នាវាចម្បាំងប្រឆាំងនាវាមុជទឹកកងទ័ពជើងទឹក​រុស្សីចូលចតនៅកំពង់ផែស្វយ័តក្រុងព្រះសីហនុ

នាវាចម្បាំងកងទ័ពជើងទឹកសហព័ន្ធរុស្ស៉ី ១ គ្រឿងបានចូលចតនៅកំពង់ផែស្វយ័តក្រុងព្រះសីហនុប្រកបដោយសុវត្ថិភាពនៅម៉ោងប្រមាណ ១០ ព្រឹកថ្ងៃទី ២៦ ខែវិច្ឆិកា ឆ្នាំ ២០២៣ ក្នុងដំណើរ​ទស្សនៈកិច្ចនិងរិតចំណងសាមគ្គីភាពរវាងប្រទេស​​ទាំងពីរ ព្រះរាជាណាចក្រកម្ពុជានិងសហព័ន្ធរស្ស៉ី។

តាមការគ្រោងទុក នាវាកងទ័ពជើងទឹកនេះនឹង​ឈប់សំចតមានរយៈពេល ៤ ថ្ងៃ ដោយគិតចាប់ពីថ្ងៃទី ២៦ ដល់ថ្ងៃទី ២៩ ខែ វិច្ឆិកា ឆ្នំ២០២៣។ ក្នុងឱកាសនៃការចូលចតនេះ គេសង្កេត​ឃើញវត្តមានរបស់មន្ត្រីជាច្រើននាក់មកពីស្ថានទូតរុស្ស៉ីប្រចាំនៅព្រះរាជាណាចក្រកម្ពុជា និងនាយ នាយរងកងទ័ពជើងទឹកមូលដ្ឋានសមុទ្ររាម ជាច្រើននាក់បានមកទទួលស្វាគមន៌យ៉ាងកក់ក្តៅផងដែរ។

មន្ត្រីកងទ័ពជើងទឹកបានឲ្យដឹងថា គណៈប្រតិភូនៅលើនាវានេះដឹកនាំដោយលោកវរនាវីឯក Alexey Antsiferov ជាប្រធាន។

លក្ខណៈបច្ចេកទេសនាវាឈ្មោះ Admiral Panteleev ជាប្រភេទនាវាប្រឆាំងនាវាមុជទឹកដ៏ធំ។ ទំងន់ផ្ទុក ៧៥៩៥ តោន មាន​ប្រវែង ១៦២,៨ ម៉ែត្រ ទទឹង ១៩.០២ ម៉ែត្រ ជំរៅទឹក ៦.២ ម៉ែត្រ និង​មាននាវិកសរុបចំនួន ៣៨៨ នាក់ ( នាយនាវី ៣៨ នាក់ និងនាវិក ៣៥០ នាក់។

ក្នុងដំណើរទស្សនកិច្ចនៅព្រះរាជាណាចក្រកម្ពុជារបសនាវាកងទ័ពជើងទឹកសហព័ន្ធរុស្ស៊ីនាពេលនេះ ក្នុងគោលបំណង អភិវឌ្ឍកិច្ចសហប្រតិបត្តិការយោធាទ្វេភាគី​ក៏ដូចជាការបំពេញការផ្គត់ផ្គង់និងដំណើរទស្សនកិច្ចរបស់នាវិក។

ក្នុងដំណើរទស្សនកិច្ចនៅកំពង់ផែស្វយ័តក្រុងព្រះសីហនុ មេបញ្ជាការនាវាមានគម្រោងចូលជួបសំដែងការគួរសមជាមួយមេបញ្ជាការកងទ័ពជើងទឹកមូលដ្ឋានសមុទ្ររាម ចូលជួបសម្តែងការគួសមអ្នកគ្រប់គ្រងកំពង់ផែស្វយ័តក្រុងព្រះសីហនុ ចូល​សម្តែងការគួរសមជាមួយលោកអភិបាលក្រុងព្រះសីហនុ និងបើកឱកាស​ឲ្យ​ប្រជាជនរុស្សុី គ្រូបង្រៀន និងសិស្សានុសិស្ស​កម្ពុជាចូលទស្សនានាវាកងទ័ពជើងទឹករុស្សុី ព្រមទាំងមានកម្មវិធីប្រកួតកីឡាបាល់ទាត់ បាល់ទះមិត្តភាពរវាងកងទ័ពជើងទឹកទាំងពីរកម្ពុជា កងទ័ពជើងទឹករុស្សុីផងដែរ៕

អត្ថបទ៖ ស៊ុយ ចាន់ធា