សំបកកង់ឡានចាស់ៗ ច្នៃធ្វើស្បែកជើងផ្តល់ ចំណូលដល់លោក អៀម គៀម ៦០ ម៉ឺនរៀល ក្នុងមួយថ្ងៃ

មនុស្សជាច្រើន បានបោះបង់ចោលនូវរបស់ដែលប្រើប្រាស់រួចហើយ ដោយមិនស្តោកស្តាយ។ ជាក់ស្តែងដូចជា សំបកកង់ឡានជាដើម នៅពេលដែលគេប្រើប្រាស់ហើយចាស់គេនឹងប្តូរចេញ ហើយសំបកទាំងអស់នេះ ត្រូវបាន បោះបង់ចោល នាំឱ្យប៉ះពាល់ដល់សណ្តាប់ធ្នាប់សាធារណៈ និងបរិស្ថានផងដែរ។

ទោះយ៉ាងណាលោក អៀម គៀម គឺជាមនុស្សម្នាក់ដែលមានគំនិតច្នៃប្រឌិត បានយកសំបកកង់ឡានទាំងនេះ ទៅ កែច្នៃធ្វើជាស្បែកជើងបានច្រើនប្រភេទ មានគុណភាពល្អប្រើប្រាស់បានយូរឆ្នាំ និងមានតម្លៃសមរម្យ។ តាមរយៈ មុខ របរនេះ លោកបានចំណូលសម្រាប់ផ្គត់ផ្គង់ជីវភាព និងមានលទ្ធភាពឱ្យកូនបានបន្តការសិក្សាផងដែរ។

លោក អៀម គៀម បានប្រាប់ឱ្យដឹងថា អស់រយៈពេលជាង​ ៦ ឆ្នាំមកហើយ ដែលលោក បានប្រកបរបរលក់ស្បែកជើង ធ្វើពីសំបកកង់ឡានចល័ត នៅរាជធានីភ្នំពេញ​ ដោយភាគច្រើនលក់ទៅតាមបណ្ដោយផ្លូវជាតិ ក្បែរព្រលានយន្តហោះ ពោធិ៍ចិនតុង។

អ្នកកែច្នៃសំបកកង់ឡានរូបនេះ បានបន្តថា នៅក្នុងមួយថ្ងៃ អាចផលិតស្បែកជើង​ ដែលធ្វើពីសំបកកង់ឡាននេះ នៅក្នុង បរិមាណចន្លោះពី ៣០​​ ទៅ​ ៤០ គូ។ ដោយលោកបានប្រើប្រាស់គ្រឿងម៉ាស៊ីនសម្រាប់កាត់សំបកកង់ឡាន ដើម្បីជំនួយ ក្នុងដំណើរការផលិត​ ឱ្យកាន់តែមានភាពងាយស្រួល និងបង្កើនបរិមាណ​។

លោក បានបន្ថែមទៀតថា សម្រាប់មធ្យោបាយធ្វើដំណើរគឺប្រើប្រាស់រ៉ឺម៉ក ក្នុងការដឹកស្បែកជើងលក់ជារាល់ថ្ងៃ ពីមួយ កន្លែងទៅមួយកន្លែង។ លោកនិយាយទាំងទឹកមុខញញឹមថា ជាមធ្យមអាចលក់បានប្រហែលជាង ៣០ គូ ដោយក្នុង មួយគូមានតម្លៃ ២ ម៉ឺនរៀល និងរកចំណូលបានជាង ៦០ ម៉ឺមរៀលក្នុងមួយថ្ងៃ។

លោកបានលើកឡើងដូច្នេះថា«សម្រាប់ទំហំនៃការលក់ វាមានការកើនឡើង ឬថយចុះ អាស្រ័យទៅតាមបរិបទតម្រូវការ របស់អតិជិជនជាក់ស្ដែង»។

ទោះបីជាមុខរបរមួយនេះ គេមិនសូវឱ្យតម្លៃក៏ពិតមែន ប៉ុន្តែ លោក អៀម គៀម សប្បាយចិត្តក្នុងការចាប់អាជីពនេះ ព្រោះអាចរកចំណូលម្រាប់ផ្គត់ផ្គង់ជីវិតគ្រួសារ ទៅលើការចំណាយប្រចាំថ្ងៃផ្សេងៗ នឹងសម្រាប់កូនរៀន ផងដែរ៕

អត្ថបទ៖ ផល ធារិត