លោក ប៉ែន សុវិជាតិ៖ ស្តុកប្រេងក្នុងវិស័យឯកជន​ជួយទប់ស្កាត់ការហក់​ឡើងថ្លៃប្រេងនៅកម្ពុជា

កម្ពុជា មិនទាន់មានស្តុកប្រេងរបស់រដ្ឋនៅឡើយ តែស្តុកមាននៅវិស័យឯកជនសហការជាមួយក្រសួងពាណិជ្ជកម្ម ដែលអាចប្រើប្រាស់បានក្នុងរយៈពេល១ខែ បើទោះបីជាពុំមានការនាំចូលក៏ដោយ។​ នេះជាការបញ្ជាក់របស់លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មកម្ពុជា។

ថ្លែងប្រាប់កម្ពុជាថ្មី លោក ប៉ែន សុវិជាតិ បានឱ្យដឹងថា សព្វថ្ងៃនេះ ក្រសួងពាណិជ្ជកម្មបានតាមដានជាប់ជាប្រចាំទៅ​លើប្រេងស្តុកបម្រុងរបស់កម្ពុជា ដែលស្ថិតនៅក្នុងវិស័យឯកជន។ លោកបានពន្យល់​ដូច្នេះថា«ស្តុកបម្រុងនេះមិនមែន​ទុកសម្រាប់ចែកចាយឱ្យប្រើដោយទទេ ដូចស្តុកបម្រុងស្បៀងដែលរដ្ឋសម្រាប់ធ្វើអន្តរាគមន៍ពេលជួបគ្រោះមហន្តរាយ ឬអាសន្នអ្វីមួយនោះទេ ពោលគឺស្តុកបម្រុងនេះ វិស័យឯកជនមានកិច្ចសន្យាឬការប្តេជ្ញាចិត្តជាមួយក្រសួងពាណិជ្ជកម្ម ថាយ៉ាងហោចណាស់មានស្តុកបម្រុងមួយខែសម្រាប់លក់ចែកចាយ»។

ដោយស្តុកនេះ អាចទប់ស្កាត់ការហក់ឡើងថ្លៃប្រេងលក់រាយយ៉ាងគំហុកបានមួយកម្រិត បើទោះបីជាតម្លៃប្រេង​នៅលើទីផ្សារ​ពិភពលោកឡើងថ្លៃខ្ពស់យ៉ាងណាក្តី។

ទន្ទឹមនឹងនេះ រាជរដ្ឋាភិបាល បានចូលរួមឧបត្ថម្ភធន ៦.៥សេនក្នុងមួយលីត្រ ដែលជួយទាញតម្លៃប្រេងឱ្យថយចុះ​បានមួយកម្រិត កុំឱ្យឡើងថ្លៃហួសហេតុពេក និងគ្រប់គ្រងការលក់ចែកចាយបែបអាណាធិបតេយ្យផងដែរ។

អ្នកនាំពាក្យក្រសួងពាណិជ្ជកម្មបានគូសបញ្ជាក់ថា ទោះជាបច្ចុប្បន្ននេះ រដ្ឋមិនទាន់បានរៀបចំយន្តការទិញ​ប្រេងសម្រាប់​ស្តុកយ៉ាងណាក្តី ក៏វិស័យ​ឯកជនបានប្តេជ្ញាសហការជាមួយរដ្ឋាភិបាលយ៉ាងជិតស្និទ្ធ និងមានប្រភព​ផ្គត់ផ្គង់ប្រេងគ្រប់​គ្រាន់អាចធានាបានថា ទោះជាស្ថិតក្នុងកាលៈទេសៈណាក្តី ប្រេងដែលនាំចូលពីប្រទេសថៃ វៀតណាម និងសិង្ហបុរី នៅតែអាចនាំចូលបានត្រឹមរយៈពេលបីថ្ងៃ ទៅមួយសប្តាហ៍ប៉ុណ្ណោះ។

