លោក ឡុង ឌីម៉ង់ លើកពីសក្តានុពលខេត្ត​ព្រះសីហនុ នៅក្នុងកិច្ចប្រជុំក្របខណ្ឌមហា​អនុតំបន់មេគង្គ

លោក ឡុង ឌីម៉ង់ អភិបាលរងនៃគណៈអភិបាលខេត្ត បានអញ្ជើញជាប្រតិភូកម្ពុជា តំណាងរដ្ឋបាលខេត្តព្រះសីហនុ​ចូលរួមក្នុងកិច្ចពិគ្រោះយោបល់កម្រិតបច្ចេកទេសស្តីពីការពង្រឹងការចូលរួមរបស់រដ្ឋបាលថ្នាក់ក្រោមជាតិ ក្នុងក្រប​ខណ្ឌមហាអនុតំបន់មេគង្គ (GMS) ដោយមានការអញ្ជើញចូលរួមពីគណៈប្រតិភូថ្នាក់ក្រោមជាតិមកពីប្រទេសចំនួន៥ គឺកម្ពុជា ឡាវ មីយ៉ាន់ម៉ា ថៃ វៀតណាម និងចិន ព្រមទាំងដៃគូអភិវឌ្ឍន៍អន្តរជាតិ នៅទីក្រុងបាងកក ប្រទេសថៃ កាលពីចុងសប្តាហ៍កន្លងទៅ។

នៅក្នុងកិច្ចពិគ្រោះយោបល់នេះលោកអភិបាលរង បានលើកពីធាតុចូលពាក់ព័ន្ធនឹងការបង្កើនប្រសិទ្ធភាពការងារ កិច្ចការអភិវឌ្ឍ ការប្រើប្រាស់ធនធានឱ្យចំគោលដៅ និងការរៀបចំផែនការប្រកបដោយលក្ខណៈយុទ្ធសាស្ត្រ ដែលភាពស៊ីគ្នា ដើម្បីឆ្លើយតបនឹងតម្រូវការជាក់ស្តែង។

បន្ថែមពីលើនេះ លោក ឡុង ឌីម៉ង់ បានឆ្លៀតយកឱកាសនេះ លើកឡើងពីសក្តានុពលនៃការវិនិយោគ ក្នុងវិស័យឧស្សាហកម្ម និងទេសចរណ៍នៃខេត្តព្រះសីហនុ ទស្សនវិស័យ និងគោលដៅអភិវឌ្ឍក្នុង​ភាពជាដៃគូនៃបណ្តាប្រទេសជាសមាជិកGMS លើកិច្ចសហប្រតិបត្តិការរវាងខេត្តជាប់ព្រំដែនផងដែរ។

បច្ចុប្បន្ននេះ ខេត្តព្រះសីហនុ បានកំពុងមានការអភិវឌ្ឍយ៉ាងខ្លាំងគ្រប់ផ្នែក រួមមានវិស័យសំណង់អគារ ហេដ្ឋារចនាសម្ព័ន្ធ និងឧស្សាហកម្មជាដើម។ ខេត្តជាប់មាត់សមុទ្រមួយនេះ ក៏កំពុងទាក់ទាញភ្ញៀវទេសចរ​យ៉ាងសម្បើមផងដែរ ក្រោយពីបានតភ្ជាប់ផ្លូវល្បឿនលឿនរួចមក៕