ព័ត៌មានជាតិ

ផ្លូវល្បឿនលឿនភ្នំពេញ-បាវិត មន្រ្តីប្រជុំកំណត់ទីតាំងតភ្ជាប់ទៅផ្លូវល្បឿនលឿនប្រទេសវៀតណាម

បានផុស

១ ម៉ោង មុន

នៅ

ថ្ងៃព្រហស្បតិ៍ ២៣ កក្កដា ២០២៦

ដោយ

រដ្ឋមន្រ្តីក្រសួងសាធារណការ និងដឹកជញ្ជូនកាលពីព្រឹកថ្ងៃទី ២៣ ខែកក្កដា ឆ្នាំ២០២៦ បានដឹកនាំកិច្ចប្រជុំគណៈកម្មការចម្រុះ ដើម្បីកំណត់ទីតាំងគម្រោងតភ្ជាប់ផ្លូវល្បឿនលឿនភ្នំពេញ-បាវិត ជាមួយផ្លូវល្បឿនលឿនហូជីមិញ-ម៉ុកបៃ របស់ប្រទេស វៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រជុំដឹកនាំដោយលោក ប៉េង ពោធិ៍នា និងក៏មានការចូលរួមពីមន្រ្តីជំនាញក្រសួងសាធារណការ និងដឹកជញ្ជូន រួមទាំងមន្រ្តីអន្តរក្រសួង និងក្រុមហ៊ុនទទួលបន្ទុកសាងសង់។

បើតាមមន្រ្តីក្រសួងសាធារណការ និងដឹកជញ្ជូន ការប្រជុំនេះមានគោលបំណងពិនិត្យពិភាក្សា និងផ្តល់ព័ត៌មានពីបច្ចុប្បន្នភាពដល់សមាជិកគណៈកម្មការអន្តរក្រសួង លើចំណុចតភ្ជាប់ក៏ដូចជាការពិភាក្សាដើម្បីត្រៀមសម្រាប់កិច្ចប្រជុំជាមួយភាគីវៀតណាមនាពេលខាងមុខ។

យ៉ាងណាមិញ មន្រ្តីក្រសួងសាធារណការ និងដឹកជញ្ជូនមិនបានផ្តល់ព័ត៌មានលម្អិតពីកិច្ចប្រជុំ រួមទាំងវឌ្ឍនភាពការអនុវត្តគម្រោងសាងសង់ផ្លូវល្បឿនលឿនភ្នំពេញ-ក្រុងបាវិត ខណៈបើតាមផែនការគ្រោងបញ្ជប់នៅឆ្នាំ ២០២៧។

ផ្លូវល្បឿនលឿនភ្នំពេញ-បាវិត បានប្រកាសបើកការដ្ឋានសាងសង់កាលពីខែមិថុនា ឆ្នាំ ២០២៣ ក្រោមអធិបតីភាពសម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា។

ការដំណើរការសាងសង់គ្រោងចំណាយថវិកាសរុបប្រមាណ ១,៣៥ ពាន់លានដុល្លារ ក្រោមទម្រង់វិនិយោគសាងសង់-ប្រតិបត្តិការ-ផ្ទេរ (BOT) ដែលមានរយៈពេលប្រតិបត្តិការចំនួន ៥០ ឆ្នាំ។

ផ្លូវល្បឿនលឿនទីពីររបស់កម្ពុជានេះ តាមការសិក្សាផ្តល់ផលចំណេញផ្នែកសេដ្ឋកិច្ច និងវិនិយោគយ៉ាងច្រើនសន្ធឹកសន្ធាប់ដល់កម្ពុជា ជាពិសេសអត្រាចំណេញខាងផ្នែកសេដ្ឋកិច្ច (EIIR) មានកម្រិតខ្ពស់រហូតដល់ទៅប្រមាណ ២០ ភាគរយ។

ខ្សែផ្លូវនេះក៏នឹងក្លាយជាផ្នែកមួយយ៉ាងសំខាន់ ក្នុងការបំពេញបន្ថែមឱ្យផ្លូវអាស៊ានហាយវ៉េលេខ ១ (AH-1) ដែលជួយសម្រួលបន្ទុកចរាចរណ៍ដឹកជញ្ជូនទំនិញរវាងប្រទេសកម្ពុជា ថៃ និងវៀតណាម៕