នាវាខ្នាតយក្ស ១ គ្រឿងដឹកភ្ញៀវទេសចរជាង ​១​ពាន់​នាក់ ចូលចតនៅកំពង់ផែក្រុងព្រះសីហនុ

នាវាខ្នាតយក្សមួយគ្រឿងបានដឹកភ្ញៀវទេសចរបរទេសចម្រុះជាតិសាសន៌ជាង ១ ពាន់នាក់ ចូលចតនៅកំពង់ផែស្វយ័តក្រុងព្រះសីហនុ ដើម្បីឲ្យក្រុមភ្ញៀវទេសចរដើរទស្សនកិច្ចនៅតាមតំបន់រមណីដ្ឋានក្នុងព្រះរាជាណាចក្រកម្ពុជានិងនៅតាមទីប្រជុំជនសំខាន់ៗក្នុងក្រុងព្រះសីហនុ។

នាវានេះបានចូលចតដល់កំពង់ផែនៅវេលាម៉ោង ៧ ព្រឹកថ្ងៃទី៤ខែវិច្ឆិកា ឆ្នាំ២០២៣។ នាវានេះបានធ្វើដំណើរមកពីប្រទេសវៀតណាមចូលមកប្រទេសកម្ពុជា។

តាមការគ្រោងទុក នាវានេះនឹង​ចាកចេញពីកំពង់ផែស្វយ័តក្រុងព្រះសីហនុឆ្ពោះទៅប្រទេសថៃនៅរសៀលថ្ងៃទី ៥ ខែវិច្ឆិកាស្អែកនេះ។

មន្ត្រីនគរបាលអន្តោប្រវេសន៌ច្រកទ្វាកំពង់ផែក្រុងព្រះសីហនុបានឲ្យដឹងថា នៅលើនាវានេះមាននាវិកចំនួន ៤៦៩ នាក់ ស្រីចំនួន ៩៤នាក់ មាន ៥០ សញ្ជាតិ និងមានភ្ញៀវទេសចរចំនួន ៨៦៨ នាក់ ស្រីចំនួន ៤៥០នាក់ មាន១៨សញ្ជាតិ។

មន្ត្រីដដែលបានឲ្យដឹងថា  នាវាមានឈ្មោ VIKING  ORION មានបណ្តោយ ២២៨.៣០ម ទទឹង ២៨.៨០ ម និង ជម្រៅទឹក ៦.៦៥ម។ នាវានេះនឹង​ចាកចេញពីកំពង់ផែស្វយ័តក្រុងព្រះសីហនុនៅវេលាម៉ោង១៤.០០នាទីថ្ងៃទី៥ ខែវិច្ឆិកា ឆ្នាំ២០២៣ស្អែកនេះដោយធ្វើដំណើរទៅប្រទេសថៃ៕   

អត្ថបទ៖ ស៊ុយ ចាន់ធា