វិស័យឯកជនគាំទ្ររដ្ឋាភិបាលបណ្តុះបណ្តាលជំនាញវិជ្ជាជីវៈដល់យុវជនក្រីក្រ ១លាន ៥សែននាក់

វិស័យឯកជនបានបង្ហាញការគាំទ្រយ៉ាងពេញទំហឹងចំពោះរាជរដ្ឋាភិបាលកម្ពុជាដឹកនាំដោយសម្តេចធិបតីហ៊ុនម៉ាណែត ដែលបានបង្កើតកម្មវិធីបណ្តុះបណ្តាលជំនាញបច្ចេកទេសវិជ្ជាជីវៈដល់យុវជនមកពីគ្រួសារក្រីក្រ និងងាយរងហានិភ័យ​ប្រមាណ១លាន៥សែននាក់ ឱ្យមានជំនាញជាក់លាក់ និងឆាប់ទទួលបានការងារធ្វើដើម្បីលើកកម្ពស់ជីវភាព កាត់បន្ថយ​ការលំបាករបស់ប្រជាពលរដ្ឋ។

ការប្រកាសគាំទ្រពីវិស័យឯកជននេះ បានធ្វើឡើងនៅថ្ងៃទី ១១ វិច្ឆិកា ក្នុងពិធីចុះអនុស្សរណៈរវាងក្រសួងការងារ និងបណ្តុះបណ្តាលវិជ្ជាជីវៈជាមួយសភាពាណិជ្ជកម្មកម្ពុជា និងសមាគមនិយោជកចំនួន១៨ សម្រាប់អ្នកសិក្សា​ជំនាញបច្ចេកទេស និងវិជ្ជាជីវៈនៅមជ្ឈមណ្ឌលពិព័រណ៍ និងសន្និបាតកោះពេជ្រ ។

អ្នកឧញ៉ាគិតម៉េង ប្រធានសភាពាណិជ្ជកម្មកម្ពុជា បានមានប្រសាសន៍ថា« ថ្ងៃនេះបំណងធំគឺបើកយុទ្ធនា​ការកិច្ច​ព្រមព្រៀងមួយយ៉ាងធំ និងមិនដែលមានពីមុនមក ជាមួយក្រសួងការងារក្នុងគោលបំណង ដើម្បីជំរុញ​ធ្វើយ៉ាង​ណាឱ្យសិស្សមានជំនាញពិតប្រាកដហើយដើម្បីឱ្យមានជំនាញពិតប្រាកដ យើងត្រូវបណ្តុះបណ្តាល​ដែលនេះជា​បំណងរបស់រាជរដ្ឋាភិបាលសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងអាណត្តិទី៧នេះ ធ្វើយ៉ាងណាឱ្យកម្លាំងធនធានយើងឱ្យនៅក្នុងស្រុកចៀសវាងចាកចេញទៅក្រៅប្រទេស»។

អ្នកឧញ៉ា គិត ម៉េង បានចាត់ទុកការចុះអនុស្សារណៈនេះ ជាការបើកផ្លូវទាំងសមាគម​និងសភាពាណិជ្ជកម្មទទួល​យកបណ្តុះបណ្តាល ឬហាត់ការ ដើម្បីឱ្យយុវជន​មានជំនាញដោយរំពឹងថា អាចធ្វើការទទួលបានប្រាក់ខែ​សមស្រប​យកទៅចិញ្ចឹមគ្រួសារ។

អ្នកឧញ៉ាគិតម៉េង បានបញ្ជាក់ថា ទោះយ៉ាងណា ការចេញទៅធ្វើការនៅក្រៅប្រទេសនេះវាជារឿងធម្មតាទេ នៅស្រុក​យើង​ក៏មានជនជាតិគេផ្សេងមកធ្វើការនៅប្រទេសយើងដែរ ដែលគេហៅថា ពាណិជ្ជកម្មពលករទៅវិញទៅមក។

