ព័ត៌មានជាតិ

រដ្ឋបាលខេត្តបាត់ដំបង រៀបចំទូងស្គរអបអរការដាក់បញ្ចូល”រមណីយដ្ឋានប្រាសាទកោះកេរ” ទៅក្នុងបញ្ជីបេតិកភណ្ឌពិភពលោក

បានផុស

៣ years មុន

នៅ

ថ្ងៃពុធ ២០ កញ្ញា ២០២៣

ដោយ

នៅព្រឹកថ្ងៃទី ២០ ខែកញ្ញា ឆ្នាំ ២០២៣ នេះ រដ្ឋបាលខេត្តបាត់ដំបង ដោយអនុវត្តតាមការណែនាំរបស់ប្រមុខ នៃរាជរដ្ឋាភិបាលកម្ពុជា បានរៀបចំ វាយគង ជួង រគាំង ទូងស្គរ និងគោះត្រដោក តាមវត្តអារាម មណ្ឌលវិបស្សនា អាស្រម សាលាបុណ្យ វិហារសាសនា ស្នាក់ការ ស៊ូរ៉ាវ សាលារៀនមានចរិតសាសនាផ្សេងៗ រួមទាំងមន្ទីរធម្មការ និងសាសនា ដើម្បីចូលរួមអបអរសាទរទិវាជាប្រវត្តិសាស្ត្រ ដែលគណៈកម្មាធិការបេតិកភណ្ឌពិភពលោក នៃអង្គការយូណេស្កូ បានសម្រេចជាឯកច្ឆន្ទចុះ “រមណីយដ្ឋានប្រាសាទកោះកេរ” ទៅក្នុងបញ្ជីបេតិកភណ្ឌពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអបអរសាទរទិវាជាប្រវត្តិសាស្ត្រ ដែលគណៈកម្មាធិការបេតិកភណ្ឌពិភពលោក នៃអង្គការយូណេស្កូ បានសម្រេចជាឯកច្ឆន្ទចុះ “រមណីយដ្ឋានប្រាសាទកោះកេរ” ទៅក្នុងបញ្ជីបេតិកភណ្ឌពិភពលោក កាលពីថ្ងៃទី ១៧ ខែកញ្ញា ឆ្នាំ ២០២៣ ក្រសួង សូមឲ្យប្រធានមន្ទីរធម្មការ និងសាសនា រាជធានី ខេត្ត សហការឲ្យបានជិតស្និទ្ធបំផុតជាមួយ ព្រះមេគណ ព្រះអនុគណ ព្រះចៅអធិការ និងថ្នាក់ដឹកនាំសាសនាផ្សេងៗ ទូទាំងព្រះរាជាណាចក្រកម្ពុជា ត្រៀមរៀបចំវាយគង ជួង រគាំង ទូងស្គរ និង គោះត្រដោក តាមគ្រប់មធ្យោបាយដែលខ្លួនមាន នៅថ្ងៃពុធ ៦ កើត ខែភទ្របទ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី ២០ ខែកញ្ញា ឆ្នាំ ២០២៣ នេះ វេលាម៉ោង ៧ និង ០០ នាទីព្រឹក ឲ្យបានព្រមៗ គ្នា។

ជាមួយនោះ ក្នុងបរិវេណសាលាខេត្តបាត់ដំបង ក៏មានរៀបចំតាមលក្ខណៈប្រពៃណីខ្មែរដែរ ក្រោមការចូលរួមពីលោក សុខ លូ អភិបាលខេត្ត លោក អ៊ុយ រី ប្រធានក្រុមប្រឹក្សាខេត្ត ស្នងការមេបញ្ជាការ កងរាជអាវុធហត្ថ និងប្រធានមន្ទីរនានាជុំវិញខេត្ត ព្រមទាំងមានក្រុមរបាំឆៃយ៉ាំផងដែរ ដើម្បីចូលរួមអបអរសាទរការដាក់បញ្ចូល “រមណីយដ្ឋានប្រាសាទកោះកេរ” ចូលទៅក្នុងបញ្ជីបេតិកភណ្ឌពិភពលោក”៕

អត្ថបទ ៖ សោ និយមរ័ត្ន