សម្ដេចតេជោ ហ៊ុន សែនអះអាងថា ​ការដឹកនាំរបស់​រណ​​សិរ្ស​សាមគ្គី​អភិវឌ្ឍន៍មាតុភូមិកម្ពុជាជាង ៤ ទស្សវត្សរ៍ឆ្លើយ​តបតាមបំណងប្រាថ្នាប្រជាជន

សម្ដេចតេជោ ហ៊ុន សែន ប្រធាន​គណបក្សប្រជាជនកម្ពុជាមានប្រសាសន៍នៅថ្ងៃទី ១៥ ខែវិច្ឆិកា ឆ្នាំ ២០២៣នេះថា ​រណ​សិរ្ស​សាមគ្គី​អភិវឌ្ឍន៍មាតុភូមិកម្ពុជាដែលមានអាយុកាលជាង ៤ ទស្សវត្សរ៍បានផ្ដល់មេរៀន និងបទពិសោធន៍​សម្រាប់ប្រទេសដោយការដាក់ចេញត្រឹមត្រូវនូវមាគានយោបាយ​​ យុទ្ធសាស្ត្រដឹកនាំរយៈពេល ៤៥ ឆ្នាំ ​កន្លងមក​ដែលមានលក្ខណៈប្រាកដនិយម​ឆ្លើយតបទៅនឹងបំណងប្រាថ្នារបស់ប្រជាជនដែលស្របទៅនឹងការវិវត្តនៃសភាពការណ៍ជាតិ​ អន្តរជាតិ។

សម្តេចតេជោ ហ៊ុន សែនមានប្រសាសន៍នៅក្នុងពិធីរៀបចំមហាសន្និបាតរណសិរ្សសាមគ្គី អភិវឌ្ឍន៍មាតុភូមិកម្ពុជាលើកទី៦ ដែលធ្វើឡើងនៅសណ្ឋាគារសុខាភ្នំពេញនៅព្រឹកថ្ងៃទី ១៥ ខែវិច្ឆិកា ឆ្នាំ ២០២៣។

សម្ដេចតេជោ ហ៊ុន សែន បានបន្តថា ប្រជាជនកម្ពុជា​ជាចលករមិនអាចខ្វះបាន​ក្នុងការតស៊ូរំដោះជាតិ ការករសាងរំដោះប្រទេស​ និងជាមូលដ្ឋានគ្រឹះសម្រាប់ទ្រទ្រង់​ឱកាសដឹកនាំខាងនយោបាយ​ សង្គមជាតិ​។ ហើយថា សាមគ្គីភាពជាកត្តាស្លាប់រស់របស់ជាតិ​ ដើម្បីមានសាមគ្គីភាព និងមាគារដឹកនាំត្រឹមត្រូវ​ ត្រូវតែធានាការអនុវត្ត​គោលការណ៍លទ្ធិប្រជាធិបតេយ្យ​ សេរីភាព និងនិតិរដ្ឋ និងត្រូវចូលរួមទប់ស្កាត់រាល់សកម្មភាព​ បង្ករអនាធិបតេយ្យ​ធ្វើឱ្យ​ហមហន្តរាយដល់ប្រទេសជាតិ។

​សម្ដេចតេជោ ហ៊ុន សែនបញ្ជាក់ថា សន្តិភាព និងស្ថិរភាព ជាមូលដ្ឋានគ្រឹះសម្រាប់ការអភិវឌ្ឍ ហើយការអភិវឌ្ឍប្រកបដោយបរិយាប័ន និងសមធម៌គឺជាល​ខក្ខណ្ឌ​ចាំបាច់​សម្រាប់ធានា និងពង្រឹងសន្តិភាព និងស្ថិរភាពសង្គម។ ​ហើយការលើកកម្ពស់មនសិការ ស្មារតីទទួលខុសត្រូវខ្ពស់ និងការ​ពារឯក​រាជ្យ ​អធិបតេយ្យជាតិឱ្យបានគង់វង្សនៅគ្រប់កាលៈទេសៈ និងស្ថានភាព។

​«ប្រជាជនកម្ពុជាប្រកាន់ភ្ជាប់ជាជំហរម្ចាស់ប្រទេស មានជំនឿលើកម្លាំង និងការប្រឹងប្រែងរបស់ខ្លួន​ធ្វើឱ្យកម្ពុជាសម្រេចបានសន្តិភាពពេញលេញ ​តាមរយៈ​នយោបាយឈ្នះ ឈ្នះ ដែលកម្ពុជាបានដាក់ចេញខ្លួនឯងដែលផ្អែកលើសាមគ្គីភាព ឆន្ទៈ បញ្ញា និងភាពក្លាហាន»។ សម្ដេចតេជោ ហ៊ុន សែន បន្ថែម។​

កម្ពុជាបានរឹតចំណងមិត្តភាព​ សាមគ្គីភាព ​និងកិច្ចសហប្រតិបត្តិការដ៍ល្អជាមួយបណ្ដាប្រទេសលើពិភពលោក ដោយគោរព​ឯករាជ្យ អធិបតេយ្យ​ បូរណភាពទឹកដី ស្មើភាពស្មើសិទ្ធិផ្ដល់ផលប្រយោជន៍គ្នាទៅវិញទៅមក​ដើម្បីការអភិវឌ្ឍលើគ្រប់វិស័យ​ប្រកបដោយចីរភាព​ទាំងបច្ចុប្បន្ន និងអនាគត៕