គ្រូគុនចម្រុះខ្មែរមួយរូប នឹងយក “គុនល្បុក្កតោ” បង្ហាញលើឆាកមហោស្រពភាពយន្តពិភពលោកអាស៊ីលើកដំបូង

លោក គីម សំបូរ កូនខ្មែរមួយរូប ដែលគេស្គាល់ថាជា Action Director ក្នុងភាពយន្ត «POWER RANGERS» ថ្មី របស់អាមេរិក និងជាមនុស្សដំបូង ដែលបាននាំយកគុនខ្មែរបញ្ចូលក្នុងភាពយន្តហូលីវូដបរទេស ឆាប់ៗនេះ លោកនឹងបន្តរួមចំណែកផ្សព្វផ្សាយគុនខ្មែរ លើឆាកអន្តរជាតិជាថ្មីម្តងទៀត ក្នុង​កម្មវិធី “មហោស្រពភាពយន្តពិភពលោកអាស៊ី” នៅចុងសប្តាហ៍នេះ។

តាមរយៈការផ្តល់បទសម្ភាសជាមួយកម្ពុជាថ្មី លោក គីម សំបូរ បានឱ្យដឹងថា ​នេះជាឆ្នាំទី៩ហើយ នៃមហោស្រពភាពយន្ត​ពិភពលោកអាស៊ី ដែលនឹងប្រព្រឹត្តិធ្វើឡើង នៅរដ្ឋកាលីហ្វ័រញ៉ា សហរដ្ឋអាមេរិក ដែលឆ្នាំកន្លងៗមក គុនខ្មែរ មិនធ្លាប់មានឱកាសបង្ហាញវត្តមាន លើឆាកដ៏កក្រើកនេះឡើយ។

ដោយឡែកសម្រាប់ឆ្នាំនេះ លោកបញ្ជាក់ថា ជាលើកដំបូងសម្រាប់កម្ពុជា និងសម្រាប់រូបលោកផ្ទាល់ផងដែរ ដែលទទួលបានឱកាសចូលរួមសម្តែងគុនបុរាណខ្មែរ “គុនល្បុក្កតោ” លើឆាកអន្តរជាតិមួយនេះ ដែលកម្មវិធីមហោស្រពនេះ មានការចូលរួមពីតារាហូលីវូដល្បីៗរបស់អាមេរិក និងបុគ្គលល្បីៗ ក្នុងវិស័យភាពយន្តហូលីវូដជាច្រើននាក់ផងដែរ។

បើតាមលោក គីម សំបូរ លោកនឹងប្រើឆាកនេះ ដើម្បីបង្ហាញពិភពលោកឱ្យស្គាល់គុនខ្មែរកាន់តែច្បាស់ ហើយខំឱ្យអស់ពីសមត្ថភាព ប៉ុន្តែចំពោះថាតើ នឹងមានអ្នកគុនល្បុក្កតោមកពីកម្ពុជា រួមសម្តែងជាមួយលោកដែរឬយ៉ាងណា លោកថា “តាមដែលអ្នករៀបចំកម្មវិធីទាក់ទងមកខ្ញុំ គេប្រាប់ថា គេស្វែងរកអ្នកចេះគុនខ្មែរ គ្រប់រដ្ឋនៅសហរដ្ឋអាមេរិក ហើយមានតែខ្ញុំប៉ុណ្ណោះ ដែលចេះគុនល្បុក្កតោខ្មែរ ដោយសារតែគេចង់បាននៅសហរដ្ឋអាមេរិកស្រាប់ ព្រោះការចំណាយមានកំណត់ ដូចនេះ ខ្ញុំក៏មិនច្បាស់ដែរថា មានរៀមច្បងចូលរួមដែរឬអត់”។ គ្រូគុនចម្រុះរូបនេះ បញ្ជាក់ដែរថា លោកនឹងចេញដំណើរទៅសម្តែងនៅទីនោះ រួមជាមួយប្អូនប្រុស នៅថ្ងៃទី១២ ខែវិច្ឆិកា ប៉ុន្មានថ្ងៃខាងមុខនេះ។

គួរបញ្ជាក់ថា លោក គីម សំបូរ មានមូលដ្ឋានគ្រឹះក្បាច់គុនតាំងពីឆ្នាំ២០១០ មកម្ល៉េះ ដោយដំបូងឡើយ លោកជាអ្នក ហាត់គុនថាយជិ គុនសៅលីង ខាងត្បូង-ខាងជើង និងយូដូ ហើយឆ្នាំ២០១៥ លោកបានចាប់ផ្តើមប្រលូកខ្លួន ជាមួយគុនល្បុក្កតោ និងបណ្តុះមហិច្ចតាដ៏ធំ ក្នុងការផ្សព្វផ្សាយគុនខ្មែរនេះតែម្តង៕

កូនខ្មែរម្នាក់ចំណាយពេលឆ្លងប្រទេសរាប់សិបដង ដើម្បីហាត់គុនល្បុក្កតោ…
ក្បាច់គុនខ្មែរ បានបញ្ចូលក្នុងភាពយន្តអាមេរិកដ៏ល្បី POWER RANGERS…