ផុត​ឱសានវាទ អាជ្ញាធរក្រុងកំពតចុះរុះរើសំណង់​សាងសង់​​លើដីចំណី​ឆ្នេរ​ព្រែកកំពង់បាយ

កាលពីថ្ងៃទី ២ ខែតុលារហូតដល់ថ្ងៃទី ៣ ខែតុលា ឆ្នាំ២០២៣ លោក លាង រឿនសុធី អភិបាលក្រុងកំពតបានដឹកនាំ​កង​កម្លាំងគណ:បញ្ជាការឯកភាពរដ្ឋបាលក្រុងកំពត ចុះរុះរើសំណង់មិន​រៀបរយនៅលើដីចំណី​ឆ្នេរ​ព្រែកកំពង់បាយ​នៅផ្នែក​ត្រើយខាងលិច ដែលស្ថិតក្នុងភូមិសាស្ត្រសង្កាត់អណ្ដូងខ្មែរ បន្ទាប់ពីឱសានវាទនៃសេចក្តីជូនដំណឹងបានចូលមក​ដល់​។

​

ជំហានដំបូង រដ្ឋបាលក្រុងកំពតចាប់ផ្តើមអនុវត្តចាប់ពីចំណុចគល់​ស្ពានឥន្ទធនូរហូតដល់ស្ពានត្រើយកោះ ស្ថិតនៅក្នុងទឹកដីភូមិទ្វីខាងត្បូង សង្កាត់អណ្តូងខ្មែរ ក្រុងកំពត។

ជំហានបន្តបន្ទាប់ រដ្ឋបាលក្រុងនឹងអនុវត្តចាប់ពីចំណុចគល់​ស្ពានថ្នល់រថភ្លើងរហូតដល់ស្ពានឥន្ទធនូ ដែលស្ថិតនៅក្នុងភូមិទ្វីខាងជើង សង្កាត់អណ្តូងខ្មែរក្រុងកំពតបន្តទៀត។

សូមរំលឹកផងដែរថា ខណ:មន្ត្រីជំនាញចុះវាស់វែងកំណត់ទីតាំង ដើម្បីស្ថាបនាជាសមិទ្ធផលថ្មីនៅលើដីឆ្នេរព្រែកកំពង់បាយនៅផ្នែកត្រើយខាងលិច ពលរដ្ឋបានធ្វើ​កិច្ចសន្យា​ដោយ​ព្រមរុះរើដោយខ្លួនឯង ដោយកំណត់ត្រឹមថ្ងៃទី៣០ ខែកញ្ញា ឆ្នាំ២០២៣នេះ។

ក្រោយពីការរុះរើសំណង់រួចរាល់ រដ្ឋបាលខេត្តនឹងចាប់អនុវត្តគម្រោងកែលម្អសោភ័ណភាពដោយស្ថាបនាផ្លូវមួយខ្សែ និងរៀបច្រាំងព្រែកពីចំណុចគល់​ស្ពានរថភ្លើងរហូតដល់ស្ពានត្រើយកោះ ដើម្បីបំរើឱ្យវិស័យទេសចរណ៍ជាតិនិងអន្តរជាតិ គឺដើម្បីទុកសម្រាប់ជាប្រយោជន៍រួមទាំងអស់គ្នារបស់ពលរដ្ឋនៅក្នុងខេត្ត។

អត្ថបទ៖ សឹង រ៉ាត់