ភ្ញៀវទេសចរជាតិ និងអន្តរជាតិ រំភើប ដែលបានដើរឆ្លងកាត់ស្ពានហាលប្រាសាទអង្គរវត្ត

ភ្ញៀវទេសចរជាតិ និងអន្តរជាតិ ដែលបានដើរឆ្លងកាត់ស្ពានហាលខាងលិច ដើម្បីចូលទៅទស្សនាប្រាសាទអង្គរវត្ត បានពោលពាក្យកោតសរសើរចំពោះអ្នកជំនាញដែលបានខិតខំប្រឹងប្រែងជួសជុល និងអភិរក្សស្ពានហាលនេះបានល្អប្រសើរឡងវិញ។

លោក កាយ កាន វ័យ៧៨ឆ្នាំ មកពីខេត្តកំពង់ធំ បានបង្ហាញអារម្មណ៍រីករាយ ក្រោយរូបគាត់បានដើរឆ្លងកាត់ស្ពានហាលសារជាថ្មីម្ដងទៀត។  គាត់រៀបរាប់ថាគាត់ធ្លាប់ឆ្លងកាត់ស្ពានហាលនេះម្ដងរួចមកហើយ ពោលគឺតាំងពីឆ្នាំ២០០៥ ដែលកាលណោះ ស្ពាននេះមានស្ថានភាពបាក់បែក និងស្រុតដោយកន្លែង ពិបាកធ្វើដំណើរ។ ប៉ុន្តែពេលនេះ គាត់បានដើរលើស្ពានបុរាណជាថ្មីម្តងទៀត ដោយឃើញថា មានភាពរឹងមាំឡើងវិញ ព្រមទាំងធ្វើឱ្យភ្ញៀវដែលមកលេងប្រាសាទអង្គរងាយស្រួលធ្វើដំណើរជាងមុន។

ពលរដ្ឋម្នាក់ទៀតរស់នៅខេត្តកណ្តាល អ្នកស្រី នូ យ៉ន បាននិយាយថា ស្ពានហាលខាងលិចអង្គរវត្តពិតជាស្រស់ស្អាតប្លែក ស្រួលដើរជាងកាលពីមុន។ អ្នកស្រីយល់ថា ការជួសជុលស្ពានហាលឱ្យប្រសើរឡើងវិញនេះ គឺជាការថែរក្សាទុកស្នាដៃរបស់បុព្វបុរសខ្មែរឱ្យនៅគង់វង្សបានយូរអង្វែង សម្រាប់ឱ្យកូនចៅជំនាន់ក្រោយៗទៀតបានឃើញ។

ក្រៅពីភ្ញៀវទេសចរជាតិ លោកស្រី Linda និង អ្នកស្រី Hidi ជនជាតិអាមេរិក ដែលបានដើរឆ្លងកាត់ស្ពានហាលជាលើកដំបូង បានបង្ហាញការចាប់អារម្មណ៍ខ្លាំងលើសំណង់ប្រាសាទបុរាណដ៏អច្ឆរិយៈរបស់ប្រទេសកម្ពុជានេះ ពិសេស គឺការជួសជុលថែទាំស្ពានហាលនេះជាដើម។ភ្ញៀវទេសចរអន្តរជាតិទាំងពីររូបនេះ បានបង្ហាញអារម្មណ៍រំភើប ដោយចាត់ទុកថា រូបគាត់ទាំងពីរមានសំណាងណាស់ មានសំណងនៅត្រង់ថាធ្វើដំណើរកម្សាន្តនៅរមណីយដ្ឋានអង្គរ ស្របពេលសំណង់ស្ពានហាលបានជួសជុលរួចរាល់ ហើយបានដើរឆ្លងកាត់ជាលើកដំបូង។

ការពោលសរសើរអំពីការងាររបស់អាជ្ញាធរជាតិអប្សរា ក្នុងការជួសជុលព្រមទាំងសម្រស់ស្ពានហាលខាងលិចអង្គររបស់ភ្ញៀវទេសចរចម្រុះជាតិសាសន៍នេះ កើតមានឡើងបន្ទាប់ពីស្ពានហាលខាងលិចអង្គរ បានជួសជុលរួចរាល់ ព្រមទាំងសម្ពោធដាក់ឱ្យប្រើប្រាស់ជាផ្លូវការឡើងវិញ។

សូមជម្រាបថា  ក្រោមកិច្ចសហការរវាងអាជ្ញាធរជាតិអប្សរា និងសាកលវិទ្យាល័យសូហ្វីយ៉ា នៃប្រទេសជប៉ុន  ស្ពានហាលខាងលិចប្រាសាទអង្គរវត្ត ត្រូវបានចាប់ផ្តើមជួសជុលឡើងវិញកាលពីអំឡុងឆ្នាំ ២០១៦។ ក្រោយសម្ពោធដាក់ឱ្យប្រើប្រាស់ឡើងវិញ ក្រោមព្រះរាជាធិបតី​ដ៏ខ្ពង់ខ្ពស់ ព្រះអម្ចាស់ជីវីតតម្កល់លើត្បូង ស្ពានហាលខាងលិចប្រាសាទអង្គរវត្តត្រូវបានដាក់ឱ្យប្រើប្រាស់ឡើងវិញ ជាមួយនឹងការប្រើប្រាស់រយៈពេលយូរអង្វែង។

លើសពីការជួសជុល សាកលវិទ្យាល័យសូហ្វីយ៉ារបស់ជប៉ុន រួមជាមួយអាជ្ញាធរជាតិអប្សរាកម្ពុជា កាលពីថ្ងៃទី០៣ ខែវិច្ឆិកា ឆ្នាំ២០២៣ បានចុះអនុស្សារណៈនៃការយោគយល់គ្នាលើគម្រោងថែទាំស្ពានហាលខាងលិចប្រាសាទអង្គរវត្ត៕

អត្ថបទដោយ៖ ជុន កុសល