មកស្គាល់បេក្ខនារីប្រឡងបាក់ឌុបមួយរូបដែលជាប់និទ្ទេសA លើគ្រប់មុខវិជ្ជា

នៅរសៀលថ្ងៃទី២៣ ខែវិច្ឆិកា ឆ្នាំ២០២៣នេះ ក្រសួងអប់រំ យុវជន និងកីឡា  បានប្រកាសនូវលទ្ធផលនៃការ ប្រឡងបាក់ឌុបសម័យប្រឡងថ្ងៃទី៦-៧ ខែវិច្ឆិកា សម្រាប់រាជធានីភ្នំពេញផ្ទាល់ និងខេត្តកណ្ដាល។ បើតាមរបាយការណ៍ពីក្រសួងអប់រំ ក្នុងចំណោមបេក្ខជនដែលបានប្រឡងជាប់ចំនួនសរុបចំនួន៩៨ ៤៦០នាក់ គឺមានសិស្សជាប់និទ្ទេស A ចំនួន ១ ៦៧៣នាក់។

ក្នុងចំណោមបេក្ខជនដែលប្រឡងបាននិទ្ទេស A ចំនួន ១ ៦៧៣នាក់នេះ​ គេសង្គេតឃើញថាមានបេក្ខនារីម្នាក់ទទួលបាននិទ្ទេស A លើគ្រប់មុខវិជ្ជា។ និទ្ទេស A  លើគ្រប់មុខវិជ្ជាពោល គឺបេក្ខនារី ឈ្មោះ ឡេង សុគន្ធផុស្សតី វ័យ១៧ឆ្នាំ​ ដែលជាយុវសិស្សសិក្សាថ្នាក់វិទ្យាសាស្ត្រពិត ទទួលបានលំដាប់ពិន្ទុ៩៩.៩៩៩។

ក្នុងចំណោមមុខវិជ្ជាទាំង៧មុខ ដែលបេក្ខនារីដែលមកពីវិទ្យាល័យស៊ីសុវត្ថិរូបនេះបានប្រឡង បេក្ខនារីរូបនេះទទួលបាន និទ្ទេស Aលើមុខវិជ្ជាអក្សរសាស្រ្តខ្មែរ, និទ្ទេស Aលើមុខវិជ្ជាគណិតវិទ្យា, និទ្ទេស Aលើមុខវិជ្ជាជីវវិទ្យា,និទ្ទេស Aលើមុខវិជ្ជាប្រវត្តិវិទ្យា,និទ្ទេស Aលើមុខវិជ្ជាគីមីវិទ្យា, និទ្ទេស Aលើមុខវិជ្ជារូបវិទ្យា និងនិទ្ទេស Aលើមុខវិជ្ជាភាសាអង់គ្លេស។

គួរឱ្យដឹងដែរថា​ នៅក្នុងសម័យប្រឡងបាក់ឌុបឆ្នាំ២០២៣នេះ គឺមានបេក្ខជនចុះឈ្មោះប្រឡងសរុបចំនួន ១៣៧ ៤១២នាក់ ស្រី ៧៣ ២៧៨នាក់ មណ្ឌលប្រឡងសរុប ២២៧ ស្មើនឹង ៥ ៥៤៣បន្ទប់។ ជាលទ្ធផលនៃការប្រឡងបាក់ឌុបឆ្នាំ២០២៣នេះ បេក្ខជនប្រឡងជាប់សរុប ៩៨ ៤៦០ នាក់ ត្រូវជា ៧២,៨៩ ភាគរយនៃចំនួន បេក្ខជនមកប្រឡង ។ បេក្ខជនជាប់និទ្ទេស A ចំនួន ១ ៦៧៣ នាក់, និទ្ទេស B ចំនួន ៦ ៩៦៤ នាក់និទ្ទេស C ចំនួន ១៨ ៣០៨ នាក់, និទ្ទេស D ចំនួន ៣៤ ២៤៦ នាក់, និង និទ្ទេស E ចំនួន ៣៧ ២៦៩ នាក់៕

ដោយ៖ង៉ិល ណារ៉ាត់