លោក ប៉ែន បូណា៖ មានសន្ដិភាព ទើបមានបុណ្យអុំទូកដ៏សប្បាយរីករាយនាពេលនេះ!

លោក ប៉ែន បូណា អ្នកនាំពាក្យរាជរដ្ឋាភិបាលកម្ពុជា បានលើកឡើងនៅលើទំព័រហ្វេសប៊ុករបស់ខ្លួនថា មានសន្ដិភាព ទើបមានបុណ្យអុំទូកដ៏សប្បាយរីករាយនាពេលនេះ។

តាមរយៈការលើកឡើងរបស់លោក ប៉ែន បូណា បានឲ្យដឹងថា នៅឆ្នាំនេះប្រជាពលរដ្ឋកម្ពុជាពិតជាមានសេចក្ដីរីករាយសាទរ ក្រោយពីរាជរដ្ឋាភិបាលអាណត្តិទី៧ បានប្រកាសពីការរៀបព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុកឡើងវិញ ជាពិសេសគឺការប្រណាំងទូកងរ ដែលបានបង្កើតទស្សនីភាពសប្បាយរីករាយ ក្រោយការខកខាតប្រារព្ធធ្វើអស់រយៈពេលជាច្រើនឆ្នាំមកនេះ។ ហេតុផលទាំងអស់នេះ ដោយព្រោះប្រទេសទទួលបានសុខសន្ដិភាព ក្រោមការដឹកនាំដ៏ល្អពីរាជរដ្ឋាភិបាល ធ្វើយ៉ាងណាឲ្យប្រជាជនរស់នៅសុខស្រួល និងសុវត្ថិភាព គ្រប់ទីកន្លែង ព្រមទាំងដឹងសុខទុក្ខពីប្រជាពលរដ្ឋគ្រប់ស្រទាប់វណ្ណៈ។

លោក ប៉ែន បូណា បានលើកឡើងថា ប្រជាពលរដ្ឋខ្មែរនិងភ្ញៀវទេសចរបរទេសយ៉ាងច្រើនកុះករបានចូលរួមពិធីបុណ្យអុំទូកយ៉ាងសប្បាយរីករាយនៅមុខព្រះបរមរាជវាំងនិងទីកន្លែងជាច្រើនទៀតក្នុងរាជធានីភ្នំពេញ។ នៅតាមបណ្តាខេត្តនានាក៏ទទួលបានភ្ញៀវជាតិនិងបរទេសយ៉ាងច្រើនដែរ។ ជាក់ស្តែង ពិធីបុណ្យអុំទូកឆ្នាំនេះអាចរៀបចំធ្វើបានដោយសារតែរាជរដ្ឋាភិបាលអាណត្តិទី៧ ដឹកនាំដោយសម្តេចធិបតី ហ៊ុន ម៉ាណែត ធានាការពារបាននូវសុខសន្តិភាពដែលរកបានដោយកម្រនិងជាសមិទ្ធផលនៃកិច្ចខិតខំប្រឹងប្រែងដ៏លំបាកបំផុតរបស់សម្តេចតេជោ ហ៊ុន សែន។ ខណៈដែលពលរដ្ឋខ្មែរកំពុងសប្បាយ រីករាយ មនុស្សរាប់រយលាននាក់លើពិភពលោកគ្មានឱកាសបែបនេះទេដោយពួកគេកំពុងរងទុក្ខវេទនាដោយសារការបាត់បង់សន្តិភាពហើយសង្គ្រាមកំពុងកើតឡើងនៅក្នុងប្រទេសរបស់ខ្លួន។

លោកបានបន្ដថា នេះគឺជាហេតុផលដែលត្រូវចាត់ទុក ការធានាការពារបាននូវសន្តិភាព គឺជាសមិទ្ធផលទី១របស់រាជរដ្ឋាភិបាលអាណត្តិទី៧ដឹកនាំដោយសម្តេចធិបតី ហ៊ុន ម៉ាណែត។ ដោយសារសន្តិភាព ទើបយើងអាចប្រារព្ធបុណ្យអុំទូកដ៏សប្បាយរីករាយបែបនេះបាន៕