​​លោក ប៉ែន សុវិជាតិ បានអះអាងថា តម្លៃប្រេងនៅក្នុងសប្តាហ៍ក្រោយនេះ អាចនឹងមិនមានការប្រែប្រួលតម្លៃប៉ុន្មានទេ​ដោយសារស្តុកនៅសល់ ប៉ុន្តែមិនធានាតម្លៃនៅសប្តាហ៍បន្ទាប់ទៀតនោះទេ ព្រោះតម្លៃប្រេងនៅលើទីផ្សារអន្តរជាតិ​បន្តឡើងជាលំដាប់ កម្ពុជាជៀសមិនផុតពីការឡើងថ្លៃនោះដែរ។

បច្ចុប្បន្ន​នេះប្រេងឥន្ធនៈដែលកម្ពុជាប្រើប្រាស់ បាននាំចូលពីប្រទេសសិង្ហបុរី ថៃ និងវៀតណាម។ ក្រុមហ៊ុនលក់រាយ​នៅកម្ពុជា ដែលនាំចូលប្រេងឥន្ធនៈ មានដូចជា ក្រុមហ៊ុនតេលា សូគីម៉ិច ប៉ាប៉ា សាវីម៉ិច លឹមឡុង និងក្រុមហ៊ុនមួយ​ចំនួន​ទៀត។ ចំណែកក្រុមហ៊ុនបរទេស ដែលនាំចូលប្រេងឥន្ធនៈមកស្រុកខ្មែរ រួមមាន ក្រុមហ៊ុនតូតាល់ កាល់តិច និងក្រុមហ៊ុនភីធីធី។

បើតាមលោក ប៉ែន សុវិជាតិ បញ្ជាក់ថា ក្រុមហ៊ុនភីធីធី មានបំណងពង្រីកពោងស្តុកប្រេងបន្ថែមទៀត ដែលជាសញ្ញា​ល្អក្នុងការ​គ្រប់គ្រងតម្លៃប្រេងនៅកម្ពុជា។

សព្វថ្ងៃនេះ ប្រទេសកម្ពុជា មិនទាន់មានរោងចក្រសម្រាញ់ប្រេងដោយខ្លួនឯងបាននៅឡើយទេ ប៉ុន្តែក្រសួងបី រួមមាន ក្រសួងសេដ្ឋកិច្ច និងហិរញ្ញវត្ថុ ក្រសួងរ៉ែ និងថាមពល និងក្រសួងពាណិជ្ជកម្ម បានស្រាក់ដៃគ្នាធ្វើការជាមួយ​វិស័យ​ឯកជន ដើម្បីធានាលើការផ្គត់ផ្គង់ប្រេងឱ្យបានគ្រប់គ្រាន់ ដោយមិនឱ្យឡើងថ្លៃខ្ពស់ហួសហេតុនាំ​ឱ្យប៉ះពាល់ដល់ជីវ​ភាពរបស់ប្រជាពលរដ្ឋនោះទេ។

យោងតាមសេកចក្តីប្រកាសរបស់ក្រសួងពាណិជ្ជកម្មក្នុងសប្តាហ៍ទី២ ចាប់ពីថ្ងៃទី ១១ ដល់ថ្ងៃទី ២០ តុលា បាន​បង្ហាញថា ប្រេងសាំងលក់រាយមានតម្លៃ ៤៣០០រៀល ក្នុងមួយលីត្រ និងប្រេងម៉ាស៊ូតមានតម្លៃ ៤៦៥០រៀល។ ក្រសួងពាណិជ្ជកម្ម បានចេញតម្លៃលក់រាយរៀងរាល់ ១០ថ្ងៃម្តង ដើម្បីឆ្លើយតបឱ្យទាន់និន្នាការនៃការប្រែ​ប្រួលថ្លៃ​ប្រេងឥន្ធនៈនៅលើសកលលោក៕