ព័ត៌មានជាតិ

លោក ហេង សួរ ៖ កម្មវិធីថ្នាក់ជាតិរបស់ សម្ដេចធិបតី នឹងកែប្រែ កម្ពុជា ពីអតិពលកម្មទៅជាកម្លាំងពលកម្ម មានជំនាញជាក់លាក់ច្បាស់លាស់

បានផុស

៣ years មុន

នៅ

ថ្ងៃអង្គារ ៣១ តុលា ២០២៣

ដោយ

លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ រំលេចថា កម្មវិធីថ្នាក់ជាតិរបស់ សម្ដេចធិបតី នឹងកែប្រែ កម្ពុជា ពីអតិពលកម្មទៅជាកម្លាំងពលកម្ម ដែលមានជំនាញជាក់លាក់ ច្បាស់លាស់ ដើម្បីធានាការប្រកួតប្រជែង និងការទាក់ទាញវិនិយោគថ្មីៗ បន្ថែម សម្រាប់បង្កើនឱកាសការងារជូនពលរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរំលេចនេះ ក្នុងឱកាស លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ជួបពិភាក្សាជាមួយលោកបណ្ឌិត តាន់ មុន្នីវណ្ណ ប្រធានសហព័ន្ធឧស្សាហកម្មយានយន្តកម្ពុជា នៅទីស្ដីការក្រសួងការងារ និងបណ្ដុះបណ្ដាលវិជ្ជាជីវៈ គោលបំណងដើម្បីឲ្យភាគីទាំងពីរ បានស្វែងយល់ពីចក្ខុវិស័យរួមរវាងរដ្ឋ និងវិស័យឯកជន ក្នុងការលើកកម្ពស់វិស័យការងារ និងបណ្ដុះបណ្ដាលវិជ្ជាជីវៈនៅកម្ពុជា ឲ្យកាន់តែប្រសើរឡើងបន្ថែមទៀត នាថ្ងៃទី ៣១ ខែតុលា ឆ្នាំ ២០២៣។

លោក ហេង សួរ បានបង្ហាញពីគោលបំណងកម្មវិធីថ្នាក់ជាតិរបស់ សម្ដេចធិបតី ក្នុងការបណ្ដុះបណ្ដាលយុវជនមកពីគ្រួសារក្រីក្រ និងងាយរងហានិភ័យ ដែលនឹងប្រកាសនៅខែវិច្ឆិកា ខាងមុខនេះ ដើម្បីឲ្យក្រុមគោលដៅទាំងអស់ មានជំនាញ ទទួលបានការងារឆាប់រហ័ស និងសមរម្យ ហើយសម្បូរបែបក្នុងទីផ្សារកម្ពុជា នាពេលបច្ចុប្បន្ន។ ទន្ទឹមនោះ លោក បានរំលេចជូនដល់សហព័ន្ធថា « កម្មវិធីនេះ នឹងកែប្រែ កម្ពុជា ពីអតិពលកម្មទៅជាកម្លាំងពលកម្ម ដែលមានជំនាញជាក់លាក់ និងច្បាស់លាស់ ដើម្បីធានាការប្រកួតប្រជែងផង និងការទាក់ទាញវិនិយោគថ្មីៗ បន្ថែមផង សម្រាប់បង្កើនឱកាសការងារជូនពលរដ្ឋ»។

ជាមួយនោះ លោករដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានលើកឡើងពីចក្ខុវិស័យរួមរបស់ក្រសួងក្នុងការពង្រឹង និងធ្វើឲ្យប្រសើរឡើងនូវវិស័យការងារ សន្តិសុខសង្គម និងបណ្ដុះបណ្ដាលវិជ្ជាជីវៈ នៅកម្ពុជា ដើម្បីជាឧត្ដមប្រយោជន៍ជូនប្រជាពលរដ្ឋក្នុងវិស័យស្នូលទាំង ៣ នេះ ដែលជាការគិតគូរយ៉ាងយកចិត្តទុកដាក់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា អាណត្តិទី ៧ នេះ។

ក្នុងកិច្ចពិភាក្សាប្រកបដោយភាពស្និទ្ធស្នាលនោះ គណៈប្រតិភូសហព័ន្ធ ក៏បានជម្រាប លោករដ្ឋមន្ត្រី ពីវឌ្ឍនភាព និងបច្ចុប្បន្នភាព នៃការបោះទុនវិនិយោគរបស់សមាជិកសហព័ន្ធនីមួយៗ ដែលក្រុមហ៊ុនខ្លះបានផ្ដើមវត្តមាននៅកម្ពុជា តាំងពីឆ្នាំ ១៩៩៣ ហើយពង្រីកទំហំវិនិយោគរាប់លានដុល្លារ បង្កើតឱកាសការងារសម្រាប់ពលរដ្ឋក្នុងប្រទេស។ ក្រៅពីនេះ ប្រតិភូសហព័ន្ធ ក៏បានរាយការណ៍ជូនពីការបណ្ដុះបណ្ដាលកូនជាងដែលក្រុមហ៊ុនខ្លួនបានអនុវត្ត បង្ហាញពីការចូលរួមអភិវឌ្ឍន៍ធនធានមនុស្សនៅកម្ពុជាផងដែរ។

យ៉ាងណាក៏ដោយ មុននឹងបញ្ចប់ លោករដ្ឋមន្ត្រី បានស្នើឲ្យសហព័ន្ធយានយន្ត បន្តចូលរួមជាមួយរដ្ឋាភិបាល ឲ្យកាន់តែច្រើនឡើងបន្ថែមទៀត នូវការអនុវត្តកាតព្វកិច្ចការហ្វឹកហ្វឺនកូនជាងរបស់ក្រុមហ៊ុននីមួយៗ ដែលនឹងផ្ដល់បទពិសោធន៍ ចំណេះដឹង និងឱកាសការងារ ដល់សិក្ខាកាម ហើយភាគច្រើនបានសិក្សានៅសាលាបណ្ដុះបណ្ដាលបច្ចេកទេសវិជ្ជាជីវៈ៕

អត្ថបទ ៖ ពិសី