កងទ័ពមួកខៀវ៥៣នាក់ ត្រឡប់មកដល់កម្ពុជាដោយសុវត្ថិភាព ក្រោយ UN ស្នើឱ្យដកទ័ពចេញពីប្រទេសម៉ាលី

កងវិស្វកម្មព្រលានយន្តហោះ៧២៩ ឬកងទ័ពមួកខៀវកម្ពុជាចំនួន៥៣នាក់ នៅរសៀលថ្ងៃទី២៧ ខែតុលា ឆ្នាំ២០២៣នេះ បានវិលត្រឡប់ពីប្រទេសម៉ាលី មកដល់ទឹកដីប្រទេសកម្ពុជាប្រកបដោយសុវត្ថិភាពហើយ បន្ទាប់ពីអង្គការសហប្រជាជាតិស្នើឱ្យដកកងទ័ពទាំងអស់ចេញពីប្រទេសម៉ាលី ត្រឹមថ្ងៃចុងឆ្នាំ២០២៣។

បើតាមលោក សែម សុវណ្ណនី អគ្គនាយកមជ្ឈមណ្ឌលជាតិថែរក្សាសន្តិភាព ក្នុងចំណោមកងវិស្វកម្មព្រលានយន្តហោះលេខ៧២៩ ទាំង៥៣នាក់ ក្នុងនោះមាននារីចំនួន៥នាក់។ ក្នុងចំណោមកងទ័ពមួកខៀវរបស់កម្ពុជាចំនួន៥៣នាក់នេះ គឺមកពីបណ្ដាកងព្រលានយន្តហោះចំនួន៥១នាក់ និង២នាក់ទៀតមកពីកងកម្ទេចគ្រឿងផ្ទុះ។

 លោក សែម​ សុវណ្ណនី បានគូសបញ្ជាក់ថា ការណ៍ដែលកងទ័ពមួកខៀវ ត្រូវវិលត្រឡប់មកកម្ពុជាវិញនាពេលនេះ គឺដោយសារតែ កាលពីថ្ងៃទី៣០ ខែមិថុនា ឆ្នាំ២០២៣ ក្រុមប្រឹក្សាសន្តិសុខអង្គការសហប្រជាជាតិ បានស្នើសុំឱ្យដកកម្លាំងមួកខៀវទាំងអស់ចេញពីប្រទេសម៉ាលី ហើយកងទ័ពមួកខៀវទាំងអស់ត្រូវធ្វើដំណើរទៅកាន់ប្រទេសកំណើតឱ្យបានមុនថ្ងៃទី៣១ ខែធ្នូ ឆ្នាំ២០២៣។

សូមជម្រាបថា រដ្ឋាភិបាលកម្ពុជាបានបញ្ជូនកងកម្លាំងទៅចូលរួមបំពេញបេសកម្មថែរក្សាសន្តិភាពក្រោមឆ័ត្រអង្គការសហប្រជាជាតិជាលើកដំបូងនៅប្រទេសម៉ាលី កាលពីថ្ងៃទី១១ ខែមីនា ឆ្នាំ២០១៤ ចំនួនពីរកងគឺ កងវិស្វកម្មព្រលានយន្តហោះ៧២៩ និិងកងកម្ទេចគ្រាប់មិនទាន់ផ្ទុះ។

បើតាមការឱ្យដឹងរបស់ លោក សែម សុវណ្ណនី​ រយៈពេល៩ឆ្នាំនៅលើទឹកដីប្រទេសម៉ាលី កងទ័ពមួកខៀវកម្ពុជា បានបោះទីតាំងឈរជើងនៅតំបន់ចំនួនពីរគឺ តំបន់គីដាល់(KIDAL)  និងតំបន់តេសសាលីត (TESSALIT)។ ៩ឆ្នាំនៅប្រទេសម៉ាលី កងទ័ពមួកខៀវ បានជួបប្រទះស្ថានការណ៍អសន្តិសុខដែលបង្កឡើងដោយភាគីរដ្ឋ និងភាគីមិនមែនរដ្ឋ ដូចជាការប្រើប្រាស់គ្រឿងផ្ទុះកែច្នៃ បំពាក់គ្រាប់បែកអត្តឃាតលើរថយន្ត រួមជាមួយកត្តាអសន្តិសុខដែលឡើងដោយគ្រោះធម្មជាតិ ជាច្រើន។

ជាមួយនឹងដំណើរមកដល់កម្ពុជា មុននឹងធ្វើដំណើរទៅកាន់គេហដ្ឋានជាមួយក្រុមគ្រួសារ កងវិស្វកម្មព្រលានយន្តហោះ៧២៩ ទាំង៥៣នាក់ ត្រូវធ្វើតេស្ដពិនិត្យសុខភាព នៅនឹងទីតាំងអាកាសយានដ្ឋានអន្តរជាតិភ្នំពេញជាមុនសិន៕

ដោយ៖ ង៉ិល ណារ៉ាត់