ព័ត៌មានជាតិ

ផ្លូវជាតិលេខ ៧១ សេ កាត់ស្ពានស្ទឹងត្រង់ក្រូចឆ្មារសម្រេចសាងសង់បានជាង ៧០ ភាគរយ

បានផុស

២ ខែ មុន

នៅ

ថ្ងៃសុក្រ ១៥ កញ្ញា ២០២៣

ដោយ

ផ្លូវជាតិលេខ ៧១ សេ ពីស្រុកចំការលើឆ្លងកាត់ស្ពានស្ទឹងត្រង់ក្រូចឆ្មារចាក់ធ្លាយទៅដល់តំបន់រដ្ឋបាលខេត្តត្បូងឃ្មុំ វឌ្ឍនភាពសាងសង់មកដល់ពេលនេះសម្រេចបានជាង ៧០ ភាគរយ។

ផ្តល់សម្ភាសន៍តាមតេឡេក្រាមដល់កម្ពុជាថ្មី លោក ហ៊ាង សុទ្ធាយុត្តិ អគ្គនាយកបច្ចេកវិទ្យានិងទំនាក់ទំនងសាធារណៈ និងជាអ្នកនាំពាក្យក្រសួងសាធារណការនិងដឹកជញ្ជូនបានឲ្យដឹងថា បច្ចុប្បន្នគម្រោងផ្លូវនេះអនុវត្តការសាងសង់បាន៧៣,២៣% ដោយរំពឹងនឹងបញ្ចប់ទាន់ពេលវេលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ៊ាង សុទ្ធាយុត្តិ បានបញ្ជាក់ថា ផ្លូវជាតិលេខ ៧១C មានប្រវែងសរុប ១១៤,៩៩២ គីឡូម៉ែត្រ ចាប់ផ្តើមសាងសង់កាលពីថ្ងៃទី២១ ខែមេសា ឆ្នាំ២០២១ ពីគីឡូម៉ែត្រលេខ ១៥៤+៧០០ ផ្លូវជាតិលេខ ៧ ស្ថិតក្នុងឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ និងបញ្ចប់នៅគីឡូម៉ែត្រលេខ ៣០+៤០០ ផ្លូវជាតិលេខ ៧១ ស្ថិតក្នុងឃុំស្វាយទាប ស្រុកចំការលើ ខេត្តកំពង់ចាម។

គម្រោងផ្លូវនេះមានការសាងសង់ផ្លូវមេប្រវែង ៩២,៤៤៦ គ.ម ទទឹងផ្លូវ ១១ ម៉ែត្រ ក្រាលកៅស៊ូបេតុង (AC) កម្រាស់ ៧ សង់ទីម៉ែត្រ មានកន្លែងសម្រាប់បត់ត្រឡប់ ២ កន្លែង (U-Turn) ផ្លូវតភ្ជាប់មានប្រវែង ១៥,៨២១ គ.ម ទទឹងផ្លូវ ១១ ម៉ែត្រ ក្រាលកៅស៊ូបេតុង (AC) កម្រាស់ ៧ សង់ទីម៉ែត្រ ផ្លូវខ្នែងចំនួន ៩ ខ្សែ ប្រវែង ៦,៣៥៣ គ.ម ទទឹងតួផ្លូវ ៩ ម៉ែត្រ ក្រាលកៅស៊ូពីរស្រទាប់ស្តើង (DBST) ស្ពានចំនួន ១១ កន្លែង ប្រវែង ៨៧៥ មែត្រ និងដាក់លូគ្រប់ប្រភេទចំនួន២០២ កន្លែង។

បើតាមមន្រ្តីក្រសួងសាធារណការ ផ្លូវនេះគ្រោងប្រើប្រាស់រយៈពេលសាងសង់ ៤២ ខែ ដោយចំណាយថវិកាប្រមាណ ១២៩,៩៨ លានដុល្លារអាមេរិក។

លោក ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំលើកឡើងនៅក្នុងសន្និសីទជោគជ័យរបស់រដ្ឋបាលខេត្តត្បូងឃ្មុំកាលពីថ្ងៃ ២០ ខែ មេសា ឆ្នាំ ២០២៣ ថា ផ្លូវជាតិលេខ ៧១ សេ នៅពេលសាងសង់រួចរាល់នឹងចំណេញពេលវេលាច្រើនណាស់។

លោកអះអាងថា តាមរយៈផ្លូវជាតិលេខ ៧១ សេ បើធ្វើដំណើរពីស្ពានស្ទឹងត្រង់ក្រូចឆ្មារទៅបុរីរដ្ឋបាលខេត្តមានចម្ងាយតែជាង ៦៥ គីឡូម៉ែត្រ។ តែបើធ្វើដំណើរពីសួងឆ្លងកាត់ទៅរកាករ ៥ ទៅឈូក ទៅស្ទឹងត្រង់ក្រូចឆ្មារមានចម្ងាយដល់ជាង ៨៥ គីឡូម៉ែត្រអីចឹងទេគឺចំណេញពេលច្រើនតាមរយៈផ្លូវជាតិលេខ ៧១ សេនេះ៕