ព័ត៌មានជាតិ

បុគ្គលិកក្រុមហ៊ុនទេសចរណ៍មួយលើកមូលហេតុសំបុត្រយន្តហោះក្នុងស្រុកថ្លៃជាងសំបុត្រទៅក្រៅប្រទេស

បានផុស

៣ years មុន

នៅ

ថ្ងៃពុធ ១៨ តុលា ២០២៣

ដោយ

តម្លៃសំបុត្រយន្តហោះក្នុងស្រុកមួយជើងអាចចន្លោះពី ១២០ ទៅ ១៥០ ដុល្លារ ហើយបើទៅមកតម្លៃគុណជាពីរ ខណៈការហោះទៅក្រៅប្រទេសដូចជាថៃទៅមកត្រឹមតែជាង ១០០ ដុល្លារដល់ ២០០ ដុល្លារធូរជាងតម្លៃសំបុត្រយន្តហោះក្នុងស្រុក។ នេះបើតាមបុគ្គលិកកក់សំបុត្រយន្តហោះក្នុងស្រុកមួយរូបប្រាប់ឲ្យដឹង។

បុគ្គលិកកក់សំបុត្រយន្តហោះនៅក្រុមហ៊ុនវើលដ៏អិចប្រេស ដែលសុំមិនបញ្ចេញឈ្មោះបានមើលឃើញពីភាពខុសគ្នានេះដោយសារខ្វះការប្រកួតប្រជែង និងណាមួយមកពីតម្រូវការហោះហើរក្នុងស្រុកមានតិច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុគ្គលិករូបនេះបានឲ្យដឹងថា ក្រុមហ៊ុនអាកាសចរភាគច្រើនភ្ជាប់ជើងហោះហើរទៅក្រៅប្រទេស មិនសូវធ្វើប្រតិបត្តិការក្នុងស្រុកនោះទេ ដោយសារតម្រូវការមិនសូវមានហើយក្រុមហ៊ុនមានតែមួយមិនមានការប្រកួតប្រជែងគ្នា។

«បើមួយយន្តហោះមានអ្នកដំណើរជិះតែ ១០ ទៅ ២០ នាក់ បើលក់ថោកពេកក៏មិនចំណេញដែរ ហើយណាមួយមកពីមិនសូវមានក្រុមហ៊ុនហោះហើរក្នុងស្រុកច្រើន ទើបតម្លៃមិនមានការប្រកួតប្រជែងគ្នា»។

បុគ្គលិកដដែលរូបនេះបានអះអាងថា តាមលោកដឹងក្រុមហ៊ុនដែលប្រតិបត្តិការហោះហើរក្នុងស្រុកបច្ចុប្បន្នមានតែក្រុមហ៊ុនកម្ពុជាអង្គរអ៊ែរដែលផ្តល់សេវាហោះហើរគោលដៅរាជធានីភ្នំពេញ ទៅខេត្តព្រះសីហនុនិងខេត្តសៀមរាប។

លោកបានលើកមូលហេតុនៃតម្រូវការហោះហើរក្នុងស្រុកតិច ដោយសារការអភិវឌ្ឍហេដ្ឋារចនាសម្ព័ន្ធបច្ចុប្បន្នមានភាពល្អប្រសើរច្រើន។ តួយ៉ាងខេត្តព្រះសីហនុតាមរយៈផ្លូវល្បឿនលឿនការធ្វើដំណើរចំណាយពេលត្រឹមពីរម៉ោង ទៅ ៣ ម៉ោងទៅដល់គោលដៅ បើសិនជិះយន្តហោះត្រូវចំណាយពេលរង់ចាំនៅព្រលានមួយម៉ោងទៅពីរម៉ោងមុន គួបផ្សំការធ្វើដំណើរទៀតអីចឹងទេការប្រើប្រាស់ពេលវេលាមិនខុសគ្នាទេហើយចំណាយអស់ច្រើនផង។

បើតាមបុគ្គលិកដែលកម្ពុជាថ្មីបានសម្ភាសន៍បានអះអាងបន្តថា ក្រៅពីមិនសូវជាជម្រើសចាំបាច់ ណាមួយពលរដ្ឋក៏បារម្ភពីសុវត្ថិភាពសម្រាប់ការប្រើប្រាស់សេវាហោះហើរក្នុងស្រុក។

យ៉ាងណាមិញ បើតាមបុគ្គលិកកក់សំបុត្ររូបនេះមើលឃើញថា បើមានការពង្រីកជើងហោះហើរទៅខេត្តឆ្ងាយៗដូចជារតនគីរី និងមណ្ឌលគិរី ពលរដ្ឋនិងអ្នកទេសចរមួយចំនួនអាចងាកមកប្រើប្រាស់សេវាយន្តហោះវិញ ដោយសារចំណាយពេលតិចជាងឆាប់បានទៅដល់គោលដៅ៕

Related Topics:ទេសចរណ៍