រាជបណ្ឌិត្យសភាកម្ពុជា នឹងរៀបចំវេទិកាភ្នំពេញលើកទី២ នៅថ្ងៃពុធសប្តាហ៍នេះ

វិទ្យាស្ថានទំនាក់ទំនងអន្តរជាតិនៃកម្ពុជានៃរាជបណ្ឌិត្យសភាកម្ពុជា នឹងរៀបចំវេទិកាភ្នំពេញលើកទី២ នៅថ្ងៃទី២៥ ខែតុលា ឆ្នាំ២០២៣ខាងមុខ ស្តីពី «អប្បភាគីនិយម៖ មជ្ឈភាពអាស៊ាន និងការប្រកួតប្រជែងមហាអំណាច»។ វេទិកានេះ នឹងមានអ្នកចូលរួមជាង១០០នាក់ ជាវាគ្មិន អ្នកជំនាញ អ្នកស្រាវជ្រាវ បញ្ញវន្តមកស្ថាប័នធនាគារខួរក្បាល​(Think Tank) និងសាកលវិទ្យាល័យ ក្នុង និងក្រៅតំបន់អាស៊ី និងតំណាងក្រសួង ស្ថាប័នមួយចំនួននៅកម្ពុជា។

វេទិកាភ្នំពេញ​ គឺជាវេទិកាពហុទិស (Multi-track platform) ដែលមានការចូលរួមពីតំណាងរដ្ឋាភិបាល ធនាគារខួរក្បាល ស្ថាប័ន​ស្រាវ​ជ្រាវ សាកល​វិទ្យាល័យ ផ្នែកស្រាវជ្រាវនៃវិស័យឯកជន ទីភ្នាក់ងារប្រឹក្សាយោបល់ ​អង្គការ​មិនមែន​រដ្ឋាភិបាល ប្រព័ន្ធផ្សព្វផ្សាយ និងស្ថាប័នពាក់ព័ន្ធផ្សេងៗទៀត។ អ្នកចូលរួមទាំងអស់មកពីបណ្តាប្រទេសអាស៊ាន តំបន់ទន្លេមេគង្គ ប្រទេសជិតខាង និងប្រទេសពាក់ព័ន្ធផ្សេងទៀត។ អ្នកចូលរួមធ្វើការរួមគ្នាដោយលើកកម្ពស់ទំនាក់ទំនងរបស់ពួកគេ ជាមួយនឹងការពង្រឹងតម្លាភាព និងគណនេយ្យភាព ព្រមទាំងលើកកម្ពស់សមត្ថភាពរបស់រដ្ឋាភិបាលក្នុងការឆ្លើយតបទៅនឹងតម្រូវតាមការថ្មីរបស់អ្នកពាក់ព័ន្ធខាង​ក្រៅ​និង​ក្នុងស្រុក ដើម្បីមានការចូលរួមជាសាធារណៈកាន់តែទូលំទូលាយឡើង។

វេទិកាភ្នំពេញនេះ ធ្វើឡើងក្នុងគោលបំណងសំខាន់ៗចំនួន៦។ គោលបំណងទី១ កសាងទំនុកចិត្ត និងចូលរួមដោះស្រាយការទូត គោលនយោបាយ ដោយរក្សានិរន្តរភាពកិច្ចពិភាក្សាជាប្រចាំ លក្ខណៈជំនាញ និងក្រៅផ្លូវការក្នុងសហគមន៍ការទូត និងការសិក្សាជាអន្តរជាតិ។ ទី២ ជាវេទិកានៅក្នុងតំបន់អាស៊ីអាគ្នេយ៍សម្រាប់ការពិភាក្សាពីគោលនយោបាយ និងការទូតចំពោះបញ្ហាខាងនយោបាយ សេដ្ឋកិច្ច និងសន្តិសុខក្នុងតំបន់។ ទី៣ បង្កើតជា «វេទិកាបញ្ចេញទស្សនៈ» ដែលជាកន្លែងបង្កើតគំនិតផ្តួចផ្តើម​និងដំណោះស្រាយ និងជាកន្លែង​​ផ្លាស់ប្តូរទស្សន:នានា។

ទី៤ ផ្តល់ជាកន្លែងសម្រាប់ថ្លែងគំនិតផ្តួចផ្តើមការទូតនិងទស្សនៈនានាទាំងផ្លូវការ ទាំង​មិន​ផ្លូវ​ការ ដើម្បី​ដោះ​ស្រាយបញ្ហាសន្តិសុខដ៏តឹងតែងបំផុតនៅក្នុងតំបន់។ ទី៥ ផ្តល់លំហ «ទីបី» សម្រាប់កិច្ចប្រជុំក្រៅផ្លូវការរវាងអ្នកចូលរួមនានា ដើម្បីជំរុញការទូតតាមរយៈកិច្ចពិភាក្សាផ្សេងៗ។ ទី៦ បោះពុម្ពផ្សាយរបាយការណ៍វេទិកាភ្នំពេញជាកម្រងអត្ថបទសង្ខេបប្រចាំឆ្នាំ ដែលជាតួលេខ ផែនទី និងការស្រាវជ្រាវពាក់ព័ន្ធបញ្ហាប្រឈមការទូត និងគោលនយោបាយសំខាន់ៗនៃតំបន់អាស៊ីអាគ្នេយ៍។

សូមជម្រាបថា វេទិកាភ្នំពេញ ត្រូវបានបង្កើតឡើងដោយវិទ្យាស្ថានទំនាក់ទំនងអន្តរជាតិនៃកម្ពុជា នៃរាជបណ្ឌិតសភាកម្ពុជា​កាលពី​ឆ្នាំ​២០២២​។​ វេទិកានេះ នឹងមានការរៀបចំជារៀងរាល់ឆ្នាំ ដើម្បីលើកយកបញ្ហាតានតឹងនៅក្នុងតំបន់មកពិភាក្សា និងស្វែងរកដំណោះស្រាយជាមួយគ្រប់ភាគីពាក់ព័ន្ធទាំងអស់។ កាលពីឆ្នាំ២០២២កន្លងទៅ វេទិកាភ្នំពេញលើកទី១ ធ្វើឡើងនៅក្នុងខែកញ្ញា ស្តីពី តួនាទីធនាគារខួរក្បាល អង្គការមិនមែនរដ្ឋាភិបាល និងប្រព័ន្ធផ្សព្វផ្សាយក្នុងបរិបទថ្មី៖ ដោះស្រាយបញ្ហាប្រឈមទាំងអស់គ្នា៕