បាក់ស្រុត​ផ្លូវក្រវ៉ាត់ព្រំដែន​ចំណុច​ច្រក ៤០០ អស់​ជិត ១០ ម៉ែត្រ​ ក្រោយ​​ភ្លៀង​មួយមេធំ

កាលពីថ្ងៃទី២ ខែតុលាម្សិលមិញ ធ្លាក់ភ្លៀង ១ មេធំ​ ធ្វើឲ្យបាក់ស្រុតផ្លូវក្រវ៉ាត់ព្រំដែន​ត្រង់​ចំណុចច្រក ៤០០ ក្នុងស្រុក​សំឡូង​ខេត្ត​បាត់ដំបង ដែល​​បង្កដោយគ្រោះធម្មជាតិ។

មន្ត្រីយោធាការពារព្រំដែនលេខ ៥០២ បានឲ្យដឹងថា កាលពីថ្ងៃទី ២ ខែតុលា ម្សិលមិញធ្លាក់ភ្លៀងខ្លាំងរួមខ្យល់កន្ត្រាក់បោកបក់​ផងបានបង្កឲ្យ​បាក់ស្រុត​ផ្លូវ​ប្រវែង​ជាង ៨ ម៉ែត្រ​ និងរលំដើមឈើ​ប្រប​មក​លើផ្លូវ​ផង​ដែរ។

ប្រភពដដែលបន្តថា ផ្លូវក្រវ៉ាត់ព្រំដែនមួយខ្សែដែលបានខូចខាតដោយគ្រោះធម្មជាតិបង្កឲ្យបាក់ស្រុត​នេះ កើតឡើងត្រង់ ចំណុចច្រក ៤០០ នៃព្រំដែនកម្ពុជាថៃ ស្ថិត​ក្នុង ភូមិឆករកា ឃុំឆករការ ស្រុកសំឡូត ខេត្ត​បាត់ដំបង។ ផ្លូវមួយខ្សែនេះតភ្ជាប់ពីខេត្តពោធិ៍សាត់រហូតដល់ព្រំប្រទល់ខេត្តប៉ៃលិន ហើយបច្ចុប្បន្នកម្លាំងកំពុងចុះពិនិត្យលើទីតាំងផ្សេងៗទៀតរួមទាំង​នៅតាមលំនៅដ្ឋានរបស់ប្រជាពលរដ្ឋផងក្រែងមានផលប៉ះពាល់ទៅលើប្រការណាមួយ។

ប្រភពពីអាជ្ញាធរ​បាន​បញ្ជាក់ថា ជំនន់ទឹកភ្លៀងមិនទាន់បានបង្កឲ្យប៉ះពាល់ដល់ក្នុងភូមិនៅឡើយ ប៉ុន្តែបើសិនជា​មានភ្លៀងធ្លាក់​បន្តទៀតនឹងអាចឈានដល់ការលិចលង់តាមភូមិ ព្រោះទឹកបានឡើងព្រៀបតាមដងស្ទឹងអស់ហើយ។ ចំពោះមុខកម្លាំង​ការពារព្រំដែននិងអាជ្ញាធរបានឲ្យប្រជាពលរដ្ឋមានការប្រុងប្រយ័ត្នក៏ដូចជាត្រៀមលក្ខណះជាមុន បើសិនជាមានភ្លៀងបន្តធ្លាក់នឹងមានទឹកហក់ឡើងនៅក្នុងយប់នេះ៕

អត្ថបទ៖ សៅ សារិទ្ធ