ចំណែក អ្នកឧញ៉ា ពុង ឃាវសែ ប្រធានសមាគមអ្នកសាងសង់កម្ពុជា បានលើកឡើងដែរថា «ប្រទេសមួយ​អាចជឿន​លឿន​ទៅបានអាស្រ័យលើធនធានមនុស្សពីព្រោះធនធានមនុស្ស​ជាការប្រកួតប្រជែងនា​សម័យវិទ្យាសាស្ត្រនា​ពេល​បច្ចុប្បន្ននេះ។ យើងត្រូវពឹងពាក់លើយុវជនយើងដែលជាកម្លាំងស្រួចក្នុងនៅក្នុងសង្គមយើង។ បើយុវជនមានចំណេះ​ច្រើនប្រទេសយើងនឹងជឿនលឿនយើងយកឧទាហរណ៍ប្រទេសចិន ដែលជាមហាយក្សមួយនៅលើពិភពលោកនេះ​ហើយមានពាក្យស្លោក​មួយថាបើយុវជនខ្លាំងគឺប្រទេសខ្លាំងយុវជនចេះប្រទេសដើរទៅមុខ»។

អ្នកឧកញ៉ាសង្ឃឹមថា សភាពាណិជ្ជកម្ម និងសមាគមទាំង១៨ ទទួល និងផ្គត់ផ្គង់កូនសិស្សមកហាត់ការ និងចូលមក​ធ្វើការជាជោគជ័យមួយហើយ។

លោក ហេង ​សួរ រដ្ឋមន្ត្រីក្រសួងបណ្តុះបណ្តាលវិជ្ជាជីវៈ បានមានប្រសាសន៍ថា ការបណ្តុះបណ្តាល​ជំនាញវិជ្ជាជីវៈ​ដល់យុវជន១លាន៥សែននាក់នេះ ជោគជ័យទៅបានមិនមែនរាជរដ្ឋាភិបាលម្នាក់ឯងធ្វើបាននោះទេ ទាមទារមានការ​ចួលរួមពីគ្រប់ភាគីពាក់ព័ន្ធរួមមានវិស័យេកជន ដែលត្រូវទទួលអ្នកធ្វើការពិសេសយុវជនខ្លួន​ឯងត្រូវចូលរួមរៀន​ឱ្យចប់​ព្រោះថារៀនជំនាញនេះមានរយៈខ្លីមិនគិតថ្លៃនិងថែមទាំងទទួលបានការជួយឧបត្ថម្ភពីរាជរដ្ឋាភិបាលចំនួន៧០ដុល្លារក្នុង១ខែទៀតផង។

លោករដ្ឋមន្ត្រីរំពឹងថាទោះបីសិស្សដែលបណ្តុះបណ្តាលនេះមានកម្រិតត្រឹមសញ្ញាបត្របត្រវិជ្ជាជីវៈកម្រិត១ក៏ពិតមែនតែក៏មានការផ្សារភ្ជាប់ជាមួយនឹងបច្ចេកវិទ្យានិបច្ចេកទេសចុងក្រោយផងដែរ។ដូច្នេះសង្ឃឹមថាសិស្ស១លាន៥សែន​នាក់​ដែល​នឹងបណ្តុះបណ្តាលរយៈពេល៥ឆ្នាំខាងមុខនេះនឹងអាចឆ្លើយតបបានតាមតម្រូវការទីផ្សារ ដើម្បីឱ្យប្រទេសកម្ពុជា ក្លាយជា​ប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០២៣០និងកម្រិតខ្ពស់នៅឆ្នាំ២០៥០។

គួរបញ្ជាក់ថា គម្រោងបណ្តុះបណ្តាលជំនាញបច្ចេកទេសនិងវិជ្ជាជីវៈដល់យុវជនក្រីក្រ និងងាយរងហានិភ័យនេះ នឹងប្រ​កាស​ជាផ្លូវការ ដោយសម្តេចមហាបវរធិបតី ហ៊ុន ម៉ាណែតនាយករដ្ឋមន្ត្រីនៃព្រះរាជាណាចក្រកម្ពុជានៅថ្ងៃទី១៤ខែ វិច្ឆិកាឆ្នាំ ២០២៣ ខាងមុខ៕

អត្ថបទ៖ សំអឿន