ព័ត៌មានជាតិ

បុណ្យអុំទូកឆ្នាំនេះ ខេត្តកណ្ដាល បញ្ជូនទូកចូលរួមប្រណាំងជាង ១០០ ទូក

បានផុស

៣ years មុន

នៅ

ថ្ងៃពុធ ២២ វិច្ឆិកា ២០២៣

ដោយ

នៅក្នុងព្រះរាជពិធីបុណ្យអុំទូក អកអំបុក សំពះព្រះខែ និងបណ្ដែតប្រទីប ឆ្នាំនេះ ខេត្តកណ្ដាល នឹងបញ្ជូនទូកចូលរួមប្រណាំងប្រមាណជាង ១០០ ទូក ចំណោមទូកសរុបជាង ៣៣០ ទូក មកពីតាមបណ្តារាជធានី-ខេត្ត ទូទាំងប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកិច្ចប្រជុំអនុគណៈកម្មការគ្រប់គ្រងទូក និងកន្លែងស្នាក់នៅ ដើម្បីចូលរួមព្រះរាជពិធីបុណ្យអុំទូកនៅរាជធានីភ្នំពេញ កាលពីថ្ងៃទី ២១ វិច្ឆិកា លោក នុត ពុធដារ៉ា អភិបាលរងខេត្តកណ្តាល បានមានប្រសាសន៍ថា នៅក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ ២០២៣ នេះ ខេត្តកណ្តាល មានទូកចូលរួមប្រណាំងសរុប ១០១ ទូក។

ក្នុងកិច្ចប្រជុំនេះ លោកអភិបាលរងខេត្ត បានក្រើនរំលឹកដល់អនុគណៈកម្មការគ្រប់គ្រងទូកទាំងអស់ ត្រូវបង្កើតគណៈកម្មការគ្រប់គ្រង សន្តិសុខ សណ្ដាប់ធ្នាប់ និងកន្លែងស្នាក់នៅដល់កីឡាកររបស់ខ្លួន និងណែនាំដល់កីឡាករទាំងអស់ ឲ្យគោរពតាមបទបញ្ជាផ្ទៃក្នុងដែលបានដាក់ចេញ។ ទន្ទឹមនោះ ត្រូវមានវិន័យក្នុងការស្លៀកពាក់ឲ្យបានសមរម្យ ហាមបង្កជាអំពើហិង្សា និងក្រមសីលធម៌ក្នុងពេលប្រកួត។

គួរបញ្ជាក់ថា ព្រះរាជពិធីបុណ្យអុំទូក អកអំបុក សំពះព្រះខែ និងបណ្តែតប្រទីប ឆ្នាំនេះ នឹងប្រព្រឹត្តិទៅរយៈពេល ៣ ថ្ងៃ ចាប់ពីថ្ងៃទី ២៦-២៨ ខែវិច្ឆិកានេះ ដោយមានទូកចូលរួមប្រកួតប្រមាណ ៣៣៤ ទូក បន្ទាប់ពីបានខកខានរៀបចំរយៈពេល ៣ ឆ្នាំ ដោយសារបញ្ហាជំងឺកូវីដ-១៩៕

អត្ថបទ ៖ សំអឿន