ព័ត៌មានជាតិ

ឯកឧត្ដម ហ៊ុន ម៉ានី ៖ ការប្រឡងជ្រើសរើសមន្ត្រីកសិកម្មឃុំ នឹងឈរលើគោលការណ៍ តម្លាភាព និងយុត្តិធម៌

បានផុស

៣ years មុន

នៅ

ថ្ងៃព្រហស្បតិ៍ ២ វិច្ឆិកា ២០២៣

ដោយ

ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ សង្កត់ធ្ងន់ថា ការប្រឡងជ្រើសរើសមន្ត្រីកសិកម្មឃុំ ជាមន្ត្រីរាជការក្របខ័ណ្ឌថ្មីនេះ នឹងផ្ដល់លទ្ធភាពដល់បេក្ខជនចូលរួមប្រឡងប្រជែងដោយឈរលើគោលការណ៍ គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃទី ០២ ខែវិច្ឆិកា ឆ្នាំ ២០២៣ នេះ ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានសង្កត់ធ្ងន់ថា «ការប្រឡងប្រជែងជ្រើសរើសមន្ត្រីកសិកម្មឃុំជាមន្ត្រីរាជការក្របខ័ណ្ឌថ្មីនេះ នឹងផ្ដល់លទ្ធភាពដល់បេក្ខជនចូលរួមប្រឡងប្រជែងដោយឈរលើគោលការណ៍គុណាធិបតេយ្យ តម្លាភាព យុត្តិធម៌ បរិយាបន្ន ប្រសិទ្ធភាព ដែលមានកំណត់ក្នុងវិធានការគន្លឹះក្នុងការកែទម្រង់រដ្ឋបាលសាធារណៈរបស់រាជរដ្ឋាភិបាល នីតិកាលទី ៧ នៃរដ្ឋសភា ហើយដែលដើរស្របជាមួយទស្សនវិស័យដ៏មោះមុត និងវែងឆ្ងាយរបស់ សម្ដេចធិបតី នាយករដ្ឋមន្ត្រី»។

ឯកឧត្ដម ហ៊ុន ម៉ានី បញ្ជាក់បន្ថែមថា បេក្ខជនដែលមានជំនាញវិជ្ជាជីវៈ/ឯកទេសកសិកម្ម ចាប់ពីវិញ្ញាបនបត្រឡើងទៅ មានឱកាសដាក់ពាក្យចូលរួមប្រឡងប្រជែងគ្រប់ៗ គ្នា តាមរយៈប្រព័ន្ធអនឡាញ ឬតាមរយៈការដាក់ពាក្យដោយផ្ទាល់នៅមន្ទីរមុខងារសាធារណៈតាមបណ្ដាខេត្តរបស់ខ្លួន ចាប់ពីថ្ងៃទី ១ ខែវិច្ឆិកា រហូតដល់ថ្ងៃទី ៣០ ខែវិច្ឆិកា ឆ្នាំ ២០២៣។ ចំពោះបេក្ខជនដែលបានប្រឡងជាប់ជាស្ថាពរ នឹងត្រូវធ្វើកម្មសិក្សា និងតាំងស៊ប់ក្នុងប្រភេទក្របខ័ណ្ឌ ក ខ និង គ ផ្អែកលើកម្រិតបណ្ដុះបណ្ដាលរបស់សាមីខ្លួន។ ហើយប្រជាពលរដ្ឋ និងបេក្ខជនទាំងអស់ នឹងបានចូលរួមប្រឡងប្រជែងដើម្បីក្លាយខ្លួនជាមន្ត្រីរាជការស៊ីវិលប្រកបដោយទំនុកចិត្តក្នុងស្មារតី «ចេះ គឺជាប់»។

គួរជម្រាបថា ក្រសួងមុខងារសាធារណៈ បានចេញសេចក្ដីជូនដំណឹងស្ដីពីការប្រឡងប្រជែងជ្រើសរើសមន្ត្រីកសិកម្មឃុំឲ្យចូលបម្រើការងារក្នុងក្របខណ្ឌ ក្រសួងកសិកម្ម រុក្ខាប្រមាញ់ និងនេសាទ ឆ្នាំ ២០២៣ ដើម្បីបំពេញការងារនៅភូមិសាស្ត្រឃុំគោលដៅចំនួន ២៥០ ក្នុងស្រុកចំនួន ៨៩ នៃខេត្តចំនួន ១៧។ ទន្ទឹមនោះ ដើម្បីសម្រួលដល់បេក្ខជនក្នុងការស្វែងរកព័ត៌មានបន្ថែម គណៈកម្មការរៀបចំការប្រឡងប្រជែងជ្រើសរើសមន្ត្រីកសិកម្ម បានរៀបចំកម្រងព័ត៌មាននានាពាក់ព័ន្ធជាមួយការប្រឡងនៅលើគេហទំព័រ https://lms.era.gov.kh/pix/01_userguide/ ឬ បេក្ខជនទាំងអស់ អាចទាក់ទងតាមលេខទូរសព្ទ ០៧៨ ២៤៣ ២៣៥ ឬ ០១២ ៨៤៣ ១១៤។

ជាមួយនោះ បេក្ខជន ក៏អាចបំពេញព័ត៌មានសុំសិទ្ធិប្រឡងប្រជែង និងស្កេនបញ្ចូលឯកសារច្បាប់ដើមតាមប្រព័ន្ធអនឡាញ https://lms.era.gov.kh/qrlink/2A ឬ អាចទាក់ទងជាមួយមន្ទីរមុខងារសាធារណៈតាមបណ្ដាខេត្ត ដើម្បីបំពេញព័ត៌មានសុំសិទ្ធិប្រឡងប្រជែង និងស្កេនបញ្ចូលឯកសារច្បាប់ដើមផងដែរ៕

អត្ថបទ ៖ ពិសី