ព័ត៌មានជាតិ

ចំណេញ ៣០ ទៅ ៥០% ជីកសិកម្មខ្មែរមួយប្រភេទ ដកពិសោធន៍ដីស្រែកសិករផ្តល់ទិន្នផលខ្ពស់ គាំទ្របរិស្ថាន

បានផុស

៣ years មុន

នៅ

ថ្ងៃព្រហស្បតិ៍ ២៨ ធ្នូ ២០២៣

ដោយ

ជីកសិកម្មមួយប្រភេទដែលមានប្រភពផលិតនៅខេត្តកំពង់ធំបាននាំយកទៅធ្វើតេស្តលើដំណាំស្រូវកសិករហើយលទ្ធផលបង្ហាញថាអាចជួយកាត់បន្ថយការប្រើប្រាស់ជីគីមី រួមទាំងធ្វើឲ្យដំណាំលូតលាស់បានល្អ។

លោក មុំ ទិត អ្នកគ្រប់គ្រងផ្នែកលក់នៅក្រុមហ៊ុនផលិតជី CHusk បានគូសបញ្ជាក់ថា ជីកសិកម្មដែលក្រុមហ៊ុនផលិតមាន ៣ ប្រភេទ ហើយពេញនិយមបំផុតគឺប្រភេទជីគ្រាប់ (អូនីក)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រោងចក្រផលិតជីមានទីតាំងនៅខេត្តកំពង់ធំ ហើយការផលិតនេះក៏មានការគាំទ្រពីក្រសួងបរិស្ថាននិងស្ថាប័ន្ធពាក់ព័ន្ធផ្សេងទៀត។

លោក មុំ ទិត បានអះអាងថា តាមការពិសោធន៍នៅដីស្រែកសិករបង្ហាញថា ការប្រើប្រាស់មានប្រសិទ្ធភាពខ្ពស់ ធ្វើឲ្យដំណាំលូតលាស់បានល្អ ហើយកសិករអាចចំណេញការប្រើប្រាស់ជីគីមីបានពី ៣០ ទៅ ៥០ ភាគរយ។

លោកបន្តថា ជីដែលផលិតនេះក៏មានការគាំទ្រពីក្រសួងបរិស្ថានដែលឆ្លើយតបការប្រែប្រួលអាកាសធាតុ និងកាត់បន្ថយផលប៉ះពាល់ដល់បរិស្ថាន។

កសិករមួយរូបរស់នៅភូមិសំបុកអរ ឃុំកំពង់ព្រៀវ ស្រុកសង្កែ ខេត្តបាត់ដំបងដែលប្រើប្រាស់ជីគ្រាប់អូនីកលើដីស្រែជាង ១ ហិកតា បានឲ្យដឹងថា ដំបូងឡើយលោកក៏មិនសូវជឿជាក់លើការប្រើប្រាស់ជីនេះដែរ។ ប៉ុន្តែក្រោយបានសាកល្បងឃើញបានទិន្នផលខ្ពស់ ហើយចំណាយក៏អស់តិចជាងមុន។

កសិកររូបនេះបន្តថា ក្នុងភូមិមិនទាន់មានកសិករច្រើនទេស្គាល់ជីសរីរាង្គដែលក្រុមហ៊ុនបានណែនាំ ដោយពលរដ្ឋមួយភាគធំនៅបន្តប្រើជីគីមីដែលនាំចូល។ តែលោករំពឹងថានៅពេលមានការផ្សព្វផ្សាយបន្តបន្ទាប់ នឹងបំផុសឲ្យកសិករផ្សេងទៀតប្រើប្រាស់ជីផលិតក្នុងស្រុកនេះដោយសារមានការតេស្តពិសោធន៍ឃើញថាមានប្រសិទ្ធភាពខ្ពស់ និងណាមួយក៏មានការគាំទ្រពីស្ថាប័នជាតិរួមទាំងក្រសួងបរិស្ថានផងដែរ៕