អ្នកឧកញ៉ា លឹម ហេង ៖ សង្គ្រាមពាណិជ្ជកម្មរវាង​អាមេរិក និងចិន ជាឱកាសសម្រាប់កម្ពុជា

សង្រ្គាមពាណិជ្ជកម្មរវាងមហាអំណាចអាមេរិក និងចិន កំពុងដំឡើងពន្ធដាក់គ្នា ជាឱ្យកាសសម្រាប់ក្រុមហ៊ុន​បរទេសចូល​មកវិនិយោគនៅកកម្ពុជា ដើម្បីនាំចេញទៅទីផ្សារសហរដ្ឋអាមេរិក។ នេះជាការបញ្ជាក់របស់អ្នកឧកញ៉ា លឹម ហេង អនុប្រធាន​សភាពាណិជ្ជកម្មកម្ពុជា។

អ្នកឧកញ៉ា លឹម ហេង បានបន្តទៀតថា បើទោះបីជាសព្វថ្ងៃនេះប្រព័ន្ធអនុគ្រោះពន្ធ GSP ត្រូវបានព្យួរយ៉ាងណាក្តី ពាណិជ្ជកម្មកម្ពុជា-អាមេរិក នៅមានស្ថានភាពល្អប្រសើរ ដោយសារកម្ពុជា ជាសមាជិកអង្គការពាណិជ្ជកម្មពិភពលោក ដូច្នេះនៅមានភាពអនុគ្រោះពន្ធ MFN ធ្វើឱ្យការនាំចេញពីកម្ពុជា ទៅអាមេរិក បង់ពន្ធនៅមានកម្រិតទាប ដែលអាច​ប្រកួតប្រជែងជាមួយបណ្តាប្រទេសផ្សេងៗនាំចេញទៅអាមេរិក។

អ្នកឧកញ៉ា លឹម ហេង កត់សម្គាល់ឃើញថា ក្រុមហ៊ុនអាមេរិកដែលចូលមកកម្ពុជា ភាគច្រើនវិនិយោគ​វិស័យឧស្សា​ហកម្ម និងសណ្ឋាគារ ដែលជាផ្នែកសំខាន់សម្រាប់កម្ពុជា។ អ្នកឧកញ៉ា បានបន្តដូច្នេះថា« ខ្ញុំមើលឃើញថា វិស័យទាំងអស់នេះល្អ ជួយទ្រទ្រង់កំណើនសេដ្ឋកិច្ចជាតិយើង»។

ទន្ទឹមនឹងនេះ អ្នកឧកញ៉ា បានជំរុញដល់ក្រុមហ៊ុនវិនិយោគទៅលើឧស្សាហកម្មកែច្នៃកសិកម្ម ដែលជាវិស័យ​មានសក្តានុពលរបស់កម្ពុជា ដើម្បីកែច្នៃសម្រាប់នាំចេញទៅទីផ្សារអាមេរិកផងដែរ។

អនុប្រធានសភាណាពិជ្ជកម្ម មានសុទិដ្ឋិយមថា ក្រោយដំណើរទស្សនកិច្ចរបស់សម្តេច ហ៊ុន ម៉ាណែត និងការពិព័រ​ណ៍ខែ វិច្ឆិកា នៅទីក្រុងឡុងប៊ិច បង្ហាញពីផលិតផលកសិកម្មរបស់កម្ពុជា ខាងមុខនេះ នឹងអាចទាក់ទាញ​បានអ្នកវិនិ​យោគពីអាមេរិក និងបណ្តាប្រទេសផ្សេងៗ ជាពិសេសចិន ចូលមកវិនិយោគផ្នែកកសិកម្ម ឧស្សាហកម្ម ដើម្បីកែច្នៃ​សម្រាប់​នាំចេញទៅទីផ្សារអាមេរិក ខណៈដែលកម្ពុជា សម្បូរទៅដោយវត្ថុធាតុដើម។

កម្ពុជា គឺជាប្រទេសដែលរក្សាបានសុខសន្តិភាពសុវត្ថិភាព សម្រាប់អ្នកវិនិយោគបរទេសចូល​មកកម្ពុជា និងជាឱកាស​សម្រាប់អ្នកផលិតក្នុងស្រុកសម្រាប់នាំចេញផងដែរ។

ក្រោយពីរាជរដ្ឋាភិបាល បានគ្រប់គ្រង​ការរីករាលដាលជំងឺកូវីដ-១៩ ដោយជោគជ័យ បានបើកដំណើរការ​ទីផ្សារ​ឡើងវិញទាំងអស់លើគ្រប់វិស័យ និងបានដាក់​ឱ្យអនុវត្តនូវច្បាប់វិនិយោគថ្មី ដែលជាភាពទាក់ទាញ និងមានការ​ចាប់អារម្មណ៍ខ្លាំងពីអ្នកវិនិយោគបរទេស។ លើសពី​នេះទៀត កម្ពុជា បាននិងកំពុងអនុវត្តកិច្ចព្រមព្រៀម​សេរីពា​ណិជ្ជកម្មកម្ពុជា ចិន​​។ ទន្ទឹមគ្នានេះ ក៏មានកិច្ចព្រម​ព្រៀងជា​មួយ​កូរ៉េ និងអាសិប ដែលជាឱកាស​ទាក់ទាញ​អ្នកវិនិយោគផលិតនៅក្នុងស្រុក ដើម្បីធ្វើការនាំចេញទៅទីផ្សារអាមេរិក​។

សូមបញ្ជាក់ថា រយៈពេល៨ខែ ឆ្នាំ២០២៣នេះ ទំហំពាណិជ្ជកម្មកម្ពុជា-អាមេរិក សម្រេចបានជាង ៦ ២៧២លានដុល្លារ ថយចុះ៥.៦% បើប្រៀបធៀបនឹងរយៈពេលដូចគ្នា នៅឆ្នាំ២០២២ មានចំនួន ៦ ៦៤៥លានដុល្លារ។ នេះបើយោង​តាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា។

របាយការណ៍ដដែលបញ្ជាក់ថា រយៈពេល៨ខែ ឆ្នាំ២០២៣នេះ កម្ពុជាបាននាំចេញទៅអាមេរិក ក្នុងទំហំទឹកប្រាក់ជាង ៦ ១១១លានដុល្លារ ខណៈការនាំចូលពីអាមេរិកវិញ ក្នុងទំហំទឹកប្រាក់ជាង ១៦០លានដុល្លារ៕