ប្រព័ន្ធលូបង្ហូរទឹកស្អុយនៅខេត្តរតនៈគិរីកំពុងជះក្លិនមិនល្អដល់ផ្លូវដង្ហើមប្រជាពលរដ្ឋ

ហេដ្ឋារចនាសម្ព័ន្ធផ្លូវថ្នល់នៅតាមបណ្ដាស្រុកមួយចំនួនជាពិសេសនៅក្នុងខេត្តរតនគិរី ត្រូវបានរៀបចំធ្វើខ្វែងខ្វាត់គ្រប់ទីកន្លែងក្រោមការដឹកនាំរបស់លោក ញ៉ែម សំអឿន និងតាមគោលនយោបានរបស់រាជរដ្ឋាភិបាល។ ប៉ុន្ដែទន្ទឹមនឹងការរីកចម្រើនផ្នែកហេដ្ឋារចនាសម្ព័ន្ធផ្លូវថ្នល់ខ្វាត់ខ្វែងគួរឲ្យកត់សម្គាល់ តែប្រព័ន្ធលូបង្ហូរទឹកមួយចំនួនមិនត្រូវបានរៀបចំឲ្យបានត្រឹមត្រូវដើម្បីរំដោះទឹកចេញនោះទេ។  

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងប្រព័ន្ធលូមួយកន្លែងនៅត្រង់ចំណុចជើងវត្តភ្នំស្វាយ ទល់មុខស្ថានីយ៍ប្រេងឥន្ធនៈតេលា ស្ថិតក្នុងភូមិ៧មករា សង្កាត់ឡាបានសៀក ក្រុងបានលុង ប្រព័ន្ធលូនោះបានកកស្ទះជាច្រើខែឆ្នាំធ្វើឲ្យទឹកស្អុយហៀរហូរចេញមកខាងក្រៅ ប្រសាចពេញចិញ្ចើមផ្លូវ ជះក្លិនស្អុយសាយភាយបង្កឲ្យប៉ះពាល់ផ្លូវដង្ហើមប្រជាពលរដ្ឋ និងអ្នកធ្វើដំណើរយ៉ាងធ្ងន់ធ្ងរទៀតផងដែរ។

ទាក់ទិនការលើកឡើងខាងលើនេះ លោក ឃឹម រមនី អនុប្រធានមន្ទីរសាធារណការ និងដឹកជញ្ជូនខេត្តរតនគីរី កម្ពុជាថ្មីបានទាក់ទងតាមប្រព័ន្ធតេលេក្រាមលោកបានឆ្លើយថា បានរាយការណ៍ជូនទៅមេរួចហើយដែរ។ ជុំវិញការលើកឡើងខាងលើមន្ត្រីជំនាញផ្នែកសាធារណការដែលមានលោក ឃឹម រមនី មិនបានបំភ្លឺបញ្ជាក់ថា នឹងត្រូវធ្វើ ឬក៏ជួសជុលយ៉ាងណានៅឡើយទេ។

កន្លងមកប្រព័ន្ធលូបង្អូរទឹកស្អុយមួយកន្លែងនេះ ខាងមន្ទីរមន្ត្រីសាធារណការនិងដឹកជញ្ជូនខេត្តធ្លាប់បានជួសជុលម្តងរួចមកហើយដែរ ប៉ុន្តែនៅតែស្ទុះទឹកមិនហូរ ហើយគម្របលូក៏បានបាក់សង្ស័យឡានដឹកប្រេងសាំងបើកបរឆ្លងកាត់ទីនោះបណ្តាលឲ្យបាក់ក៏អាចថាបាន។ ទឹកហ៊ាហូរចេញមកខាងក្រៅនៅជាប់ផ្លូវជាតិលេខ៧៨ ធ្វើឲ្យជះក្លិនអាសោចដល់បងប្អូនប្រជាពលរដ្ឋ ដែលធ្វើដំណើរតាមដងផ្លូវ ជាពិសេសភ្ញៀវជាតិនិងអន្តរជាតិ ដែលចូលមកលេងកំសាន្តនៅខេត្តរតនគីរី ធ្វើឲ្យអាប់អោនថ្នាក់ដឹកនាំខេត្តតែម្ដង៕

អត្ថបទ៖ វុទ្ធឦសាន