ព័ត៌មានជាតិ

ខេត្តបន្ទាយមានជ័យតវ៉ាទៅខេត្តស្រះកែវប្រទេសថៃឱ្យចេះគោរពច្បាប់ដែលខ្លួនសន្យា

បានផុស

១១ ខែ មុន

នៅ

ថ្ងៃព្រហស្បតិ៍ ៤ កញ្ញា ២០២៥

ដោយ

បន្ទាយមានជ័យ៖ អភិបាលខេត្តបន្ទាយមានជ័យលោក អ៊ុំ រាត្រី បានផ្ញើលិខិតតវ៉ាទៅអភិបាលខេត្តស្រះកែវប្រទេសថៃ ឱ្យស្គាល់និងគោរពច្បាប់ទម្លាប់ គោរពការសន្យារស់ខ្លួនទាក់ទងនឹងព្រំដែនកម្ពុជា-ថៃ បន្ទាប់ពីរដ្ឋបាលខេត្តស្រះកែវចុះវាស់វែងដីឈ្លានពានដេញពលរដ្ឋខ្មែរចេញពីភូមិជោគជ័យឱ្យពលរដ្ឋរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងលិខិតចុះថ្ងៃទី២ ខែកញ្ញា ឆ្នាំ២០២៥ លោក អ៊ុំ រាត្រី បានបញ្ជាក់ទៅអភិបាលខេត្តស្រះកែវថា ថៃកំពុងធ្វើសកម្មភាពបំពានដល់អនុសារៈយោគយល់គ្នាឆ្នាំ២០០០ កិច្ចព្រមព្រៀងបទឈប់បាញ់ និងស្មារតីនៃកិច្ចប្រជុំវិសាមញ្ញនៃគណៈកម្មាធិកា ព្រំដែនទូទៅកម្ពុជា-ថៃ(GBC) និងកិច្ចប្រជុំគណៈកម្មាធិការព្រំដែនថ្នាក់យោធភូមិភាគ (RBC) រវាងប្រទេសទាំងពីរហើយ។

លោកបញ្ជាក់ថា៖ «បញ្ហាខាងលើគឺជាបញ្ហាពាក់ព័ន្ធនឹងការគ្រប់គ្រងព្រំដែន និងការងារវាស់វែង ខណ្ឌសីមានិងបោះបង្គោលព្រំដែន ដែលជាសមត្ថកិច្ចរបស់គណៈកម្មាធិការព្រំដែន ទូទៅកម្ពុជា-ថៃ (GBC) និងគណៈកម្មការចម្រុះខណ្ឌសីមាព្រំដែនគោក (JBC) នៃប្រទេសទាំងពីរ កម្ពុជា-ថៃ ស្របតាមកិច្ចព្រមព្រៀងស្តីពីកិច្ចសហប្រតិបត្តិការព្រំដែន ចុះថ្ងៃទី២៩ ខែកញ្ញា ឆ្នាំ១៩៩៥ និងអនុស្សរណៈនៃការយោគយល់គ្នា ស្តីពីការវាស់វែង ខណ្ឌសីមាព្រំដែនគោកកម្ពុជា-ថៃ ឆ្នាំ២០០០ (MOU ២០០០)»។

លោកអភិបាលខេត្តបានប្រាប់ទៅអភិបាលខេត្តស្រះកែវឱ្យរក្សាក្សាស្ថានភាពព្រំដែន និងស្ថានភាពប្រជាជនកំពុងរស់នាពេលបច្ចុប្បន្ន ហើយទុកកិច្ចការងារនេះជូនទៅ GBC និង JBC ដែលជាយន្តការមានសមត្ថកិច្ចក្នុងការដោះបញ្ហានេះ។

ការតវ៉ារបស់អភិបាលខេត្តបន្ទាយមានជ័យនេះគឺបន្ទាប់ពីអភិបាលខេត្តស្រះកែវប្រទេសថៃលោក បរិញ្ញា ពោធិ៍សាត់ បានប្រកាសកាលពីថ្ងៃច័ន្ទ ទី១ ខែកញ្ញា ឱ្យពលរដ្ឋថៃទៅយកដីដែលថៃឈ្លានពានយកនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យដែលជាការបំពានលើកិច្ចព្រមព្រៀងនៃបទឈប់បាញ់ MOU ឆ្នាំ២០០០ និងសិទ្ធិមនុស្សយ៉ាងធ្ងន់ធ្ងរ៕