ព័ត៌មានជាតិ

ផ្លូវល្បឿនលឿនពីព្រលានយន្តហោះថ្មីមកក្រុងសៀមរាប នៅមិនទាន់កំណត់ថ្ងៃបើកការដ្ឋានសាងសង់

បានផុស

២ years មុន

នៅ

ថ្ងៃពុធ ៨ វិច្ឆិកា ២០២៣

ដោយ

ខណៈដែលព្រលានយន្តហោះសៀមរាបថ្មីកំពុងដាក់ឲ្យដំណើរការប្រើប្រាស់ ដោយឡែកផ្លូវល្បឿនលឿនតភ្ជាប់ពីព្រលានសៀមរាបថ្មីមកក្រុងសៀមរាប នៅមិនទាន់កំណត់កាលបរិច្ឆេទចាប់ផ្ដើមសាងសង់នៅឡើយទេ។

រដ្ឋមន្រ្តីក្រសួងសាធារណការនិងដឹកជញ្ជូន លោក ប៉េង ពោធិ៍នាបានបញ្ជាក់ថា ផ្លូវតភ្ជាប់ពីព្រលានថ្មីមកក្រុងសៀមរាបនៅជាគម្រោងសិក្សានៅឡើយ ខណៈភាគីពាក់ព័ន្ធនៅមិនទាន់កំណត់កាលបរិច្ឆេទនឹងចាប់ផ្តើមសាងសង់នៅពេលណានោះទេ។

បើតាមលោករដ្ឋមន្រ្តី ដៃគូអភិវឌ្ឍមិនទាន់អនុម័តលើគម្រោង ដោយត្រូវសិក្សាលម្អិតបន្ថែមជាមួយភាគីពាក់ព័ន្ធមានក្រុមហ៊ុនអភិវឌ្ឍព្រលាន ខាងអាកាសចរស៊ីវិល និងក្រសួងសាធារណការពីស្ថានភាពជាក់ស្តែងផ្លូវដែលត្រូវសាងសង់។

គម្រោងការស្ថាបនាផ្លូវល្បឿនលឿនពីព្រលានយន្តហោះខេត្តសៀមរាបថ្មីដែលមានទីតាំងស្ថិតនៅក្នុងស្រុកសូត្រនិគម បន្ថែមលើគម្រោងសាងសង់ផ្លូវរថភ្លើងធុនស្រាល ដើម្បីសម្រួលលំហូរនៃការធ្វើដំណើររបស់ភ្ញៀវទេសចរមកក្រុងសៀមរាប។

បើតាមក្រសួងសាធារណការនិងដឹកជញ្ជូន បច្ចុប្បន្ននេះក្រុមហ៊ុនសំណង់សៀងហៃរបស់ប្រទេសចិនកំពុងសិក្សាគម្រោងពង្រីកកំណាត់ផ្លូវជាតិលេខ ៦ ចាប់ពីចំណុចប្រសព្វផ្លូវជាតិលេខ ៦ និងផ្លូវចូលព្រលានយន្តហោះថ្មីខេត្តសៀមរាប ទៅដល់ក្រុងសៀមរាបដែលមានប្រវែងជាង ២០ គីឡូម៉ែត្រ។ ការពង្រីកនេះចាប់ពីចំណុចគីឡូម៉ែត្រលេខ ២៩៣+៦៥០ រហូតដល់ចំណុចគីឡូម៉ែត្រលេខ ៣១៣+៥៩០ ដើម្បីជួយសម្រួលដល់លំហូរចរាចរណ៍និងបង្កើនសមត្ថភាពដឹកជញ្ជូន ដែលនឹងមានការកើនឡើងដោយសារការបើកដំណើរការព្រលានយន្តហោះថ្មីនៅពេលខាងមុខ៕