អាជ្ញាធរខណ្ឌច្បារអំពៅ ណែនាំឱ្យម្ចាស់គោបញ្ឈប់ការលែង​សត្វចិញ្ចឹមលើផ្លូវសាធារណៈ

លោក ងឹន ធីរ៉ូ ចៅសង្កាត់ព្រែកប្រា បានប្រាប់កម្ពុជាថ្មីថា លោកបានចាត់ឲ្យមន្ត្រីអាជ្ញាធរតាមបណ្តាភូមិឲ្យចុះទៅណែនាំ និងធ្វើកិច្ចសន្យាឲ្យម្ចាស់សត្វគោដែលធ្លាប់តែលែងឲ្យដើរស៊ីស្មៅពាសវាលពាសកាល តាមដងផ្លូវ និងតាមផ្ទះ​ប្រជា​ពលរដ្ឋ​នាំ​ឲ្យគ្រោះថ្នាក់ចរាចរណ៍ បង្កឱ្យបាត់បង់សោភ័ណភាពទីក្រុង។

លោក ងឹន ធីរ៉ូ បានបន្តថា ការចុះណែនាំដល់ម្ចាស់គោនេះ អនុវត្តតាមការណែនាំពីលោក ចេង មុនីរ៉ា អភិបាល​ខណ្ឌច្បារអំពៅ ដែលតែងណែនាំដល់បណ្តាសង្កាត់ទាំង៨ឲ្យរឹតបន្តឹងទៅលើម្ចាស់សត្វគោ ដែលប្រលែង​ឲ្យដើរស៊ី​ស្មៅពាសវាលពាសកាលបង្កឲ្យគ្រោះថ្នាក់ដល់អ្នកដំណើរ ពិសេសជាងនេះ សត្វគោទាំងនោះ​តែងតែដើរជជុះ​ស្បោងសំរាមតាមផ្លូវធ្វើឲ្យរប៉ាត់រប៉ាយសំរាមជះក្លឹនស្អុយដល់អ្នកដំណើរទៀតផង។

លោកចៅសង្កាត់ព្រែកប្រា បានណែនាំឲ្យម្ចាស់គោត្រូវតាមគង្វាលសត្វគោរបស់ខ្លួនមិនអនុញាតិឲ្យប្រលែង​ចោលដូចមុនទៀតឡើយ៕

អត្ថបទ ៖​ នរា