ព័ត៌មានជាតិ

អភិបាលខេត្តឧត្ដរមានជ័យព្រមានចាត់វិធានការដល់ពលករណាមិនព្រមធ្វើចត្តាឡីស័ក

បានផុស

៥ years មុន

នៅ

ថ្ងៃសុក្រ ៥ កុម្ភៈ ២០២១

ដោយ

លោក ប៉ែន កុសល្យ អភិបាលនៃគណៈអភិបាលខេត្តឧត្តរមានជ័យបានធ្វើការព្រមានផាកពិន័យនិងដាក់ទោសព្រហ្មទណ្ឌដល់ពលករទាំងឡាយណាដែលរត់គេចវេសមិនព្រមធ្វើចត្តាឡីស័ក។

ថ្លែងក្នុងឱកាសចុះសំណេះសំណាលជាមួយបងប្អូនពលករមកពីថៃតាមច្រកទ្វារព្រំដែនអន្តរជាតិអូរស្មាច់ លោកបានមានប្រសាសន៍ថា ការធ្វើចត្តាឡីស័ករយៈពេល១៤ថ្ងៃតាមការណែនាំរបស់ប្រមុខរាជរដ្ឋាភិបាលកម្ពុជា មានសារៈសំខាន់ណាស់ដើម្បីទប់ស្កាត់ការចម្លងជំងឺកូវីដ-១៩ចូលក្នុងសហគមន៍។

លោកបានបន្តទៀតថា ចំពោះការធ្វើចត្តាឡីស័ករយៈពេល១៤ថ្ងៃនេះដែរ រដ្ឋបាលខេត្ត ក៏បានយកចិត្តទុកដាក់ចំពោះការផ្គត់ផ្គង់នូវការស្នាក់នៅ ចំណីអាហារ និងសម្ភារៈប្រើប្រាស់មួយចំនួនជូនបងប្អូនពលករផងដែរ។

លោកអភិបាលខេត្តបានបន្ថែមថា «ប្រសិនបើបុគ្គលណាមិនគោរពតាមវិធានការ របស់ក្រសួងសុខាភិបាល ដោយធ្វើចត្តាឡីស័ក១៤ថ្ងៃ ឬរត់ចេញ ឬគេចវេសពីការធ្វើចត្តាឡីស័ក នឹងត្រូវផាកពិន័យចាប់ពី២០០,០០០រៀល ទៅ១,០០០,០០០ រៀល និងត្រូវមានទោសព្រហ្មទណ្ឌផងដែរ»។

លោកអភិបាលខេត្តបានអំពាវនាវឲ្យបងប្អូនពលករ រួមគ្នាការពារជំងឺកូវីដ១៩កុំឱ្យមានការចម្លងដល់បងប្អូនក្រុមគ្រួសារ ក៏ដូចជាសហគមន៍។

ដោយសារចំនួនពលករមកពីថៃចូលតាមច្រកអូរស្មាច់មានការកើនឡើងនោះ អាជ្ញាធរខេត្តឧត្តរមានជ័យបានសម្រេចយកទីតាំងពហុកីឡដ្ឋានខេត្តធ្វើជាមណ្ឌលចត្តាឡីស័កមួយទៀតដោយរៀបចំដំឡើងតង់ចំនួន១០០ និងបង្គន់ចំនួន៣៣ និងបានរៀបចំប្រព័ន្ធទឹកភ្លើងខណៈបច្ចុប្បន្នខេត្តមានមណ្ឌលចត្តាឡីស័កប្រមាណជិត២០កន្លែង។

គួរបញ្ជាក់ថា បច្ចុប្បន្ននេះមានពលករកំពុងធ្វើចត្តាឡីស័កសរុបចំនួន២,៧៨០នាក់ ដែលកំពុងប្រើប្រាស់មណ្ឌលចត្តាឡីស័កចំនួន១៩មណ្ឌលនៅទូទាំងខេត្តឧត្ដរមានជ័យ៕

អត្ថបទ ៖ សំអឿន