រីក្រសួងមហាផ្ទៃ បានប្រាប់លោក អូអ៊ីណូ អាស៊ូស៊ី ឯកអគ្គរាជទូតជប៉ុនប្រចាំកម្ពុជា នូវការដាក់ចេញយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា អាណត្តិទី៧នេះ ជាពិសេស កិច្ចការសំខាន់ដែលស្ថិតក្រោមសមត្ថកិច្ចក្រសួងមហាផ្ទៃ គឺការងារប្រយុទ្ធប្រឆាំងគ្រឿងញៀន ពង្រឹងសុវត្ថិភាពចរាចរណ៍ ទប់ស្កាត់អំពើចោរកម្ម ប្រឆាំងការជួញដូរមនុស្ស កេងប្រវ័ញ្ចផ្លូវភេទ ក៏ដូចជា ការពង្រឹងការគ្រប់គ្រងសុវត្ថិភាព និងការពារតាមព្រំដែន។

ក្នុងជំនួបនោះ លោកឯកអគ្គរាជទូតជប៉ុន លើកឡើងថា រដ្ឋាភិបាលជប៉ុន ក៏បានផ្តោតយកចិត្តទុកដាក់ចំពោះយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា ដើម្បីធ្វើយ៉ាងណាផ្សារភ្ជាប់អ្វីដែលជាការគាំទ្ររបស់រដ្ឋាភិបាល និងប្រជាជនជប៉ុន មកលើយុទ្ធសាស្ត្ររបស់រាជរដ្ឋាភិបាលកម្ពុជា។ លោកឯកអគ្គរាជទូត បញ្ជាក់ថា កិច្ចការរបស់ក្រសួងមហាផ្ទៃបានផ្តោត ក៏ស្របទៅនឹងកិច្ចការសមត្ថកិច្ចរបស់នគរបាលជប៉ុន ដែលកិច្ចការនេះនឹងចូលរួមចំណែកក្នុងកិច្ចសហប្រតិបត្តិការរវាងកម្លាំងអនុវត្តច្បាប់នៃប្រទេសទាំងពីរ។

ឆ្លៀតឱកាសនោះ លោកឯកអគ្គរាជទូតជប៉ុន ក៏បានរំលឹកនូវការគាំទ្រជាច្រើនពីសំណាក់សម្ដេចក្រឡាហោម ស ខេង អតីតរដ្ឋមន្ដ្រីក្រសួងមហាផ្ទៃ នាពេលកន្លងមក ជាពិសេស នៅក្នុងការលើកកម្ពស់ទំនាក់ទំនង និងកិច្ចសហប្រតិបត្តិការរវាងជប៉ុន-កម្ពុជា។ លោកសង្ឃឹមថា ការលើកកម្ពស់ទំនាក់ទំនងជិតស្និតនឹងនៅតែបន្តជាមួយលោក ស សុខា ដែលជារដ្ឋមន្ត្រីថ្មី ក្នុងអាណត្តិបន្ដនេះ។

ត្រង់ចំណុចនេះ លោក ស សុខា អះអាងថា ទំនាក់ទំនងរវាងកម្ពុជា-ជប៉ុន បានបន្ដវិវត្តន៍យ៉ាងល្អប្រសើរឥតឈប់ឈរ ជាពិសេសក្នុងរយៈពេល១០ឆ្នាំចុងក្រោយនេះ ពិសេសនោះ គឺក្នុងឆ្នាំនេះ គឺជាខួបទី៧០ឆ្នាំ នៃទំនាក់ទំនងការទូតរវាងប្រទេសទាំងពីរ ដែលក៏ជាពេលវេលាប្រទេសទាំងពីរបន្តពង្រឹងកិច្ចសហប្រតិបត្តិការ រហូតក្លាយជាកិច្ចសហប្រតិបត្តិការគ្រប់ជ្រុងជ្រោយ។

បន្ថែមពីនេះ ភាគីទាំងពីរ ក៏បានពិភាក្សា ព្រមទាំងផ្លាស់ប្តូរយោបល់លើកិច្ចការងារមួយចំនួនទៀតផងដែរ រួមមាន ការបណ្តុះបណ្តាលធនធានមនុស្សរបស់កម្ពុជា ការលើកម្ពស់ការផ្តល់សេវាក្នុងពន្ធនាគារ និងការជំរុញការអភិវឌ្ឍទីក្រុងឆ្លាតវៃ ស្របតាមបរិបទនៃការរីកចម្រើនបច្ចេកវិទ្យាឌីជីថល៕