ជម្លៀស​អ្នក​ជំងឺ​ចេញពី​មន្ទីរពេទ្យស្រុកស្វាយចេក ដោយសារជំនន់ទឹកភ្លៀងជន់លិច

អភិបាលខេត្តបន្ទាយមានជ័យ លោកអ៊ុំ រាត្រី នៅព្រលប់ថ្ងៃទី ៣ តុលា ២០២៣ បានដឹកនាំកងកម្លាំង រួមមានកងពលតូចថ្មើរជើងលេខ៥១ ស្នងការដ្ឋាននគរបាលខេត្ត កងរាជអាវុធហត្ថខេត្ត តំបន់ប្រតិបត្តិការសឹករងខេត្ត និងលោកប្រធានមន្ទីរសុខាភិបាលខេត្ត និងលោកអភិបាលរងស្រុក​ចុះពិនិត្យស្ថានភាពជំនន់ទឹកភ្លៀងក្នុងមន្ទីរពេទ្យបង្អែកស្រុកស្វាយចេក និង​ជម្លៀសអ្នកជម្ងឺរកកន្លែងមានសុវត្ថិភាព។

ការចុះពិនិត្យនិងដោះស្រាយភ្លាមៗនោះ លោកក៍បានសូមបងប្អូនប្រជាពលរដ្ឋដែលរស់នៅក្បែរដងស្ទឹងនិងកន្លែងដែលមានហានិភ័យមេត្តាប្រុងប្រយ័ត្នខ្ពស់ ប្រសិនបើមានករណីចាំបាច់សូមរាយការណ៍ជាបន្ទាន់មកអាជ្ញាធរមានសមត្ថកិច្ច និងកងកម្លាំង។

គួរបញ្ជាក់ថា ដោយសារប៉ុន្មានថ្ងៃនេះមានភ្លៀងធ្លាក់ជាប់គ្នាទាំងថ្ងៃនឹងយប់ធ្វើអោយតំបន់ខ្លះត្រូវជនលិចផ្លូវដោយសារទឹកហូរមិនទាន់តាមប្រព័ន្ធលូដែលស្ទះដូចជានៅក្រុងប៉ោប៉ែតនិងនៅតាមដងស្ទឹង។ជាក់ស្តែងថ្មីនេះម្នទីរពេទ្យបង្អែកស្រុកស្វាយចេកដែលនៅជិតស្ទឹងត្រូវបានទឹកជំនន់ជនលិច៕

អត្ថបទ៖ អពៅ