អ.ដ.ក. នឹងសហការជាមួយ ក្រសួង-ស្ថាប័ន​ អង្គភាពពាក់ព័ន្ធ​ ដើម្បីដោះស្រាយវិវាទជូនពលរដ្ឋ

អាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) អ.ដ.ក. នឹងធ្វេីកិច្ចសហការក្នុងភាពជាដៃគូ​ដេីម្បីដោះស្រាយវិវាទជូនប្រជាពលរដ្ឋ ជាមួយ ក្រសួង-ស្ថាប័ន​ និងអង្គភាពពាក់ព័ន្ធ​ រួមមាន​ ក្រសួង​អធិការកិច្ច​ គណៈ​មេធាវី​ នៃព្រះរាជាណាចក្រកម្ពុជា​ រដ្ឋបាលថ្នាក់ក្រោមជាតិ​ និងអង្គការសង្គមស៊ីវិល​ ជាដេីម។

លទ្ធផលនេះ ចេញពី កិច្ចប្រជុំលើកទី១ របស់ អាជ្ញាធរជាតិដោះស្រាយវិវាទក្រៅប្រព័ន្ធតុលាការ នៅថ្ងៃទី៨ ខែមករា ឆ្នាំ២០២៤ នេះ ក្រោមការដឹកនាំ របស់ លោក កើត រិទ្ធ ឧបនាយករដ្ឋមន្ត្រី រដ្ឋមន្រ្តីក្រសួងយុត្តិធម៌ និងជាប្រធានអាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.)។

នៅក្នុងកិច្ចប្រជុំលើកទី១ នេះ អ.ដ.ក.​ មានរបៀបវារៈចំនួន ៣ ដែលត្រូវពិនិត្យ ពិភាក្សា និង​អនុម័ត ក្នុងនោះរួមមាន៖ ទី១. ផែនការការងារ និង​ផែនការហិរញ្ញវត្ថុ​សម្រាប់​កិច្ច​ដំណើរការ​របស់ អ.ដ.ក. ទី២. កិច្ចដំណើរការនៃការសម្រុះសម្រួលដោះស្រាយវិវាទ ទី៣. ការងារផ្សេងៗ។

ក្នុងកិច្ចប្រជុំលើកទី១ នេះ អ.ដ.ក. បាន​សម្រេច​អនុម័ត​ជាគោលការណ៍លើ​៖ ទី១. ផែនការការងារ និង​ផែនការ​ហិរញ្ញវត្ថុ​សម្រាប់​កិច្ចដំណើរការរបស់ អ.ដ.ក. និង ទី២. សេចក្តីព្រាង​សេចក្តី​សម្រេច​ស្តីពីបែបបទ នីតិវិធី និងគុណវុឌ្ឍិសម្រាប់​ការ​ផ្តល់​នីតិសម្បទា​ជាមន្ត្រីសម្រុះសម្រួលដោះស្រាយវិវាទនៃ អ.ដ.ក.។

គួរបញ្ជាក់ថា កិច្ចប្រជុំលើកទី១ របស់ អាជ្ញាធរជាតិដោះស្រាយវិវាទក្រៅប្រព័ន្ធតុលាការ នេះ មានការចូលរួមពីសំណាក់ លោក ហួត ហាក់ រដ្ឋមន្ត្រីក្រសួងអធិការកិច្ច និងជាអនុប្រធាននៃ អ.ដ.ក. លោក លោកស្រី ជាអនុប្រធាន និងសមាជិកនៃ អ.ដ.ក. និងថ្នាក់ដឹកនាំ នៃអគ្គលេខាធិការដ្ឋាន នៃ អ.ដ.ក. ព្រមទាំង​ថ្នាក់ដឹកនាំ និងមន្រ្តីពាក់ព័ន្ធមួយចំនួនទៀត៕