Connect with us

ព័ត៌មានជាតិ

លម្អិតរឿងបាញ់សម្លាប់មនុស្ស៣នាក់នៅខណ្ឌពោធិ៍សែនជ័យ

បានផុស

នៅ

​ករណីបាញ់ប្រហារយ៉ាងសាហាវព្រៃផ្សៃបណ្ដាលឲ្យមនុស្ស៣នាក់ស្លាប់ជាបន្តបន្ទាប់ក្រោយបញ្ជូន​ទៅមន្ទីរ​ពេទ្យនោះ គឺផ្ដើមចេញពីការចតឡាន ទាស់​ពាក្យ​សម្ដីគ្នារ​ហូត​ឈាន​ដល់​ផ្ទុះអាវុធ​បណ្ដាល​ឲ្យ​មាន​អ្នក​ស្លាប់បែបនេះ។

រហូតមកដល់ព្រឹកថ្ងៃទី១២ ខែកុម្ភៈ នេះ សមត្ថកិច្ចនៅមិនទាន់ស្រាវជ្រាវចាប់ក្រុមជនដៃដល់​បាន​នៅ​ឡើយ​ទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនរងគ្រោះដែលត្រូវខ្មាន់កាំភ្លើងបាញ់ប្រហារបណ្ដាលឲ្យស្លាប់ទាំង៣នាក់នោះមានឈ្មោះ ​ទី​១ ឈ្មោះ ប៉ូ សូ​ភី ភេទ​ប្រុស អាយុ​៤៥​ឆ្នាំ មុខរបរ​លក់ដូរ រស់នៅ​ភូមិម័រ សង្កាត់​ដង្កោ ខណ្ឌដង្កោ​ ទី​២​ឈ្មោះ សុខ ស៊ីដេត ភេទ​ប្រុស អាយុ​៤០​ឆ្នាំ មុខរបរ​លក់​ទូរស័ព្ទ ស្នាក់នៅ​កន្លែងកើតហេតុ ចំណែក​ទី៣ឈ្មោះ សៀក លឹម ភេទ​ប្រុស​អាយុ​២៥​ឆ្នាំ។

តាមប្រភពព័ត៌មានពីស្ត្រីម្នាក់នៅក្បែរកន្លែងកើតហេតុ បាន​ប្រាប់​ឲ្យ​ដឹងថា មុន​កើតហេតុមានបុរស​ម្នាក់​បើករថយន្ត​មក​ឈប់​ចត​មួយ​ភ្លែត​នៅមុខ​ផ្ទះដើម្បី​ដាក់​កូននៅក្បែរ​កន្លែងកើតហេតុ បន្ទាប់មក​ក៏មាន​បុរស​ម្នាក់ទៀត បើក​ម៉ូតូ​កង់​បី​ឥណ្ឌាមកពី​ក្រោយ​រួច​ស៊ីផ្លេ ដាក់​រថយន្ត​ឲ្យ​អែប ខណៈ​ផ្លូវ​កំពុង​មាន​ការកកស្ទះ រួច​ក៏មាន​ជម្លោះ​ពាក្យសម្ដីដាក់គ្នា​មួយ​ប្រាវ ហើយ​អ្នកបើក​ម៉ូតូ​កង់​បី​ក៏បើក​ចេញទៅ​បាត់ ។​

ប្រភពបន្តថា លុះ​មួយសន្ទុះ​ក្រោយមក អ្នកបើក​ម៉ូតូ​កង់​បី បានត្រឡប់វិញ​ម្ដងទៀតជាមួយ​បក្ខពួក ជិះ​ម៉ូតូ​ជាច្រើន​គ្រឿង និងកើតជម្លោះពាក្យ​សម្ដី​បន្ថែមទៀត រួចអ្នករត់​កង់​បី​នោះ បាន​ស្ទុះ​យក​កាំភ្លើង ពី​បក្ខពួកបាញ់​ប្រហារលើជនរងគ្រោះ​៣​នាក់ បណ្ដាលឲ្យ​ស្លាប់​នៅ​កន្លែង​កើតហេតុ​ម្នាក់ និង​២​នាក់​ទៀត​ស្លាប់ពេលបញ្ជូនដល់មន្ទីរពេទ្យ។

សូមរំលឹកថា​ កាលពី​វេលា​ម៉ោង​៧​និង​២៥​នាទី​យប់ថ្ងៃ​ព្រហស្បតិ៍ ទី​១១ ខែកុម្ភៈ ឆ្នាំ​២០២១ នៅ​ចំណុច​មុខ​ហាង​លក់​ទូរស័ព្ទ យីហោ​ពន្លក​ថ្មី ស្ថិតនៅតាមបណ្ដោយ​ផ្លូវ​បេតុង ក្នុង​បុរី​ប៊ុនហួរ ភូមិ​ព្រៃ​ព្រីង​ខាងត្បូង សង្កាត់​ចោមចៅ​ទី​២ ខណ្ឌ​ពោធិ៍​សែន​ជ័យ រាជធានី​ភ្នំពេញ មានករណីបាញ់ប្រហារ​ទៅលើជនរងគ្រោះ៣នាក់ បណ្ដាលឲ្យស្លាប់ជាបន្តបន្ទាប់ពេលបញ្ជូនដល់​មន្ទីរ​ពេទ្យ។

ទោះយ៉ាងណាសមត្ថកិច្ចកំពុងធ្វើការយ៉ាងយកចិត្តទុកដាក់ ដើម្បីស្រាវជ្រាវកំណត់មុខសញ្ញាឈានដល់ការចាប់ខ្លួនយកមកផ្ដន្ទាទោសតាមច្បាប់៕

អត្ថបទ ៖ សុខុម​

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម