នាយករដ្ឋមន្ត្រី ៖ ប្រសិទ្ធភាពដំណើរការនៃប្រព័ន្ធធនាគារ គឺធានានូវសុខភាពរបស់សេដ្ឋកិច្ចជាតិ

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ប្រសិទ្ធភាពដំណើរការនៃប្រព័ន្ធធនាគារ គឺធានានូវសុខភាពរបស់សេដ្ឋកិច្ចជាតិ។ ការលើកឡើងនេះ ធ្វើឡើងក្នុងពិធីសម្ពោធជាផ្លូវការអគារធនាគារ ( វីង ថៅវ័រ ) សាខាផ្សារថ្មី រាជធានីភ្នំពេញ​ នៅព្រឹកថ្ងៃទី ២០​ ខែធ្នូ ឆ្នាំ ២០២៣នេះ។

វិស័យធនាគារ គឺជាវិស័យដ៏សំខាន់សម្រាប់ប្រទេសនីមួយៗ ដែលបានតួនាទីសំខាន់ក្នុងការជួយគាំទ្រដល់ការអភិវឌ្ឍប្រទេសជាតិ។ នេះជាការលើកឡើងរបស់សម្ដេចនាយករដ្ឋមន្ត្រី។  

សម្ដេចធិបតី ហ៊ុន ម៉ាណែត បានថ្លែងថា​ «វិស័យធនាគារ គឺសំខាន់ណាស់ ដូចខ្ញុំលើកកាលពីកិច្ចប្រជុំ គឺជាឈាម ពាក្យសាមញ្ញថា ធ្វើអីអត់លុយ ក៏អត់កើតដែរ ប៉ុន្តែបើមានថវិកា មានលុយហើយ អត់មានការគ្រប់គ្រងច្បាស់លាស់ យន្ដការក្នុងការជួយ…ចល័តចរន្តនេះ ក៏វាពិបាកដែរ អញ្ចឹងធនាគារដើរតួនាទីសំខាន់ណាស់ នៅក្នុងការបង្វិល ការប្រមូលផ្ដុំធន និងការបង្វិលវាទៅក្នុងគាំទ្រដល់ដំណើរការសេដ្ឋកិច្ច»។

បើតាមសម្ដេចធិបតី ហ៊ុន ម៉ាណែត ប្រសិទ្ធភាពដំណើរការនៃប្រព័ន្ធធនាគារ គឺធានានូវសុខភាពរបស់សេដ្ឋកិច្ចជាតិ។ «អញ្ចឹងប្រសិទ្ធភាពដំណើរការ នៃប្រព័ន្ធធនាគារយើង គឺធានានូវសុខភាពរបស់សេដ្ឋកិច្ចរបស់យើង នេះគឺវាសាមញ្ញ អញ្ចឹង…ធនាគារដូចបេះដូង ប្រមូលឈាមមក បញ្ចេញឈាមទៅវិញ ចិញ្ចឹមសិរីរាង្គ បើបេះដូងហ្នឹងដើរមិនល្អ សុខភាពយើងក៏មិនល្អ នេះគឺជាកិច្ចការសំខាន់»។ នេះជាការលើកឡើងបន្ថែមរបស់សម្ដេចធិបតី ហ៊ុន ម៉ាណែត។

នៅក្នុងកម្មវិធីដដែលនេះ សម្ដេចធិបតី ហ៊ុន ម៉ាណែត បានបង្ហាញក្ដីសង្ឃឹមថា វិស័យធនាគារនឹងដើរតួនាទីកាន់តែសំខាន់ នៅពេលចរន្តវិនិយោគ និងពាណិជ្ជកម្មកើនឡើងនាពេលខាងមុខ ពីព្រោះដំណើរការការធ្វើពាណិជ្ជកម្ម និងការវិនិយោគ ត្រូវការការសម្របសម្រួលពីវិស័យធនាគារ៕