មកដល់ពេលនេះ នៅកម្ពុជាមានវត្តអារាមសរុប៥ ១៣៣វត្ត ខណៈព្រះសង្ឃមានជិត៧ម៉ឺនអង្គ

នៅកម្ពុជាមានវត្តអារាមព្រះពុទ្ធសាសនានៅគ្រប់ទិសទីទូទាំងប្រទេស ដែលគិតមកដល់ពេលនេះ មានវត្តអារាមសរុប៥ ១៣៣វត្តហើយ និងមានព្រះសង្ឃសរុបចំនួន៦៨ ៩៦៧អង្គ។ នេះបើតាមរបាយការណ៍របស់លោក ចាយ បូរិន រដ្ឋមន្ត្រីក្រសួងធម្មការ និងសាសនា។

ក្នុងពិធីបើកអនុសំវច្ឆរមហាសន្និបាតមន្ត្រីសង្ឃទូទាំងប្រទាំង នាថ្ងៃទី១៤ ខែធ្នូ ឆ្នាំ២០២៣ លោក ចាយ បូរិន បានថ្លែងឱ្យដឹងថា៖ បច្ចុប្បន្ន ក្រោមដំបូលនៃសន្តិភាព វត្តអារាមត្រូវបានកសាងជាបន្តបន្ទាប់ពាសពេញប្រទេស នៅគ្រប់រាជធានី ខេត្ត ក្រុង ស្រុក ខណ្ឌ ក្នុងនោះ ព្រះពុទ្ធសាសនាថេរវាទ មានវត្តសរុបចំនួន៥ ១៣៣វត្ត (មហានិកាយមាន៤ ៨៦៦វត្ត និងធម្មយុត្តិកនិកាយមាន២៦៧វត្ត)។

ក្នុងចំណោមវត្តប្រមាណជាង៥ ១០០វត្តនេះ មានព្រះសង្ឃគង់សរុបចំនួន៦៨ ៩៦៧អង្គ ក្នុងនោះ ព្រះសង្ឃគណៈមហានិកាយមានចំនួន៦៦ ៦០៩អង្គ ខណៈព្រះសង្ឃគណៈធម្មយុត្តិកនិកាយចំនួន២ ៣៥៨អង្គ។ របាយការណ៍របស់លោករដ្ឋមន្ត្រី ក៏បានឱ្យដឹងដែរថា បច្ចុប្បន្ននេះ កម្ពុជា មានអាចារ្យ អាចារិនី ដែលទទួលបានការបណ្តុះបណ្តាលពីក្រសួងធម្មការ និងសាសនា មានរហូតទៅដល់ចំនួន១១ ៣៨៨រូបផងដែរ។

ចំពោះវិស័យពុទ្ធិកសិក្សាវិញ ត្រូវបានលោករដ្ឋមន្ត្រី ចាយ បូរិន អះអាងថា មានសាលាធម្មវិន័យ ថ្នាក់ត្រី ទោ ឯក សរុបចំនួន៥២៩សាលានៅទូទាំងប្រទេស ដែលមានសមណសិស្ស-សិស្សចំនួន១០ ៩៩២អង្គ/នាក់។ បន្ថែមពីនេះ ក៏មានពុទ្ធិកសិក្សា ចាប់ពីកម្រិតបឋមសិក្សា រហូតដល់កម្រិតឧត្តមសិក្សា ជាអាទិ៍ ពុទ្ធិកបឋមសិក្សា មានចំនួន៩៥០សាលា មានសមណសិស្ស-សិស្សចំនួន២៥ ០៤៥ អង្គ/នាក់ ពុទ្ធិកមធ្យមសិក្សាបឋមភូមិ មានចំនួន៣៨សាលា មានសមណសិស្ស-សិស្សសរុបចំនួន៥ ៩៣៣អង្គ/នាក់ និងពុទ្ធិកមធ្យមសិក្សាទុតិយភូមិមានចំនួន១៤សាលា ដែលមានសមណសិស្ស- សិស្សចំនួន២ ០៩៦ អង្គ/នាក់។

ពុទ្ធិកសាកលវិទ្យាល័យមានចំនួន៣ គឺពុទ្ធិកសាកលវិទ្យាល័យព្រះសីហនុរាជ ពុទ្ធិកសាកលវិទ្យាល័យព្រះសីហមុនីរាជា និងពុទ្ធិកសាកលវិទ្យាល័យសម្តេចអគ្គមហាសេនាបតីតេជោ ហ៊ុន សែន។ ក្នុងនោះ ពុទ្ធិកសាកលវិទ្យាល័យព្រះសីហនុរាជ មាន២សាខាបន្ថែមទៀត នៅខេត្តកំពង់ឆ្នាំង និងខេត្តបាត់ដំបង៕