ព័ត៌មានជាតិ

កិច្ចប្រជុំកំពូលសភាកម្ពុជា-ឡាវ-វៀតណាម លើកទី ១ ចាប់ផ្ដើមនៅថ្ងៃទី ៥ ធ្នូ

បានផុស

៣ years មុន

នៅ

ថ្ងៃអង្គារ ៥ ធ្នូ ២០២៣

ដោយ

កិច្ចប្រជុំកំពូលសភាកម្ពុជា-ឡាវ-វៀតណាម (CLV) លើកទី ១ ដែលរដ្ឋសភាប្រទេសឡាវធ្វើជាម្ចាស់ផ្ទះ បានប្រារព្ធពិធីបើកជាផ្លូវការ កាលពីព្រឹកថ្ងៃទី ៥ ខែធ្នូ ឆ្នាំ ២០២៣ នៅសណ្ឋាគារ Crowne Plaza នាទីក្រុងវៀងចន្ទន៍ ដោយមានថ្នាក់ដឹកនាំជាន់ខ្ពស់របស់រដ្ឋសភា នៃប្រទេសកម្ពុជា ឡាវ និងវៀតណាម ព្រមទាំងគណៈប្រតិភូពាក់ព័ន្ធជាច្រើនទៀត រួមមាន តំណាងក្រសួងសំខាន់ៗ និងអាជ្ញាធរមូលដ្ឋានពាក់ព័ន្ធ នៃប្រទេសទាំងបី ព្រមទាំងដៃគូអភិវឌ្ឍន៍នានា ចូលរួមជាច្រើនរយនាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីបើកជាផ្លូវការ នៃកិច្ចប្រជុំកំពូលសភា CLV បានប្រារព្ធធ្វើឡើងក្រោមអធិបតីភាពដ៏ខ្ពង់ខ្ពស់ ឯកឧត្ដមបណ្ឌិត សាយ សំផន ភុមវិហាន (XAYSOMPHONE Phomvihane) ប្រធានរដ្ឋសភាឡាវ និង ឯកឧត្ដម ថងលុន ស៊ីសុលីត (THONGLOUN Sisoulith) ប្រធានរដ្ឋឡាវ។

ថ្នាក់ដឹកនាំប្រទេសឡាវ បានលើកឡើងពីសារៈសំខាន់ នៃការជួបជុំជាប្រវត្តិសាស្ត្រនេះថា នឹងលើកកម្ពស់យន្តការសភា នៅក្នុងការចូលរួម និងជំរុញការអភិវឌ្ឍតំបន់អភិវឌ្ឍន៍ត្រីកោណ (CLV-DTA) ដែលបង្កើតឡើងដោយរដ្ឋាភិបាលប្រទេសទាំងបី កាលពីឆ្នាំ ១៩៩៩ ឱ្យកាន់តែមានប្រសិទ្ធភាព និងប្រសិទ្ធផល នាំមកផលប្រយោជន៍រួមដល់ប្រជាពលរដ្ឋរស់នៅតំបន់នោះ។

ក្នុងសុន្ទរកថាបើកកិច្ចប្រជុំជាផ្លូវការ ឯកឧត្តមបណ្ឌិត សាយ សំផន ភុមវិហាន ប្រធានរដ្ឋសភាឡាវ និង ឯកឧត្តម ថងលុន ស៊ីសុលីត ប្រធានរដ្ឋឡាវ បានវាយតម្លៃខ្ពស់ចំពោះការជួបជុំគ្នារបស់តំណាងប្រជាពលរដ្ឋនាឱកាសនេះ ថា នឹងជំរុញលើកកម្ពស់កិច្ចសហប្រតិបត្តិការរវាងប្រទេសទាំងបីកាន់តែរឹងមាំ និងមានប្រសិទ្ធភាពខ្ពស់ឡើង ដើម្បីផលប្រយោជន៍ប្រទេសទាំងបី ជាពិសេសការលើកកម្ពស់ជីវភាពរបស់ប្រជាពលរដ្ឋក្នុងតំបន់អភិវឌ្ឍន៍ត្រីកោណ (CLV-DTA)។

កិច្ចប្រជុំកំពូលសភា CLV នាពេលនេះ បានលើកកម្ពស់កម្រិតពីកិច្ចប្រជុំកម្រិតគណៈកម្មការជំនាញ នៃរដ្ឋសភាប្រទេសទាំងបី ដែលបានជួបជុំគ្នាជាប្រចាំនាពេលកន្លងមក។ តំបន់អភិវឌ្ឍន៍ត្រីកោណ នៃប្រទេសទាំងបីមានចំនួន ១៣ ខេត្ត ប្រទេសវៀតណាម ៥ ខេត្ត ប្រទេសឡាវ ៤ ខេត្ត និងព្រះរាជាណាចក្រកម្ពុជា មានចំនួន ៤ ខេត្ត ជាអាទិ៍ ខេត្តរតនគិរី ខេត្តមណ្ឌលគិរី ខេត្តក្រចេះ និងខេត្តស្ទឹងត្រែង។

គោលដៅប្រែក្លាយតំបន់ត្រីកោណអភិវឌ្ឍន៍ឱ្យក្លាយទៅជាតំបន់សន្តិភាព កិច្ចសហប្រតិបត្តិការ និងអភិវឌ្ឍន៍ប្រកបដោយបរិយាបន្ន និងនិរន្តរភាព ដែលជាទស្សនៈដើមរបស់ សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីកម្ពុជា។

តំបន់អភិវឌ្ឍន៍ត្រីកោណ នៃប្រទេសទាំងបី ជាតំបន់ប្រកបដោយសក្តានុពល មានធនធានធម្មជាតិ និងជីវចម្រុះជាច្រើនវិស័យ។ កិច្ចប្រជុំនាឱកាសនេះ សង្ឃឹមថានឹងលើកកម្ពស់យន្តការសភា នៅក្នុងការចូលរួមជាមួយរដ្ឋាភិបាលប្រទេសទាំងបី ក្នុងការអភិវឌ្ឍតំបន់អភិវឌ្ឍន៍ត្រីកោណ CLV ជាពិសេសការពង្រឹងទំនាក់ទំនងរដ្ឋសភា ប្រជាជន និងប្រជាជន នឹងត្រូវបានលើកកម្ពស់ក្នុងការពង្រឹងកិច្ចសហប្រតិបត្តិការបន្ថែមទៀតរវាងប្រទេសទាំងបីនៅគ្រប់កម្រិត និងគ្រប់វិស័យ ដើម្បីដោះស្រាយបញ្ហាប្រឈម ជាពិសេសការកៀរគរធនធានហិរញ្ញវត្ថុ ដើម្បីចូលរួមកសាង និងអភិវឌ្ឍន៍តំបន់អភិវឌ្ឍន៍ត្រីកោណឱ្យក្លាយទៅជាមជ្ឈមណ្ឌលសេដ្ឋកិច្ច ពាណិជ្ជកម្ម ទេសចរណ៍ និងបច្ចេកវិទ្យា ជាដើម៕