លោកស្រី អ៊ឹង កន្ថាផាវី និងអ្នកជំនាញ ស្នើឱ្យពលរដ្ឋទៅពិនិត្យភ្នែកឱ្យបានទាន់ពេលវេលា

រដ្ឋមន្ត្រីក្រសួងកិច្ចការនារី លោកស្រី អ៉ឹង កន្ថាផាវី លោកវេជ្ជបណ្ឌិត ងី ម៉េង ប្រធានមន្ទីរពេទ្យមិត្តភាពខ្មែរ-សូវៀត និងព្រះភិក្ខុវជិរប្បញ្ញោ គូ សុភាព បានស្នើនៅក្នុងវីដេអូមួយផ្សព្វផ្សាយដោយក្រសួងកិច្ចការនារី នៅថ្ងៃទី១៦ ខែតុលា ដល់ប្រជាជនគ្រប់រូបយកចិត្តទុកដាក់ទៅពិនិត្យព្យាបាលភ្នែករបស់ខ្លួនឱ្យបានទាន់ពេលវេលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្នើនៅក្នុងឃ្លីបវីដេអូរបស់អ្នកជំនាញ និងព្រះអង្គខាងលើ នៅក្នុងឱកាសអបអរសាទរទិវាសុខភាពភ្នែកពិភពលោក ២០២៣។ ជាក់ស្តែង ជំងឺក្រហម ឬ រលាកភ្នែកតែងតែកើតឡើងនៅក្នុងប្រទេសកម្ពុជា ជាហេតុត្រូវមានការប្រុងប្រយ័ត្ន និងគួរយកចិត្តទុកដាក់ខ្ពស់ពីសុខភាពភ្នែករបស់ខ្លួនឱ្យបានល្អ និងទាន់ពេលវេលា ព្រោះថា ភ្នែកមានសារសំខាន់ណាស់សម្រាប់មនុស្សគ្រប់រូប មិនអាចធ្វេសប្រហែសបាននោះទេ។

លោកស្រី អ៉ឹង កន្ថាផាវី រដ្ឋមន្ត្រីក្រសួងកិច្ចការនារី បានលើកឡើងថា សុខភាពភ្នែកមានសារសំខាន់សម្រាប់ប្រជាជនគ្រប់រូប ជាពិសេសស្ត្រី ដែលមានអត្រាពិការភ្នែកចាប់ពីអាយុ ៥០ឆ្នាំឡើង និងមានអត្រាពិការភ្នែកច្រើនជាងបុរសដល់ទៅ ២ដង។ លោកស្រីបញ្ជាក់ថា៖ “ខ្ញុំសូមអំពាវនាវ សូមឱ្យទៅទទួលពិនិត្យភ្នែកឱ្យបានរួសរាន់ទាន់ពេលវេលា”។

ជាមួយគ្នានេះ លោកវេជ្ជបណ្ឌិត ងី ម៉េង ប្រធានមន្ទីរពេទ្យមិត្តខ្មែរ-សូវៀត និងជាអ្នកឯកទេសភ្នែកមួយរូប ក៏បានលើកឡើងដែរថា ប្រសិនបើភ្នែកមានបញ្ហា ពលរដ្ឋគ្រប់រូបត្រូវទៅពិនិត្យ និងទទួលការព្យាបាលជាមួយនឹងគ្រូពេទ្យជំនាញផ្នែកភ្នែកឱ្យបានទាន់ពេលវេលា។

ក្រៅពីអ្នកជំនាញទាំង២រូបខាងលើ ព្រះភិក្ខុវជិរប្បញ្ញោ គូ សុភាព មានថេរដីកាថា ពលរដ្ឋគ្រប់រូបត្រូវយកចិត្តទុកដាក់ថែរក្សាសុខភាពភ្នែកឱ្យបានល្អ និងទាន់ពេលវេលា ដើម្បីចៀសវាងមានបញ្ហានៅពេលក្រោយ ប៉ះពាល់ដល់សុខភាព​ និងថវិកា ជាពិសេសចំពោះស្ត្រីជាមេផ្ទះតែម្តង។

សូមជម្រាបថា ចាប់តាំងពីឆ្នាំ២០០០មក អង្គការសុខភាពពិភពលោក សហការជាមួយទីភ្នាក់ងារអន្តរជាតិសម្រាប់បង្ការភាពពិការភ្នែក បានរៀបចំទិវាសុខភាពភ្នែកពិភពលោក នៅថ្ងៃព្រហស្បតិ៍សប្តាហ៍ទី២ ក្នុងខែតុលាជារៀងរាល់ឆ្នាំ។ គោលបំណងនៃការរៀបចំវេទិកានេះ ដើម្បីលើកកម្ពស់ការយល់ដឹងពីសុខភាពភ្នែក ការថែរក្សា និងការពារសុខភាពភ្នែកឱ្យបានទូលំទូលាយដល់ប្រជាជន។ កម្ពុជា ក៏បានចូលរួមក្នុងវេទិកានេះជារៀងរាល់ឆ្នាំផងដែរ ក្នុងការលើកកម្ពស់សុខភាពភ្នែកដល់ប្រជាជន៕